भांगरभूंय | प्रतिनिधी
वाॅशिंग्टन, खबरां संस्था : ई- कॉमर्स मळाचेर क्रमांक एक आशिल्ल्या अॅमेझॉनाक अमेरिकेच्या 17 राज्यांनी न्यायालयांत व्हेलां. कंपनीचेर बाजारांतल्या वर्चस्वाचो गैरवापर, वस्तूंचे ऑनलायन दर फुगोवप आनी विक्रेत्या कडल्यान चड शुल्क घेवप अशे आरोप आसात.
अॅमेझॉनाचें मुखेल कार्यालय आशिल्ल्या वॉशिंग्टनांत हो खटलो दाखल केला. कंपनीच्या वेवसायाची वर्सभर चवकशी केले उपरांत हें पावल उखल्लां. कंपनीच्या 30 वर्सांच्या इतिहासांत कंपनी मुखार इतलें व्हडलें कायदेशीर आव्हान पयलेच खेपे मुखार आयलां. फेडरल ट्रेड कमिशन (एफटीसी) आनी 17 राज्यांनी संयुक्तपणान हो खटलो दाखल केला. कंपनीन बेकायदेशीर वेपार पद्दत आपणावची न्हय हे खातीर कंपनीचेर कायम स्वरुपाची कारवाय करपाची मागणी ह्या खटल्यांत केल्या.
अॅमेझॉनान बेकायदेशीर पद्दती आपणायल्यात आनी आपल्या वर्चस्वाचो फायदो घेवन बाजारपेठेचेर नियंत्रण दवरलां असो आरोप केला. स्पर्धेक हानी करपी वेवसायीक पद्दतींचो वापर कंपनी करता. तातूंत विक्रेत्यांक उण्या दरांत माल विकपाक बंदी आसा. हे संबंदी कॅलिफोर्निया राज्यान पोरूं अॅमेझॉनाचेर वेगळी केस दाखल केल्ली.
अॅमेझॉन कंपनी वस्तूंचे दर वाडोवन लाखांनी अमेरिकन कुटुंबांची फटवणूक करता. कंपनी आपल्या फायद्या खातीर हेर वेवसायांक हानी करपाक लागल्या, अशी प्रतिक्रिया फेडरल ट्रेड कमिशनाची अध्यक्ष लीना खान हांणी दिल्या.
संघराज्य वेपार आयोगाची मुखेल भुमिका म्हळ्यार गिरायक हक्कांची राखण करप आनी सर्तीक वाव दिवप. ही भुमिकाच आतां आयोग विसरला. आयोगान चुकीचीं तथ्यां मांडल्यांत आनी ते खातीर आतां ते कायद्याचो आदार घेवपाक सोदतात, अशें अॅमेझोनाचे म्हणयारे डेव्हिड झापोल्स्की हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
