भांगरभूंय | प्रतिनिधी
टॅक्सी वेवसायीक : हरमलचे बसकेंत सरकारा कडेन मागणी
भांगरभूंय । प्रतिनिधी
पेडणें : गोंयांतल्या टॅक्सी वेवसायिकांक सरकारान सदांच रस्त्याचेर देंवपाक लायलां. सध्या अॅग्रिगेटर अॅपाचो विशय फुडें हाडला. ताका लागून थळाव्या प्रामाणीक टॅक्सी वेवसायिकांक परतून रस्त्याचेर देंवपाचो वेळ आयला. सरकाकरान गोंयच्या टॅक्सी वेवसायिकांक आनीक सतयनासतना अॅग्रिगेटर अॅप तत्काळ बंद करचो, अशी मागणी टॅक्सी वेवसायिकांनी केल्या.
हरमलच्या मैदानाचेर आयोजीत केल्ले बसकेंत मांद्रें आनी दर्यादेग वाठारांतले शेंकड्यांनी टॅक्सी वेवसायिकांक जमिल्ले. दरेक टॅक्सी वेवसायीक लेखी स्वरुपांत निशेध अर्ज पेडणें म्हाल कार्यालयांत दितले. सरकारान हाची नोंद घेवची आनी थळाव्या वेवसायिकांक आदार दिवचो, अशी मागणी ह्या वेळार केली.
टॅक्सी वेवसायिकांनी ‘आमकां नाका, आमकां नाका, अॅप बेस्ड टॅक्सी आमकां नाका’ अश्यो घोशणा दिवन वाठार हालोवन सोडलो. टॅक्सी बर्नांड डिसोझा, प्रदीप वस्तू, मॅन्युएल फर्नांडीस, विठ्ठल मांद्रेंकार, रुजय फर्नांडीस हांचे सयत हरमल, मांद्रें, मोरजी, केरी आनी पालयें वाठारांतले वेवसायीक हाजीर आशिल्ले.
टॅक्सी धनी महादेव गावडे हांणी सांगलें, दर्यादेग वाठारांतल्या चडश्या वेवसायिकांनी इतलीं वर्सां प्रामाणीकपणान वेवसाय केलो. आतां ह्या वेवसायांत कांय विध्वंसक वृत्तीचे लोक घुसल्यात आसतले. मात तांचो मार प्रामाणीक वेवसायिकांक बसचो न्हय हे खातीर सरकारान अॅग्रिगेटर अॅप ताकतिकेन बंद करचो.
गोंयांत दरेकल्याच्या घरांत एक ते दोन गाडयो आसात. ताका लागून गोंयकार टॅक्सीचो चडसो वापर करिनात. आतां पर्यटन वेवसायाचेर आदारीत आशिल्ल्या ह्या गोंयच्या वेवसायांत उत्तर प्रदेश, बिहारचे चालक व्हड प्रमाणांत येवपाची शक्यताय आसा. तांकां लागून उप्रासपी समाजीक समस्यांचो विचार करून सरकारान अॅप आदारीत सेवा तत्काळ बंद करची, अशी मागणी गावडे हांणी केली. संदीप वायंगणकार हांणी सांगलें, सरकार खंयच्या उद्देशान आमचो वेवसाय काबार करपाक सोदता, तें खबर ना. टॅक्सी वेवसायिकांनी गुन्यांव केल्यार तांचेर कारवाय करची. येरादारी मंत्री वादग्रस्त आसा. तांणी खूब खेपे थळाव्यांक माफिया म्हणल्यात. अशे प्रकार हाचे मुखार खपोवन घेवचे नात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
