भांगरभूंय | प्रतिनिधी
अहमदाबाद, खबरां संस्था ः देशांतलो दुसरो व्हडलो मनरिजवण थीम पार्क अहमदाबादांत जाता. संवसारीक दर्ज्याच्या मनरिजवणे खातीर फामाद आशिल्लो इमॅजिकाचो थीम पार्क साबरमती न्हंयचेर पांच लाख चौखण फूट न्हंयचे देगेर उबारतले. पुण्याचे इमॅजिका वर्ल्ड आनी साबरमती रिव्हरफ्रंट डेव्हलपमेंट कॉर्पोरेशन (एसआरएफडीसीएल) हांचे मदीं कबलात जाल्या. मुंबय-पुणे म्हामार्गाचेर खापोली हांगा देशांतलो सगळ्यांत व्हडलो इमॅजिकाचो थीम पार्क (60 लाख चौखण फूट) थीम पार्क आसा.
इमॅजिकाला ह्या थीम पार्का खातीर साबरमती रिव्हरफ्रंट डेव्हलपमेंट कॉर्पोरेशनान 30 वर्सां खातीर जमीन भाड्याचेर दिल्या. हे जमनीचें वर्सुकी भाडें 45.60 लाख रुपया आसतलें. हें भाडें दर तीन वर्सांनी 10 टक्क्यांनी वाडयतले.
5 झोनांत इमॅजिका, दरेकाचे वेगवेगळी खाशेलपणां…
झोन 1- मुखेल प्रवेश आनी वाहन सोडपाचो वाठार आसतलो. तो पुरायपणान उक्तो आसतलो. पांच हजार लोकां खातीर सुवात आसतली. बागेंतल्या वॉकवेवेल्यान भितर सरतले.
झोन 2 – तिकेटा खातीर जनेलां आसतलीं. ताच्या छप्पराचेर फेरीस व्हील आसतलें. तिकेट घेतले उपरांत सरळ फेरीस व्हील पळोवंक मेळटा. फेरीस व्हीलाची उंचाय 66 मीटर आसतली.
झोन 3 – 500 वाहनां खातीर पार्किंग आसतली. आंतरराष्ट्रीय ब्रँड डेव्ह अँड बस्टर इनडोअर एंटरटेनमेंट स्टोर आसतलो.
झोन 4 – एक स्नो पार्क आसतलो. मायनस 5 अंशांत जायत्यो स्लायडी आसतल्यो. तशेंच रॉक क्लायंबिंग वॉल आसतली. तशेंच बर्फान व्यापिल्लो कृत्रीम दोंगर आनी डाव्स फ्लोर आसतलो.
झोन 5 – सगळ्या पिरायेच्या लोकां खातीर एक रोमांचक मनरिजवणेची ड्रायव्ह आसतली. तांतूत दोन रेस्टॉरंट आसतली. ट्रॅम्पोलिन पार्क, गो कार्ट, सॉफ्ट प्ले एरिया, रोलर कोस्टर आदी ह्या पार्कात उबारतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
