अस्वस्थ अमेरिका

भांगरभूंय | प्रतिनिधी

आपलो मेंदू वापरून, मेहनत करून तांणी अमेरिका वयर काडल्या. अर्थीक, तंत्रीक, विज्ञानीक नदरेन.

न्यू जर्सींतल्या न्यूआर्क विमानतळाचेर काल रातीं एका बेडी घाल्ल्या तरणाट्या भारतीय विद्यार्थ्याक हांवें पळयलो. तो व्हडल्यान रडटालो. पुलीस ताका गुन्यांवकार कशे वागयताले. तो कोणाक दुखापत करूंक येवंक नाशिल्लो, तर आपल्या सपनांचो फाटलाव करीत थंय पाविल्लो. एनआरआय म्हूण म्हाका असहाय्य कशें दिसलें. ही मानवी शोकांतिका – हो टिट्व केला कुणाल जैन ह्या इंडो- अमेरिकन उद्देजकान. संबंदीत घडणुकेचे व्हिडियो, फोटोय व्हायरल जाल्यात. तातूंत एक भारतीय तरणाटो जमनीर पडिल्लो दिसता. एक पुलीस ताचे फाटीर एक पांय दवरून उबो रावला आनी दुसरो ताका बेडी घालता. जैन हांणी भारतीय दुतावासाक टॅग करतकच तांणी चवकशी करून आपूण त्या विद्यार्थ्याक मजत करतां, अशें आस्वासन दिलां. हो विद्यार्थी चड करून शिक्षणा खातीर बेकायदेशीर पद्दतीन अमेरिकेंत गेला आसतलो. कारण ह्या प्रकारा उपरांत भारतांतल्या अमेरिकन दुतावासान हाची रोखडीच दखल घेतली. ‘आमचो देश व्हिसाचो गैरवापर, बेकायदेशीर प्रवेश कसोच सोंसून घेवचो ना. अमेरिकेंत कोणेच बेकायदेशीर प्रवेश केल्लो आमकां मान्य ना. कोण कायदेशीर मार्गान येता जाल्यार ताका येवकार.’
स्थलांतर हें संवसारभर जाताच. अमेरिकेक तें जाता, नोकरी, वेवसाया खातीर. अमेरिकन डाॅलराक चड मोल आनी बाजारपेठेंत वजन आशिल्ल्यान चडशे लोक अमेरिकेकूच वचपाक सोदतात. लोक झूज, हिंसाचार, धर्मीक वाद, सैमीक संकश्टां, रोजगार अशा साबार कारणांक लागून स्थलांतर करतात. अमेरिकेंत दोन वर्सां पयलीं उणेच अडेज लाख भारतीय विद्यार्थी आशिल्ले. बेकायदेशीर विद्यार्थ्यांचो आस्पाव हातूंत ना. सध्या अमेरिकेंत संवसारभरांतले मेळून 1 कोटी 10 लाख लोक बेकायदेशीर पद्दतीन रावतात. थोडे व्हिसा सोंपूनय रावल्यात. थोडे शिमो हुपून आयल्यात. बऱ्याच लोकांक राष्ट्राध्यक्ष डोनाल्ड ट्रम्प सरकारान जबरदस्तीन मायदेशांनी धाडल्यात. भारतीयांक पसून खाशेलें विमान करून धाडिल्ले. तांकां बेडयो घालून हाडिल्ल्यान फाटीं बोवाळूय जाल्लो. पोरूंचे आंकडेवारी प्रमाण, मेक्सिकोचे 45%, मध्य अमेरिकेचे (ग्वाटेमाला, होंडुरास, एल साल्वादोर, आफ्रिका खंड आनी आशियेचे (चीन, भारत, फिलिपीन्स, पाकिस्तान) दरेकी 15% टक्के बेकायदेशीर लोक अमेरिकेंत रावतात. हातूंत कांय जाण गुन्यांवकारी कारवायांनीय घुस्पल्यात. अमेरिकी प्रशासन कारवाय करता, पूण हो आंकडोच इतलो व्हडलो आसा की ह्या कामाक उशीर लागता. तातूंत तांची भुरगीं अमेरिकेंत जल्मल्ल्यान थंयचीं नागरीक जाल्यांत. पूण, आतां हो कायदो बदलिल्ल्यान हाचे मुखार थंय जल्मल्ल्यांक नागरिकताय मेळची ना. थळाव्या राज्यांच्या सरकारांक बेकायदेशीर नागरिकां विशीं सहानुभूती आसा. घडये मतां खातीर आसत. शिमांचेर कडक बंदोबस्त आसलो तरी हें जाता. आमच्या भारतांतूय बांगलादेश, नेपाळ, श्रीलंका, म्यानमार, अफगाणिस्तानांतलेय लोक रावतात. सुमार देड कोटी वयर. बऱ्याच जाणांक वळखपत्र, रेशनकार्ड, मतदान कार्डूय मेळ्ळां. तें कोणें दिलां आनी कित्याक हें सांगपाची गरज ना.
अमेरिकेक उठसूठ भारतीय वतात, ताचेर भारत सरकारान उपाय काडपाक जाय. कारण स्थलांतर करपी चडशे परत येनात. आयलेच जाल्यार निवृत्त जातकच. कूड थकतकच! आपलो मेंदू वापरून, मेहनत करून तांणी अमेरिका वयर काडल्या. अर्थीक, तंत्रीक, विज्ञानीक नदरेन. पूण, भारताचे उदरगती खातीर तांणी कितें योगदान दिलां? ते धाडटात तो पयसो सोडून? आयज हजारांनी इझ्रायली, भारतीय (खास करून दक्षीण भारतीय) अमेरिके खातीर घाम गळयतात. हेंच जर तांणी भारतांत रावन केल्लें जाल्यार आमचो देश कितलो वयर सरपाचो? चड पगार, उंचेलें राहणीमान आनी प्रतिश्ठा हीं थंय वचपा फाटलीं कारणां. तांकां तें हांगाच दिवपाचो यत्न जावंक जाय. हांगाचो भ्रश्टाचार, गैरकारभार, वशिलेबाजी हीं पसून स्थलांतराचीं कारणां.
स्थलांतरितांचेर कारवाय करपाच्या अमेरिकन सरकाराच्या निर्णयाचो लाॅस एंजिल्सांत हिंसक निशेध चालू आसात. तांचेर नियंत्रण मेळोवपाक खास पुलीस, लश्करी जवान तैनात केल्यात. तांचेर एक कोटी 34 लाख डाॅलर खर्च जाला. कितलोय व्हडलो हिंसाचार जालो जाल्यार पुलीस, निमलश्करी दळां तो हाताळटात. मात हांगा लश्करूच हाडलां. घडयें सरकारान हें सैमीक संकश्ट बी दिसलां आसतलें. पुलिसांनी हाॅटेलां, पब, घरांनी घुसून 121 जाणांक धरून व्हेल्यात. तांकां धरल्यात त्या वाठारांत चडशे लॅटीन अमेरिकन रावतात. फक्त लाॅस एंजिल्सूच न्हय, तर हेर कडेनूय सरकाराच्या ह्या निर्णयाक लागून लोकां मदीं खदखद आसा. सगलेच स्थलांतरीत कायद्यान गुन्यांवकार आसले तरी ते चोर, दरोडेखोर, बलात्कारी, खुनी, मवाली न्हय. तशें खंयच्याच राष्ट्रांत बेकायदेशीर पद्दतीन वचप समा न्हय. हाचे पयलीं अमेरिकेंत हिंसाचार जावंक ना, अशें ना. पूण ट्रम्प हांच्या निर्णयाक लागून हजारांनी लोक हिंसक जाल्ले दिसतात. भारतीय विद्यार्थ्याक आडवो उडोवन बेडयो घाल्यो, हो तातूंतलो एक प्रकार म्हणूं येता. पूण अटक करपाची ही पद्दत न्हय. आॅस्ट्रेलियेंतूय हालींच एका भारतीयाक ह्या वर्णदुस्वासी अहंकाराक सामकार वच्चें पडिल्लें.
स्थलांतरितां आडचे कारवायेची ही खदखद, अस्वस्थताय खंय मेरेन पावता तें रोखडेंच दिसतलें. बेकायदेशीर गजालीं आड उपाय घेवंक जायच, पूण ट्रम्प प्रशासनान आपणायल्या ती पद्दत चुकीची.