भांगरभूंय | प्रतिनिधी
सुखिजाः विरोध केल्यार गोंयांतल्या पर्यटनाचेर परिणाम
भांगरभूंय । प्रतिनिधी
पणजीः अॅपाचेर आदारीत टॅक्सीसेवा ही काळाची गरज आसा. हे सेवेचो फक्त पर्यटकांक न्हय जाल्यार थळाव्या लोकांक लेगीत फायदो जाता. टॅक्सीकारांच्यो कांय समस्या आसल्यार तांणी सरकारा वांगडा उलोवणी करून सोडोवपाक जाय. ॲपाचेर आदारीत टॅक्सीक विरोध केल्यार गोंयांतल्या पर्यटनाचेर परिणाम जातलो, अशें मत गोंय ट्रॅव्हल अॅण्ड टुरिझम असोसिएशनाच्या पदाधिकाऱ्यांनी उक्तायलें.
शुक्रारा पणजे जाल्ले पत्रकार परिशदेंत संघटनेचे अध्यक्ष जॅक सुखिजा हांणी सांगलें, गोंयांत पर्यटन मळार बरो रोजगार आसा. हाका लागून सरकाराक दोन हजार कोटी रुपयांची येणावळ मेळटा. हो वेवसाय तिगोवन दवरपा खातीर पर्यटक वा गिरायकाक कितें जाय हाचो विचार करप गरजेचें. संवसारभर आनी देशांत लेगीत ॲप आदारीत येरादारी सुविधा उपलब्ध आसात. पूण अशे पर्याय फक्त गोंयांत उपलब्ध नात.
गोंयांत टॅक्सी ॲपाचो प्रस्न खूब वर्सांच्यान पडून आसा. हे विशीं सरकारान ठाम भुमिका घेवपाक जाय. अॅप टॅक्सीक विरोध करपी टॅक्सी ड्रायव्हरां परस राज्यांतल्या गिरायकांचो आंकडो चड आसा, हाचोय विचार करपाक जाय. गोंयच्या बऱ्या खातीर टॅक्सीकारांनी सरकारा कडेन उलोवणी करून आपले प्रस्न सोडोवपाक जाय. थोड्या लोकांच्या गुप्त हेतू खातीर तांणी गोंयचो पुराय पर्यटन वेवसाय धोक्यांत घालूंक फावना, अशें सुखिजा हांणी सांगलें.
सगळ्यो सुविधा बऱ्यो आसल्यो तरी टॅक्सीची समस्या आसा अशें गोंयांत येवपी पर्यटक सांगतात, अशें टीटीएजीचे वांगडी निलेश शाह हांणी सांगलें. आंदोलन करून ही खबर राष्ट्रीय माध्यमां मेरेन वता. हाका लागून जायत्या हॉटेलांची बुकींग रद्द जावपाची शक्यताय न्हयकारूंक शकना. अश्यो घडणुको हाचे पयलीं घडल्यात. गोंयांतले सुमार णव लाख लोक आपलें पोट भरपा खातीर पर्यटन क्षेत्राचेर आदारून आसात. देखून आमदारांनीय हाचें राजकारण करिनासतना ॲप आदारीत टॅक्सीक तेंको दिवचो, अशें तांणी सांगलें.
सप्तकांत तीन भाडी मारपाचे दीस गेले
दिसाक एक भाडें वा सप्तकांत तीन भाडी मारून सुशेगाद रावपाचे दीस आतां गेले. सर्त वाडत वता तशी संदय वाडटा हें सगळ्यांनी लक्षांत दवरचें, अशें निलेश शहा हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
