भांगरभूंय | प्रतिनिधी
जनमत कौल हो अस्मिताय दीस म्हूण सरकारी पांवड्यार फुडारांत मनोवचो ह्या थारावाक सगळ्या आमदारांनी तेंको दिल्ले कारणांन आमी तांचे उपकार मानतात. लोकशायेच्या हीताखातीर हें बरें पावल, अशें विरोध पक्ष फुडारी युरी आलेमांव हांणी सांगलें.
जनमत कौल हो अस्मिताय दीस म्हूण सरकारी पांवड्यार मनोवपाचें चालूच उरतलें, अशें आस्वासन मुख्यमंत्र्यान दिले उपरांत युरी आलेमांव हांणी पत्रकार परिशद घेतली. ह्या वेळार केपेंचे आमदार एल्टन डिकोस्टा आनी हळदोणेंचे आमदार कार्लुस फेरेरा हजीर आसले.
अस्मिताय दिसा संबंदांत राजकारण नाका अशें आमी सांगिल्लें. गोंयचे सगळे आमदार शाणे आसात आनी तांकां स्थितीची गांभीर्य कळ्ळां. जर अस्मिताय दीस नाशिल्लो जाल्यार गोंय नासपाचें, प्रमोद सावंत मुख्यमंत्री नासपाचे आनी आमी आमदार जावचे नाशिल्ले. हो दीस मनोवपाचें बंद करिनासतना फुडारांतूय तो मनयतले अशें आस्वासन मुख्यमंत्र्यान दिलां, अशें युरी हांणी सांगलें.
जर जनमत कौल जावंक नाशिल्लो आनी गोंय महाराष्ट्रांत विलीन जाल्लें जाल्यार गोंय एक जिव्हो आसतलो आशिल्लो. फक्त 1 आमदार आनी 1 खासदार गोंया खातीर मेळपाचे. हो इतिहास आयजे भुरगे आनी फुडले पिळगेक उगडासांत उरचो हे खातीर हो दीस अस्मिताय दीस म्हूण दर वर्सा मनोवपाची गरज आसा, अशें युरी हांणी मागलें.
16 जानेवारी 1967 ह्या दिसा जनमत कौल जावन गोंय वेगळें जालें हे खातीर गोंयाक घटक राज्य आनी कोंकणीक राजभाशेचो दर्जो मेळ्ळो. पंडीत जवाहरलाल नेहरू, इंदिरा गांधी, पुरुषोत्तम काकोडकार, जॅक सिक्वेरा, शाबू देसाय, रवी नायक हांचें खूब योगदान ह्या दिसां खातीर आसा. तेन्ना मगो पक्ष सत्तेंत आशिल्लो आनी जॅक सिक्वेरा हांचो युगो पक्ष विरोधांत. काँग्रेस तेन्ना विधानसभेंत नासलीच. पूण तरीय काँग्रेसीचे फुडारी पुरुषोत्तम काकोडकार हांणी राजकी मतभेद विसरून जॅक सिक्वेरा हांचे वांगडा जनमत कौलाचे चळवळींत वांटेकार जाले, अशें युरी हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
