भांगरभूंय | प्रतिनिधी
पणजीः सहाय्यक शिक्षणीक संस्थांच्या वेवस्थापनांनी अॅक्सीस बँकेंत खातीं उक्तीं करचीं अशा निर्णयाचेर राज्य सरकार ठाम आसा. फकत अॅक्सीस बँकेंतल्यान निधी ऑनलायन वांटप जाता काय ना हाची म्हायती मेळोवपा खातीर संस्थांक अॅक्सीस बँकेंत खातें उगडपाचे निर्देश दिल्ले अशें शिक्षण खात्याच्या एका वरिश्ठ अधिकाऱ्यान सांगलें.
हाचे पयलीं सरकारी आदारान शिक्षणीक संस्था खंयचेय बँकेंत खातीं उगडपाक शकतलीं. पूण सरकारान निधी दिले उपरांत शिक्षकांक आनी कर्मचाऱ्यांक कांय संस्थां कडल्यान रोखडोच पगार मेळनाशिल्लो. कांय संस्था शिक्षकांक, कर्मचाऱ्यांक थारावीक पगार दिनाशिल्लीं. हातूंत पारदर्शकता हाडपा खातीर सरकारान अॅक्सीस बँकेंत खातीं उगडपा खातीर सहाय्यक शिक्षणीक संस्थांक सुचोवण्यो जारी केल्यात. अॅक्सीस आनी महिंद्र कोटक ह्या दोन बँकांनी हे खातीर सरकाराक प्रस्ताव सादर केल्ले. पूण सरकारा कडल्यान निधी सोडले उपरांत रोखडोच शिक्षणीक संस्था शिक्षकांचो पगार दितात काय ना हाचे विशीं शिक्षण खात्याक ऑनलायन म्हायती दिवपाची सुविधा अॅक्सीस बँके कडेन आसा. देखून कोटक महिंद्रा बदला अॅक्सीस बँकेचो प्रस्ताव सरकारान मान्य केलो अशें अधिकाऱ्यान सांगलें.
मजगतीं, विरोधकांनी सरकाराच्या परिपत्रकाचेर टिका करपाक सुरवात केल्या. सरकार खाजगी बँकांक उर्बा दिता आनी भौशीक बँको सोंपयता अशी टिका विरोधी फुडारी युरी आलेमांव हांणी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
