भांगरभूंय | प्रतिनिधी
4.2 किमिच्या व्हाळशी बायपास रस्त्याचें उक्तावण
भांगरभूंय । प्रतिनिधी
दिवचलः गोंया खातीर आधुनीक उदरगतीचो मार्ग उक्तो जातना गुंतवणूक वाडोवपा खातीर उद्देगीक क्रांती खातीर हरीत उद्देगाक चालना दिवपा वांगडाच मुळावी बांदावळ घटमूट करपाचेर आमचें लक्ष आसा. तेच खातीर अस्नोडें ते मुळगांव बायपास आनी उसप- आमठाणे ते मोपा बायपास रस्त्यांचें काम रोखडेंच सुरू करतले. दिवचल बायपास रस्तो उण्या वेळांत पुराय जाला. ताचो उपेग उद्देगीक मार्ग म्हणून आनी शारी येरादारी सुविधा खातीर जातलो, अशें मुख्यमंत्री डॉ. प्रमोद सावंत हांणी सांगलें.
4.2 किमि लांबायेचो, 70 कोटी रुपया खर्च करुन व्हाळशी ते सर्वण मेरेनचो चारपदरी बायपास रस्तो 500 दिसांच्या विक्रमी काळांत पुराय जालो. बिरेस्तारा ह्या रस्त्याचे मुख्यमंत्री डॉ. सावंत हांचे हस्तुकीं उक्तावण जालें. ह्या वेळार आमदार डॉ. चंद्रकांत शेट्ये, आमदार प्रेमेंद्र शेट, नगराध्यक्ष कुंदन फळारी, उपजिल्लोधिकारी रमेश गांवकार, दीपा पळ, प्रधान मुखेल अभियंतो उत्तम पार्सेकार, मुखेल अभियंतो अॅलेन परेरा, सचीन देसाय आनी हेर मानेस्त हाजीर आशिल्ले. राज्यांत गुंतवणूक वाडयतना जायत्या जाणांक वैजकी, शिक्षणीक, गांवगिऱ्या पर्यटनांत रूची आसा, उद्देगीक क्रांती खातीर आमचे जायते प्रकल्प आसात, हाचे खातीर बऱ्यो सुविधा दिवपाचेर सरकारान भर दिला, अशें मुख्यमंत्र्यान सांगलें. दिवचल म्हालांत वेगवेगळ्या माध्यमांतल्यान उदरगत जायत आसा. नवीन बस स्टॅण्ड, उजो पालोवपी दळ बांदपाचें काम बेगिनूच पुराय करतले, अशेंय मुख्यमंत्र्यान सांगलें.
हायवे कोयर मुक्त दवरात
गोंयांतल्या खूबश्या सुवातांनी म्हामार्गां लागसार कोयर उडयतात हाची जाणीव लोकांक आसपाक जाय. कोयर विलो लावपा विशीं खर कारवाय करपा खातीर सरकार खाशेली येवजण आंखता. हायवे कोयर मुक्त दवरचो, असो उलो मुख्यमंत्र्यान मारलो.
सरकारी सुवातींनी अतिक्रमण केल्यार खबरदार
कांय लोक सरकारी मालकीचे जमनीचेर अतिक्रमण करून बेकायदेशीर बांदकाम करतात, हें लोकांनी रोखडेंच बंद करचें. सरकारी जमनींनी सरकार बरें प्रकल्प उद्देग हाडून रोजगार आनी हेर उदरगतीक चालना दितले, अशें मुख्यमंत्री सावंत हांणी स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
