भांगरभूंय | प्रतिनिधी
काळ बदलता, तशे बदल हे जायत आसतात. अॅप आदारीत टॅक्सी सेवा होय एक बदल. अर्थांत ताचो कांय घटकांचेर परिणाम जाता. आॅनलायन विक्रेक लागून वेपाऱ्यांक धपको बसला. पणजे स्मार्ट सीटी बससेवेक लागून पायलट, रिक्षाकारांचो वेवसाय उणो जाला. काळा प्रमाण माथ्याक कुरपणें घालचेंच पडटा. घालिना तो सोंपलो. सध्या गोंयांत अॅप अॅग्रिगेटरा वयल्यान टॅक्सीकार अस्वस्थ जाल्यात. ह्या अॅपा वयल्यो तांच्यो हरकती, सुचोवण्यो सादर करपाक एक म्हयन्याची मुजत दिल्या. काल सादारण 10 टक्के टॅक्सीकारांनी जुंता हावसांतल्या येरादारी खात्या मुखार आपलें म्हणणें मांडलां. दीस वतात, तश्यो सुचोवण्यो, हरकती येत रावतल्यो. ह्या अॅप संबंदीच्या प्रस्नाक राजकी मोडण मेळ्ळां. कारण 2- 3 आमदारांनी टॅक्सीकारांचें समर्थन केलां. येणावळ मंत्री आंतानसियो मोन्सेरात हांणी तर टॅक्सीकारां खातीर रेंट ए कॅब सेवाच रद्द करची, अशें मत उक्तायलां. ताचेरूय बोवाळ सुरू जाला. टॅक्सीकारांचो वाद वाडचे पयलींच सोंपूंक जाय, पर्यटनाचेर ताचो परिणाम जावंक जायना.
गोंयांत 2019 त 25,000 हजार पर्यटन टॅक्सी संपांत वांटेकार जाल्ल्यो. जुलय 2024 च्या आंकड्या प्रमाण 18,000 टॅक्सीकार जीएसटी आनी हेर कर भरिनाशिल्ल्यान सरकाराक वर्साक 90 कोटी रुपया लुकसाण जाता खंय. सध्या गोंयांत गोवामायल्स ही अॅप टॅक्सीसेवा आसा. तिचे कडेन 1560 टॅक्सी आसात. ती वर्साक आठ कोटी रुपया सरकाराक दिता, अशें आंकडे सांगतात. गोंयचे टॅक्सीसेवे विशीं बरें उलोवपी खूब थोडे पर्यटक आसात. चडशे विरोधांत. तेच कित्याक कांय गोंयकारूय तांकां नांवां दवरतात. सगल्यांचो मुखेल आरोप म्हणल्यार टॅक्सीकार तोंडाक येता तें भाडें घेतात. दुसरे वटेन प्रवाशांक हाड- व्हर करपी मोटारसायकल पायलटा विशीं मात कोणूच वायट उलयनात. येरादारी मळा वयल्या सगल्या वेवसायिकांनी तांचो आदर्श घेवंक जाय.
टॅक्सीकार म्हणटात, ‘गोंयांतले भोवतेक सगले वेवसाय थळाव्यांच्या हातांतल्यान गेल्यात. अॅपाच्या माध्यमांतल्यान हो वेवसायूय खाजगी कंपनींक दिवपाचो कांय फुडाऱ्यांचो डाव आसा. आमी रीण काडून गाडयो घेतल्यात. रेंट ए कारचो मुद्दो हाडून थोडे आमचे मदीं फूट घालपाक सोदतात. राज्यांतले धा हजारां परस चड टॅक्सीकार अॅपाक आक्षेप घेतले. अॅप आदारीत सेवेंत उत्तर भारतांतले ड्रायव्हर येवपाची शक्यताय आसा. सध्या ह्या वेवसायांत कांय वादग्रस्त लोक घुसल्यात. टॅक्सीचालक कसलीय बेकायदेशीर गजाल, गुन्यांव करता जाल्यार ताचेर सोमतीच कारवाय करची. पूण नीज गोंयकारांच्या हातांतलो हो वेवसाय काबार करचो न्हय.’
अॅप आदारीत सेवा सुटसुटीत आनी सवाय जायत जाल्यार, भोवतेक गोंयकार, पर्यटक तिचो वापर करतले. गोंयकारां कडेन 2- 2 गाडयो आसात ही गजाल खरी, पूण शॅर ए कॅब मेळत जाल्यार तिका फायदो जावं येता. तशें पळोवंक गेल्यार गोंयची बससेवा सध्या डळमळीत जाल्या. सण, आयतार, सुटयेच्या दिसांनी बशी बंद आसतात. खाजगी आनी कदंब बशींचो आंकडो खूबच देंवला. म्हणटकच अॅप टॅक्सींक वेवसाय मेळूं शकता. खास करून रातपाळी करपी कर्मचाऱ्यांचें गिरायक मेळूं येता. अपघातांचो आतां सगल्यांकूच भंय दिसपाक लागला, ताका लागून टॅक्सींक बरे दीस येवं येता. हेर सगल्या राज्यांनी अॅप आदारीत टॅक्सी सेवा लोकप्रीय आसा हें आमी विसरूंक फावना. सरकारान टॅक्सीकारांचो विचार करचोच, पूण ह्या वेवसायांतलो जो देव आसा (गिरायक) ताचोय विचार जावंक जाय. अॅप अॅग्रिगेटर सेवा चलोवप्यांक टॅक्सीकारांक 72 वरां भितर पयशे दिवचे पडटले, दिनात जाल्यार दिसाक 25 टक्के व्याज दिवचें पडटलें. 10 किलोमिटरांक 360 रुपया मेळटले. कांय वेव्हारीक गजालींक टॅक्सीकारांची हरकत आसा. तांच्या प्रस्नाक जापो दिवच्यो पडटल्यो.
अॅप अग्रिगेटराचेर टॅक्सी सेवा सुरू जातली, तेन्ना तातूंत गोंया भायले कितले ड्रायव्हर आसतले, ताचें स्पश्टीकरण सरकारी यंत्रणांक दिवचें पडटलें. प्रत्येक गजाल आवटसोर्स जाता आनी ताचो धपको गोंयकार वेवसायिकांक बसता, अशें बऱ्याच गोंयकारांक दिसता. तांचो तो समज पयस करपाक सरकारी यंत्रणांनी फुडाकार घेवंक जाय. तें तशें ना, ताचे पुरावेय दाखोवंक जाय. टॅक्सीकारांनीय आपले आड लोक जें कितें उलयतात, तें फट हें पटोवन दिवपाची गरज आसा. दुसरे वटेन, ‘रेंट ए कॅब आनी बायक रद्द करची. तांकां लागून अपघात वाडल्यात, तांच्या पार्किंगाक लागून जागो आडावता,’ अशें मंत्री मोन्सेरात म्हणटात. हो टॅक्सीकारां मदीं केस्तांवां लावपाचो प्रकार अशें कांय जाणांक दिसता. रेंट ए कॅबाचे धनी फायद्यांत आसात. एकेकल्या कडेन 25 ते 50 गाडयो आसात, अशेंय तांणी सांगलें. त्या गाडयांक परवाने कोणे दिले तर? खरें म्हणल्यार, सगल्या गोंयकार टॅक्सीकारांनी मेळून अॅप सुरू करपाक जाय आशिल्लो. ते खातीरची मजत करपाची तयारीय सरकारान फाटीं दाखयिल्ली. मात, टॅक्सीकार अजून परंपरीक पद्दतीच्या वेवसाय करपाचेरूच ठाम आसात. कित्याक तें तांकांच बेसबरें खबर आसतलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
