भांगरभूंय | प्रतिनिधी
मुख्यमंत्री डॉ. प्रमोद सावंत हांचें विधानसभेंत आस्वासन
भांगरभूंय । प्रतिनिधी
पणजीः आदले मुख्यमंत्री मनोहर पर्रीकार हांणी सगळ्यांत आदीं जनमत कौल दीस सरकारी पांवड्यार मनोवपाक सुरवात केल्ली. मदलो कांय काळ तातूंत खंड पडलो. अशें आसलें तरीय हे मुखार हो दीस सरकारी पांवड्यार मनयतले, अशें आस्वासन मुख्यमंत्री डॉ. प्रमोद सावंत हांणी दिलें. शुक्रारा विधानसभेंत ते विरोधी पक्ष फुडारी युरी आलेमांव हांणी मांडिल्ल्या खाजगी थारावाचेर उलयताले.
भारत स्वतंत्र जाले उपरांत गोंय मुक्तीक 14 वर्सां लागलीं. आपूण 18 जून क्रांती दीस, 19 डिसेंबाक मुक्ती दीस मनयतात. आपूण मुख्यमंत्री जाले उपरांत 30 मे हो घटक राज्य दीस म्हूण मनोवपाक सुरवात केली. आदले मुख्यमंत्री मनोहर पर्रीकार हांणी सगळ्यांत आदीं 16 मे 2018 ह्या दिसा सरकारी पांवड्यार अस्मिताय दीस मनयल्लो. विरोधकांक लेगीत ह्या दिसाचो उगडास जावपाक 60 वर्सां लागलीं. सगळ्यांत आदीं भाजप फुडाऱ्यांनीच हो दीस मनयलो, अशें मुख्यमंत्री डॉ. सावंत हांणी सांगलें.
मुख्यमंत्र्यान फुडें सांगलें, गोंय महाराष्ट्रांत विलीन जाल्लें जाल्यार घडये आयज सभाघरांत उपस्थीत आशिल्ले आमदार पंच लेगीत जावचे नाशिल्ले. गोंय हो महाराष्ट्रांतलो एक जिल्हो जावपाचो. गोंय मुक्ती खातीर 15 ऑगस्ट 1955 ह्या दिसा व्हड यत्न जाल्लो. हो दीस लेगीत उगडास दवरप गरजेचें आसा. आमी पिंटो, दीपाजी राणे हांचें बंड तशेंच कुठ्ठाळीचें बंड हांकां अधिकृत मानवंदना दिवपाक सुरू केल्या. आमच्या सरकारान हिरवे गुरुजी स्मारक बांदलां. पत्रादेवी स्मारकाचें 19 डिसेंबराक उक्तावण कररतले. गोंय मुक्तीक 63 वर्सां जालीं तरी लेगीत गोंयच्या इतिहासाची, अस्मितायेचो उगडास लेगीत नाशिल्लो. हो दीस मनोवपाचें मनोहर पर्रीकार हांणी मान्य केलें. आदीं फुलाचेर मत मारा अशें म्हणप्यांनी उपरांत पानाचेर मत दियात अशें सांगलें. तातूंतल्या खूबश्या लोकांक आपूण मेळ्ळा. तांकां गोंयचे स्वतंत्र अस्तित्व आसप गरजेचें आसा, हें कळिल्लें, अशें मुख्यमंत्र्यान सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
