भांगरभूंय | प्रतिनिधी
अलका सिन्हाः इन्स्टिट्यूट मिनेझीस ब्रागांझाच्या भोवभाशीक महिला साहित्य संमेलनाचें उक्तावण
भांगरभूंय । प्रतिनिधी
पणजीः देवान अस्तुरेक रचनात्मक गूण दिला. चपाती करतना लेगीत तिचो रचनात्मक गूण दिसता. तिचे साहित्य रचनेंत तिचे जिणेची काणी दिसता. दुख्ख, कश्ट, संघर्शाची भास आसना. साहित्य काळजाक स्पर्श करता, अशें राष्ट्रीय नाममेची साहित्यीक अलका सिन्हा हांणी सांगलें.
इन्स्टिट्यूट मिनेझीस ब्रागांझा (आयएमबी) वतीन शेनवारा संस्थेच्या सभाघरांत भोवभाशीक महिला साहित्य संमेलन जालें. त्या वेळार सिन्हा अध्यक्षपदा वयल्यान उलयताली. ह्या संमेलनाचें उक्तावण मुखेल सोयरे म्हूण हाजीर आशिल्ले कला आनी संस्कृती संचालनालयाचे संचालक सगुण वेळीप हांचे हस्तुकीं जालें. ह्या वेळर माचयेर संस्थेचे अध्यक्ष तशेंच ज्येश्ठ कवी दशरथ परब, वांगडी सचीव गोरख मांद्रेंकार, समन्वयक कालिका बापट, आशा गेहलोत आनी सत्कारमुर्ती हाजीर आशिल्ले.
माया खरंगटे, अंजली आमोणकार, डॉ. वृषाली मांद्रेंकार आनी डॉ. इजाबेल वाझ ह्या लेखिकांचो तांच्या साहित्य मळा वयल्या योगदाना खातीर सोयऱ्यांचे हस्तुकीं विशेश भोवमान केलो.
सगुण वेळीप हांणी सांगलें, साहित्याची समिक्षा ही काळाची गरज आसता. जें बरयतां तें प्रामाणीकपणान, समर्पीत वृत्तीन केलें जाल्यार ताचें फळ मेळटा. आपल्या येसांत हेरांचोय वांटो आसा, ही भावना म्हत्वाची आसता, कारण हेरां पासून आमी प्रेरणा घेतात.
‘साहित्य समिक्षा काळाची गरज’ ह्या विशयाचेर डॉ. वृषाली मांद्रेंकार हांचे अध्यक्षते खाला जाल्ले गट चर्चेंत लेखकांनी पूरक अशे विचार मांडले. तातूंत गूण दोशां सयत समतोल समिक्षा जावपाक जाय असो सूर व्यक्त जालो.
प्रा. राजश्री सैल हांणी सांगलें, कलाकृतीची योग्यता सांगपी गूण दोशां सयत समिक्षा जावप गरजेचें आसा. साहित्यकृती कडेन पळोवपाचे वेगवेगळे आयाम समिक्षा दिता. वाचकांची अभिरुची गिरेस्त करप, हें लेगीत समिक्षकांचें काम आसता. आयचे समिक्षक सुरक्षीत कवचांत रावून समिक्षा करतात. कोंकणींत बरी समिक्षा जल्माक येवपाची आसा, अशें तांणी सांगलें.
डॉ. ग्लेनीस मेंडोंसा हांणी सांगलें, समिक्षा साहित्याचो दर्जो थारायता. समिक्षकाक साहित्याची बरी जाण आसपाक जाय. समिक्षा जाल्लें साहित्य वाचक उमळशीकेन वाचतात, ताचो अणकारूय जाता. योग्य समिक्षे वरवीं साहित्य कृतींत लिपिल्ल्या गजालींचेर उजवाड घालपाक जाय.
डॉ. स्नेहा म्हांबरे हांणी सांगलें, साहित्याची उंचाय वाडोवचे खातीर साहित्याची समिक्षा खूब गरजेची. आमचे कडेन समिक्षा ही भायल्यान येवंक ना, ती आदीं पासून चलत आयल्या. साहित्यांतलीं सौदर्यथळां, मापदंड सोदप समिक्षकांचें काम आसा.
डॉ. वृषाली मांद्रेंकार हांणी सांगलें, हिंदींत सुरवेक सावन समिक्षा चलत आयल्या आनी बरी समिक्षा करतात. समिक्षा साहित्याक स्थापीत आनी विस्थापीत लेगीत करता. आयज समिक्षा दिवप- घेवप तत्वाचेर करतात. बरी समिक्षा लेखनाक दिशा दिता, मार्गदर्शक थारता. समिक्षा समतोल आसपाक जाय, फकत दोशांचेर बोट दवरपी आसपाक जायना. गट चर्चेचें संचालन आनी संमेलनाचें प्रास्तावीक डॉ. आशा गेहलोत हांणी केलें. दशरथ परब हांणी येवकार दिलो. गायत्री पाटील हांणी गायिल्ल्या स्तवनान कार्यावळीक सुरवात जाली. डॉ. लता नायक हांणी सुत्रसंचालन केलें. गोरख मांद्रेंकार हांणी उपकार मानले.
भोवभाशीक कविसंमेलन रंगलें
समारोप सुवाळ्यांत भोवभाशीक कविसंमेलन रंगलें. तातूंत अंकिता गांवस आनी सारिका नायक हांणी कोंकणी, पौर्णिमा केरकार, प्रा. नीता तोरणे आनी राधा भावे हांणी मराठी, सिंधू असोल्डेंकार हांणी हिंदी जाल्यार प्रा. आदिती बर्बे हांणी इंग्लीश कविता सादर केली. अध्यक्षपदार अलका सिन्हा आशिल्ली. ‘मेरा पासपोर्ट के कागजपर लिखा नाम पर नही है मेरा देश, देश के भीतर मैं रहती हूँ, मै और मेरे भीतर रहता है देश…’ ह्यो तांच्यो वळी थेट काळजाक लागल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
