भांगरभूंय | प्रतिनिधी
पेडणें: समाजीक वावुरपी तशेंच एडवोकेट सदानंद वायंगणकार हे धारगळे तीन बेकायदेशीर बांदकामां विशीं पंचनामो करपाक गेल्ले कडेन पुलीस आनी सरकारी यंत्रणेच्या हाजेरींत थळाव्यांनी तांकां बरोच मार घालो.
हे विशीं सविस्तर म्हायती प्रमाण, धारगळचे निलेश धर्मा पटेकार हांणी ओशेलबाग- धारगळे सर्वे नंबर ५४७/० हातूंत तीन बेकायदेशीर बांधकामां संबंदी मुखेल वीज अभियंतो स्टीफन फर्नांडीस हांचे आडची कागाळ पेडणें गटविकास कार्यालयांत, मामलेदार, धारगळे पंचायत, वेगवेगळ्या सरकारी खात्यांनी दिल्ली. ते प्रमाण गटविकास कार्यालया वरवीं धारगळ पंचायती वतीन ६ तारखेर बांधकामांचो पंचनामो करपा खातीर धारगळचे सरपंच अर्जुन कांदोळकार, पंचायत सचिव प्रीतम सावंत, गट विकास कार्यालयाचे अभियंते आनी अॅड. वायंगणकार हाजीर आशिल्ले.
पंचनामो करपाक पुलीस आनी पंचायत यंत्रणां हाजीर आशिल्ली. तेन्ना संबंदीत बांधकाम करपी वेवसायीकां वांगडा कांय बायलांय आशिल्लीं. त्या बायलांनी आनी सज्जन कोनाडकार हांणी आपल्याक बरोच मार घाल्ल्याची म्हायती थळाव्या पत्रकारां कडेन उलयतना अॅड. वायंगणकार हांणी दिली.
धारगळे रेडकर हॉस्पिटला मुखार सर्व्हे नंबर ५४७/० हे सुवातेंत वट्ट तीन बेकायदेशीर बांधकामां केल्ल्यान तातूंत काजूगर डिलाईट, ड्रीम रेस्टॉरंट आनी मार्बल विकपाचो वेवसाय अशे तीन वेवसाय उबे केल्यात. ते विशीं निलेश पटेकर हांणी स्टीफन फर्नांडीस हांचो आड ह्या बांदकामांत आसपाव आशिल्ल्याचो दावो करीत सरकारी खात्यां कडेन कागाळ केल्ली.
६ तारखेर धारगळ पंचायत आनी पेडणें गट विकास कार्यालया वरवीं ह्या बांधकामाचो पंचनामो करपाक सुरवात जाली. तेन्ना कागाळदार पटेकार वा जांचेर कागाळ केल्ली ते स्टीफन फर्नांडीसूय हाजीर नाशिल्ले. मात निलेश पटेकर हांणी अॅड. वायंगणकार हांकां ऑथॉरिटी दिल्ली. हाका लागून वायंगणकार हे पटेकर हांचे वरवीं ह्या पंचनाम्याक हाजीर आशिल्ले. तेन्ना हे तिनूय वेवसाय चलोवपी वेवसायीकां वांगडा कांय बायलोय आशिल्ल्यो. त्या बायलांनी आनी नागरिकांनी वायंगणकार हांकां, खोटांनी, मुठी घालून आनी दांड्यान बडयले. उपरांत कांय पुलीस घडणुके सुवातेर पावले. मात त्या वेळार १०८ ऍम्बुलन्स पावूंक ना. म्हणून पुलिसांनी जखमी जाल्ल्या वायंगणकार हांकां हॉस्पिटलांत उपचारा खातीर व्हेलो. मात ताचे पयलें वायंगणकार हांणी हॉस्पिटलांत वचपाक हरकत घेतिल्ली. तांणी ‘जो मेरेन हे घडणुकेचो आनी जीं बेकायदेशीर बांदकामां आसात, तांचो सविस्तरपणान पंचनामो जायना. तो मेरेन आपूण हॉस्पिटलांत वचचों ना, असो हट्ट धरलो.
घडणुके सुवातेर पंचायत सचिव, सरपंच, बिडीयो कार्यालयांतले अभियंता हाजीर आशिल्ले. तेन्ना अॅड. सदानंद वायंगणकार हांणी जखमी अवस्थेंत हीं- हीं बांदकामां आसात. तांचो पंचनामो करात अशें खरपणान सांगलें आनी ताचे उपरांतूच ते पुलिसांच्या वाहनांत उपचारा खातीर हॉस्पिटलांत गेले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
