भांगरभूंय | प्रतिनिधी
कालची पत्रकारिता, फाल्यांची पत्रकारिता परिसंवादांतलो सूर
भांगरभूंय । प्रतिनिधी
पणजी : आयची पत्रकारिता खुबूच बदलल्या. कांय वर्सां पयलीं छापील पत्रकारिता वा दिसाळ्यांचें वर्चस्व पत्रकारितेचेर आशिल्लें. आतां दुरचित्रवाणी, इंटरनॅट आनी सोशल मिडियाचें आव्हान छापील पत्रकारिते मुखार आसा. दिसान दीस वाचपाची संवय उणी जायत आसा. अशें आसून लेगीत समाजाचे प्रस्न मांडपा सयत अस्मिताय तिगोन दवरपा खातीर दिसाळ्यांची गरज आसा. जमीन हो आतां अस्मितायेचो प्रस्न जाला, असो सूर पत्रकारिते विशीं च्या परिसंवादांत मानेस्तांनी उक्तायलो. लक्ष्मीदास बोरकर जल्मसती समारोह समिती, गोंय श्रमीक पत्रकार संघटणा आनी इन्स्टिट्यूट मिनेझीस ब्रागांझा वतीन परिसंवाद जालो.
पत्रकार राजू नायक, संदीप केरकार, किशोर नायक गांवकार, नीरज नायक, विजय डिसोझा आनी फ्रेड्रिक नोरोन्हा ह्या पत्रकारांनी परिसंवादांत वांटो घेतलो.
गोंय विद्यापीठाचे कुलगुरू प्रो. हरिलाल मेनन हांचे हस्तुकी कार्यावळीचें उक्तावण जालें. ह्या वेळार यतीन हेगडे देसाय, गुरूदास सावळ, वामन प्रभू हे मानेस्त हाजीर आशिल्ले.
अस्मितायेचो प्रस्न फकत भाशे पुरतो मर्यादीत ना. जमीन तिगोवन दवरप हो लेगीत अस्मितायेचो प्रस्न आसा, अशें राजू नायक हांणी सांगलें.
इंग्लीश दिसाळ्या मुखार खूब आव्हानां आसात. बातम्यांचें संपादन करपा खातीर डेस्काचेर कर्मचारी वर्ग मेळप कठीण जाता, अशें विजय डिसोझा हांणी सांगलें.
सोशल मिडिया ही हत्यारा सारकी आसा. ताचो कसो वापर करप हे दर एकल्याचेर निंबून आसा, अशें फ्रेंड्रिक नोरोन्हा हांणी सांगलें.
आयज वाचप खूब उणें जालां. हाका लागून सोशल मिडियांनी दिसाळ्यां मुखार आव्हान निर्माण केलां, अशें नीरज नायक हांणी सांगलें. दूरचित्रवाहिन्यांक लेगीत प्रशिक्षीत मनीसबळ मेळना. दिसभर कसल्यो बातम्यो दिवच्यो, हो लेगीत प्रस्न आसता, अशें संदीप केरकार हांणी सांगलें. गोंयचे लोक कोंकणी उलयतात मात ते वाचतात मराठी. इंग्लीश ते वाचतात तरी तांचे प्रस्न मराठी दिसाळी मांडटात. ही एक विचित्र स्थिती आसा. हातूंतल्यान मार्ग काडपाचे आव्हान आशिल्ल्याचे किशोर नायक गांवकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
