भांगरभूंय | प्रतिनिधी
मुख्यमंत्री : शेतकारांचे मागणे प्रमाण केली बायपास रस्त्याची पळोवणी
भांगरभूंय । प्रतिनिधी
म्हापशें : अस्नोडेंच्या बायपास रस्त्याचेर आनीक तीन ते चार सांकव (बॉक्स कलव्हर्ट) बांदतले. तशेंच न्हंय सयत व्हांळांतलो चिखल उसपतले. जे वरवीं पावसाचें उदक सहजतायेन व्हांवून वतलें, अशें आस्वासन मुख्यमंत्री डॉ. प्रमोद सावंत हांणी थळावे शेतकार आनी पंचायत मंडळाक दिलें.
सोमारा सकाळीं मुख्यमंत्र्यान मंत्री निळकंठ हळर्णकार हांचे वांगडा ह्या बायपास रस्त्याची पळोवणी केली. ह्या वेळार सरपंच मेघश्याम चोडणकार, उपसरपंच सपना मापारी, पंच सुषमा मालवणकार, प्रितम नायक, फ्रान्सिस वाझ, यशवंत साळगांवकार, तशेंच भौशीक बांदकाम खात्याच्या राष्ट्रीय म्हामार्ग प्रादिकरणाचे मुख्य अभियंते ज्यूड कार्व्हावो आनी शेतकार वर्ग हाजीर आसलो.
सरकारान 130 कोटी रुपया खर्च करून हातांत घेतिल्ल्या ह्या बायपास रस्त्याचेर अस्नोड्यां शेत जमनीर फकत एकूच व्हड सांकव दवरिल्लो. ताका लागून पावसाच्या उदकाचो योग्य विलो जावचो ना आनी शेतजमीन उदका पोंदा वतली, असो दावो शेतकारांनी केलो. ह्या बायपास रस्त्याचेर आनीक तीन सांकव बांदचे, अशी मागणी पंचायत तशेंच थळावे आमदार तशेंच मंत्री निळकंठ हळर्णकार हांचे कडेन केल्ली. ते प्रमाण मुख्यमंत्र्यान बायपास रस्त्याची पळोवणी केली आनी प्रत्यक्षांत शेतकारांची नेमकी समस्या कितें आसा ती समजून घेतली. भौशीक बांदकाम खात्याच्या अधिकाऱ्यांक आनीक सांकव बांदपाचे तांणी आदेश दिले. तशेंच ह्या बायपास रस्त्याक आडखळ थारपी एका धनगर समाज भावाचें घर मोडचें पडलां, ताका लागुन त्या कुटुंबाचें कोमुनिदादच्या प्लॉटांत पुनर्वसन करचें, अशेय निर्देश तांणी अधिकाऱ्यांक दिले.
हो रस्तो जाले उपरांत अस्नोडेंकारांक व्हड थाकाय मेळटली. येरादारी सुरळीत जावन अस्नोडें बाजारांतली येरादारीची कोंयडी उणी जातली. हो रस्तो वेळा भितर पुराय जावचो हे खातीर लोकांनी आदार करचो, असो उलो मुख्यमंत्र्यान ह्या वेळार मारलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
