भांगरभूंय | प्रतिनिधी
खबरां संस्था
अहमदाबाद : अहमदाबादांत अॅर इंडियाच्या विमान एआय-171 दुर्घटणेटच्या 27 वरां उपरांत शुक्रारा विमान अपघात तपास ब्युरोन (एएआयबी) ब्लॅक बॉक्स जप्त केलो. तो हॉस्टेलाच्या तेर्रासार सांपडलो. हे वरवीं दुर्घटणे आदींच्या निमाण्यां खिणांनी कितें घडलें तें कळपाक शकतलें.
ऩर इंडियाच्या विमानांत 12 क्रू मेंबरा वांगडा 242 प्रवासी आशिल्लें. तातूंतल्या एका प्रवाशाचो जीव वाटावला. मरण आयिल्ल्यां मदीं राजस्थानांतले 13, मध्य प्रदेश, हरियाणा आनी बिहारांतलो दरेकी एक प्रवासी आशिल्लो. दुसरे वटेन गुजरातचे आदले मुख्यमंत्री विजय रुपाणी हांचे कुडीची अजून वळख पटिल्ली ना. मरण आयिल्ल्यांच्या घरच्यांची वळख पटोवपा खातीर डीएमए चांचणी चालू आसा.
मजत पंगडान 270 जाणांच्यो कुडी भायर काडल्यात. तातूंतल्या 7 जाणांच्यो कुडी डीएनए चांचणी उपरांत तांच्या घरच्यांचे सुवादीन केल्यात. विमान पडिल्ल्या बी जे मॅडिकल कॉलेजीच्या हॉस्टेलांतल्यो पांच कुडी आसात. विमान पडिल्लें तेन्ना हॉस्टेलांत 50 परस अदीक जाण आशिल्ले.
मेळिल्ले म्हायती प्रमाण काल सांजे उसरां मेरेन सिव्हील हॉस्पिटलांत 270 परस अदीक कुडींचो पोस्टमार्टम केल्लो. 220 लोकांचें डीएनए सॅम्पलींग केल्लें.
शुक्रारा सकाळीं प्रधानमंत्री नरेंद्र मोदी अहमदाबाद पावले. सगळ्यांत पयलीं तांणी दुर्घटणेचे सुवातेर भेट दिली. उपरांत ते सिव्हील हॉस्पिटलांत गेले, थंय ते सुमार 10 मिण्टां पिडेस्तांक मेळ्ळे. विमान दुर्घटणेची चवकशी 7 एजन्सी करतात. तातूंत राष्ट्रीय तपास संस्था, गुजरात पुलीस, विमान अपघात तपास ब्युरो, नागरी विमान येरादारी म्हासंचालनालय, युनायटेड किंग्डमचो हवाई अपघात चवकशी फांटो, युनायटेड स्टेटीचें राष्ट्रीय येरादारी सुरक्षा मंडळ आनी फेडरल एव्हिएशन प्रशासन हांचो आस्पाव आसा
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
