भांगरभूंय | प्रतिनिधी
भौशीक बस सेवा, उद्देगीक वसणुके विशीं सत्ताधारी आमदारांनी मांडल्यो समस्या
पणजी: गोवा मायल्सचे टॅक्सीकार उणें भाडे घेतात, हाका लागून थळाव्या टॅक्सीकारांक फटको बसता. टॅक्सी भाड्याच्या दरांत समानताय जाय. मात भायलो अॅग्रिगेटर नाका, अशी मागणी दर्यादेग वाठारांतल्या आमदारांनी केली. विरोधी आमदारां सयत सत्ताधारी आमदारांनी उद्देगीक वसुणेकेंतले खाली प्लॉट तशेंच भौशीक येरादारी वेवस्थे विशीं कागाळी मांडल्याे. गावगिऱ्या वाठारांत बशी नाशिल्ल्या कारणान लोकांची गैरसोय जाता असो मुद्दो मांडलो.
येरादारी, उद्देग आनी पंचायत खात्यांच्या मागण्यांचेर सभाघरांत चर्चा जाली.
गोंयांतल्या उद्देगांनी थळाव्या लोकांक काम मेळूंक जाय. कितले कामगार गोंयचे आसात आनी कितले भायले आसात ताची तपासणी जावंक जाय. खूबशे उद्देजक भायले कामगार घेतात अशी कागाळ मयेंचे आमदार प्रेमेंद शेट हांणी केली.
लाटंबार्से उद्देगीक वसणुकेंत प्लॉटांचें वांटप जालां मात आजून एकूय उद्देग सुरू जावंक ना. उद्देग कित्याक सुरू जावंक ना? असो प्रस्न दिवचलचे आमदार डॉ. चंद्रकांत शेटये हांणी केलो. दिवचलच्या बस स्टॅण्डाचो वावर फाटली साडेतीन वर्सां सुरू आसा. हो बस स्टॅण्ड केन्ना पुराय जातलो? बस स्टॅण्ड नाशिल्ल्यान बरीच गैरसोय जाता अशें डॉ. शेटये हांणी सांगलें.
गोवा मायल्स टॅक्सीकार उणें भाडे घेतात. हाचो फटको गोंयच्या टॅक्सीकारांक बसता. टॅक्सी भाड्याचे दर समान करचे. मात भायलो अॅग्रिगेटर हाडचो न्हय अशी मागणी आमदार डिलायला लोबो हांणी केली. मोपा विमानतळार पार्कींग शुल्क चड आसा. ते उणें करचे. पंचायतीक आपत्ती वेवस्थापन तशेंच झाडां मारपा खातीर जो निधी मेळटा तो पावना. चड निधीची तजवीज करपाची मागणी डिलायला लोबो हांणी केली.
धारबांदोड्यां बस स्टॅण्डा सयत उद्देगीक वसणूक स्थापन जावपाची गरज आसा. उद्देगीक वसणुके खातीर जागो आसा अशें आमदार गणेश गांवकार हांणी सांगलें. दरेका मतदारसंघांत एक कोयर वेवस्थापन प्रकल्प स्थापन करचो अशी सुचोवणी गणेश गांवकार हांणी केली.
गोंयांत हॉटेलांच्या दरा सयत हेर बऱ्योच गजाली म्हारग आसात. हे फाटभुंयेर पर्यटक उणे जावपा खातीर फक्त टॅक्सीकाराक दोश दिवप अयोग्य आसा अशें जेनीफर मोंसेरात हांणी सांगलें. थळाव्या टॅक्सीकारांचो हेत जपपा खातीर तांच्या मागण्यांचो विचार करपाक जाय अशी मागणी आमदार जेनीफर मोंसेरात हांणी केली.
सरकारान अनधिकृत बांदकामां नियमीत करपा खातीर परिपत्रकां जारी केल्लीं आसलीं तरी गरजेचे दाखले खंयच्यान हाडप हो प्रस्न आसा. प्रियोळ मतदारसंघांत 1990 वर्सा मेरेन खुबश्या घरांनी वीज नाशिल्ली. उदकाच्यो जोडण्यो 2000 वर्सा उपरांत मेळ्ळ्यात. हे फाटभुंयेर 1972 पयलींच्या घरांनी उदक तशेंच विजेचीं बिलां खंयच्यान हाडचीं हो प्रस्न आसा, अशें गोविंद गावडे हांणी सांगलें.
टॅक्सीकारांक माफीया म्हणप अयोग्य आसा अशें केदार नायक हांणी सांगलें. कांय गोंयकार खूबशीं वर्सां हो वेवसाय करतात. तांच्या मागण्यांचो विचार जावंक जाय अशें केदार नायक हांणी सांगलें.
रूडॉल्फ फर्नांडीस, राजेश फळदेसाय, प्रवीण आर्लेकार हांचींय ह्या वेळार उलोवपां जालीं.
मंत्री म्हणू मॉवीन गुदिन्हो फावो ती कामगिरी करपाक फाटीं : मायकल लोबो
मॉवीन गुदिन्हो हे ज्येश्ठ मंत्री आसले तरी फावो ती कामगिरी करपाक ते फाटीं आसात अशें आमदार मायकल लोबो हांणी म्हणलें. अॅप अॅग्रिगेटर प्रस्नाचेर अजून उपाय येवंक ना. तशेंच म्हापशें सयत सगल्या बस स्टॅण्डाची स्थिती बाबत आसा. टॅक्सी भाड्याचे दर समान आसूंक जाय. डिजिटल माध्यमांतल्यान नियंत्रण जाय. मात अॅप अॅग्रिगेटर गोंयांत नाका. हाचेर समिती स्थापन करून उपाय काडपाची गरज आसा अशें मायकल लोबो हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
