भांगरभूंय | प्रतिनिधी
स्मार्ट मिटराची प्रक्रिया वीज खात्या कडल्यान गतीन
पणजी: गोंयांतल्या सगल्या घरांक स्मार्ट वीज मिटर बसोवपा सयत वीज मेळोवपा खातीर अॅप सुरू करपाची तयारी वीज खात्यान केंद्र सरकाराच्या निदेशा प्रमाण सुरू केल्या. ताका लागून लोकांक रोखडेंच अॅपा वरवीं रिचार्ज करून वीज वापरूंक येतली आनी ते वरवीं आपणें कितली वीज वापरली हाची म्हायतीय मेळोवंक येतली.
केंद्र सरकारान सुदारीत वितरण क्षेत्र येवजण (आरडीएसएस) चालीक लावन देशांतल्या लोकांक स्मार्ट वीज मिटर दिवपाचें निश्चीत केल्लें. ते प्रमाण गोंय सरकारान स्मार्ट वीज मिटर बसोवपाचे प्रक्रियेक गती दिल्या. हे खातीर डिजिटल नेटवर्क प्रायव्हेट लिमिटेड ह्या कंपनीची नेमणूक केल्या. वीज खात्यान ह्या कंपनी सयत 29 मे दिसा कबलातूय केल्या आनी कंपनी वतीन स्मार्ट वीज मिटर बसोवपाची प्रक्रियाय रोखडीच सुरू जातली. फुडल्या एका वर्सांत 60 टक्के गिरायकांच्या घरांनी स्मार्ट मिटर बसयतले. जाल्यार ताचे उपरांत वर्सभरांत शंबर टक्के घरांनी स्मार्ट मिटर बसोवपाची प्रक्रिया पुराय करपाचें लक्ष्य खात्यान दवरिल्ल्याची म्हायती अधिक्षक अभियंते मयूर हेदे हांणी ‘भांगरभूंय’ कडेन उलयतना दिली.
गोंयांतल्या 7,50,356 गिरायकांचे पोरणें मिटर बदलतले. पयल्या टप्प्यांत खात्याच्या ट्रान्सफॉर्मराची 8,369 जाल्यार सबस्टेशनाची 827 मिटर बदलतले. उपरांत सरकारी कचेऱ्यो, सरकारी क्वार्टर्स, तिसऱ्या टप्प्यांत वेवसायीक आनी उद्देगीक जाल्यार चौथ्या टप्प्यांत घरगुती गिरायकांचे मिटर बदलतले. दर एक मिटर घाले उपरांत कंपनीक केंद्रा कडल्यान सुमार 900 रुपया दितले. जाल्यार गोंय सरकार दर मिटरा फाटल्यान दर म्हयनो थारावीक रक्कम दितले. ही रक्कम गिरायकांच्या प्रकाराचेर निंबून आसतली अशें हेदे हांणी सांगलें.
नेमणूक केल्ले कंपनीक फुडलीं धा वर्सा स्मार्ट मिटर आनी ताच्या प्रणालीचें काम पळोवचें पडटलें. हातूंत देखभाल आनी दुरुस्तीच्या कामांचोय आस्पाव आसा. स्मार्ट मिटरा सकयल कम्युनिकेशन मोड्यूल बसयतले. हें मोड्यूल खात्याच्या सेंट्रल सर्व्हरा कडेन जीपीआरएस वा आरएफ तंत्रज्ञाना वरवीं गिरायकांच्या वीज युनीट वापराची म्हायती धाडटले. ही मिटर प्रिपेड आसतली अशें तांणी सांगलें.
महसूल बुडचो न्हय हे खातीर निर्णय
घरा स्मार्ट मिटर बसयले उपरांत गिरायकांक अॅपा वरवीं रिचार्ज करून वीज मेळोवं येतली. आपल्याक जाय तितली वीज गिरायकांक घेवंक मेळटली. तशेंच आपणे खंयच्या दिसा कितलें युनीट वीज वापरली हाची म्हायती तांकां अॅपा वरवीं मेळोवं येतली. सरकारी महसूल बुडचो न्हय हे खातीर वीज खात्यान हो निर्णय घेतिल्ल्याची म्हायती मयूर हेदे हांणी दिली.
स्मार्ट मिटर, अॅपाक लागून जावपी फायदे
1. मिटर रिडिंग, बिलिंग प्रक्रिया अदीक पारदर्शक जातली.
2. गिरायकांक वीज युनीट वापर, लोड आदींची म्हायती अॅपाचेर मेळटली.
3. सेंट्रल सर्व्हराक लागून वीज पुरवण खंडीत जाली जाल्यार कागाळ येवचे पयलींच खात्याक ताची म्हायती मेळटली.
4. हाका लागून गोंयाक नेमकी कितली विजेची गरज आसा हाची अचूक म्हायती मेळटली.
5. वीज खरेदी करतना खात्याक हाचो फायदो जातलो.
लायनमॅनाक दितले हॅल्मॅट, स्मार्टवॉच: सुदिन
ट्रान्सफॉर्मराचेर चडून काम करीत आसतना होंडा हांगा लायनमॅनाक मरण येवपाची जी घडणूक घडली, ताचो अहवाल फुडल्या तीन दिसांत येतलो. हाचे मुखार अश्यो घडणुको आडावपा खातीर वीज खात्या कडल्यान पुरेपूर जतनाय घेतले. लायनमॅना खातीर हॅल्मॅट आनी स्मार्टवॉच अशा सुमार शंबर साधनांची निर्मिती करपाचें काम गोंय अभियांत्रिकी म्हाविद्यालयाक दिल्ल्याची म्हायती वीज मंत्री सुदिन ढवळीकार हांणी बुधवारा पत्रकारां कडेन उलयतना दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
