भांगरभूंय | प्रतिनिधी
घरकाराक मरण, घरकान्न हॉस्पिटलांत
भांगरभूंय । प्रतिनिधी
म्हापशें : अस्नोड्यां प्रवासी बशीचो दुचाकीक धपको बशिल्ल्यान दुचाकी चालक लक्ष्मीकांत शेटकार (44. रा. घोटेला, केरी सत्तरी आनी मूळ खोर्जुवें बार्देस) हाका मरण आयलें. जाल्यार तांची घरकान्न स्मृती शेटकार गंभीर जखमी जाल्या. तिचेर जीएमसींत उपचार चालू आसात.
हो अपघात शुक्रारा 2 जानेवारीक सकाळीं 7.45 वरांच्या सुमाराक अस्नोडेंच्या खेळां संकुला लागसारच्या कपेला कडेन जालो. दुचाकी चालक लक्ष्मीकांत शेटकार आपले घरकान्नी वांगडा मोटरसायकली (जीए 03 एक्यू 1805) वयल्यान म्हापशें सावन दिवचलचे दिशेन वतालो. जाल्यार वाळपय ते पणजी मार्गा वयली प्रवासी बस (जीए 03 एन 6019) उरफाटे दिशेन येताली. अपघाताचे सुवातेर दोनूय गाडयो पावल्यो तेन्ना बशीचो दुचाकीक धपको बसलो. ह्या धपक्यात दुचाकी वयलें शेटकार जोडपें रस्त्याचेर शेंवटून पडलें आनी जखमी जालें. तांकां ताकतिकेन म्हापशेंच्या जिल्हो हॉस्पिटलांत व्हेलीं. थंय दोतोरांनी लक्ष्मीकांत शेटकार हांकां मरण आयिल्ल्याचें घोशीत केलें. जाल्यार जखमी स्मृती शेटकार हिका जीएमसींत फुडल्या उपचारा खातीर धाडली.
कोलवाळचे पुलीस हवालदार हरीश रेडकार हांणी पंचनामो केलो आनी दोनूय गाडयो रस्त्याचे कुशीक काडून येरादारीक वाट मेकळी केली. ह्या प्रकरणांत बस चालक तुकाराम सावंत (रा. माशेल) हाका ताब्यांत घेतला. पुलिसांनी ह्या अपघाताक कारण थारिल्ल्या बस चालका आड गुन्यांव दाखल केला. फुडलो तपास पुलीस निरिक्षक संजीत कांदोळकार हांच्या मार्गदर्शना खाला उपनिरिक्षक विष्णू जाधव करता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
