भांगरभूंय | प्रतिनिधी
म्हापशें, प्रतिनिधी ः म्हापशेंच्या अहमद देवडी खून प्रकरणांतलो दुबावीत बोरेश सतीश पुजारी (39, शेल्डे- केपें, मुळ गोकाक कर्नाटक) हाका कळंगुटे काळजाचो आताक येवन मरण आयलें. पोस्टमार्टमा उपरांत पुलिसांनी ताची कूड कुटुंबाच्या ताब्यांत दिली.
ही घडणूक मंगळारा 7 तारखेर घडली. बोरेश हो सध्या कळंगुटे रावतालो. ताचें कळंगुचांत स्पाचें आस्थापन आशिल्लें. थंय ताका अस्वस्थत दिसपाक लागिल्ल्यान ताका कांदोळेच्या प्राथमीक भलायकी केंद्रांत व्हेलो. थंय दोतोरांनी ताका मरण आयिल्ल्याचें सांगलें.
पंचनाम्या उपरांत कलंगुटे पुलिसांनी कुड जीएमसींत व्हेली. बुधवारा सकाळीं पोस्टमार्टमा उपरांत बोरेशाची कूड ताच्या कुटुंबाच्या ताब्यात दिली. पोस्टमार्टम अहवाला प्रमाण काळजाचो आताक आयिल्ल्यान ताका मरण आयिल्ल्याचें स्पश्ट जालें. कळंगुटे पुलिसांनी हें प्रकरण असैमीक गुन्यांव म्हूण नोंद केला.
मजगतीं, गणेशपुरी म्हापश्यां वैयक्तीक वादाक लागून फाटल्या 30 मे 2024 दिसा अहमद देवडी (30, लक्ष्मीननगर, म्हापशें) आनी संदेश साळकार हांचेर खूनी हल्लो जाल्लो. देवडीक 18 जून 2024 दिसा जीएमसींत उपचारा वेळार मरण आयल्लें. ह्या खून प्रकरणांत म्हापश्यां पुलिसांनी वट्ट णव दुबावितांक अटक केल्ली. हातूंत मेल्लो बोरेश पुजारी हांचोय आस्पाव आशिल्लो. बोरेश सध्या ह्या प्रकरणांत जामीनाचेर बंदखणींतल्यान भायर आशिल्लो. जाल्यार उरिल्ले आठ दुबावीत न्यायालयीन कोठयेंत आसात. पुलिसांनी न्यायालयांत आरोपपत्र दाखल केलां आनी ह्या प्रकरणाची सुनावणी सुरू आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
