अस्तुरी दीस परत परत घडून येवंचो

भांगरभूंय | प्रतिनिधी

…. तरी वयर उल्लेख केला त्या अस्तुऱ्यांनी मागाशिल्ल्या, गरीब, अशिक्षीत, गरजेवंत अस्तुऱ्यां खातीर जायतें कितें करूंक जाता.

कांय दीस आदीं आमी गोंयभर आनी भारतभर अस्तुऱ्यांचो दीस मनयलो. ह्या दिसा अस्तुऱ्यांचो भोवमान जालो, तांच्या सशक्तिकरणा विशीं भाशणां जालीं, तांचे भलायके विशीं हुस्को परगटायलो, तांचे खातीर नव्या येवजणांची आंखणी जाली. तो दीस सोंपलो आनी आमी सगळीं परत आमच्या वावराक लागलीं. ही मनशाची जिणेंशैली जरी आसली जाल्यार पासून मनीस आपल्या कर्तव्या पासून पयस रावूंक शकता? आनी भोव करून अस्तुरी? ती जितली उत्साहांत सहभागी जाता तितलीच कर्तव्यनिश्ठ, सेवासंपन्न आनी कर्तुत्वी आसता. आयज ती एके वटेन दादल्याक खांद्याक खांद लावून मुखार वता जाल्यार दुसरे वटेन तिका फाटीं ओडपाचेंय काम जायत आसा, तिचेर अत्याचार जावपाचेंय काम फाटीं ना. समाजांत अशें दुतर्फी कर्तूब कित्याक घडटा?

वास्तवीक परिस्थिती

आमच्या गोंयांत आनी भारतांत शिक्षीत तसोच अशिक्षीत महिला वर्ग आसा. हिंदू, मुस्लीम आनी क्रिस्तांव अशी तांची मुखेलपणान वर्गवारी आसा तरी जण एकल्याक आपापलो धर्म फुडें व्हरपाचें स्वातंत्र्यूय आसा. अशें आसतना कांय समाजकंटक ह्या सलोख्यांत, एकचारांत फुटी घालपाचो वावर करतात. गोंयांत अस्तुरी सुरक्षीत ना हे विशीं  गोंयच्यो अस्तुरी- फुडारी जायते पुरावे दितात. चली भुरग्याक उबारून व्हरपाचे प्रकार घडटात.  अस्तुरी म्हणल्यार एक वस्त कशी तिचें शोशण जाता तें थांबोवंक जाय. कसलोय एक व्हड उत्सव जाता, देखीक कार्नावाल, थंय अस्तुऱ्यांक कितें म्हूण दाखयतात? तांचे कपडे कसले आसतात आनी तशेंच ते कित्याक आसतात? कांय कडेन ‘बीच व्हाॅलिबाॅल’ खेळ जाता, थंय दादल्यांचे कपडे कसले आसतात आनी अस्तुऱ्यांचे कपडे कसले आसतात? भलायके क्षेत्रांत हॉस्पिटलांनी व्हडल्यो लायनी आसतात त्यो अस्तुऱ्यांच्यो, अशें कित्याक? 

अस्तुरी ही प्रदर्शनाची वस्त अशें कांय लोक चुकीची धारणा करून आसा. हे खातीर राजकारणांत फुडारिल्ल्या अस्तुऱ्यांनी अस्तुऱ्यांचें कवच जावपाची गरज आसा.  कांय दीस आदीं मडकयची मनिशा उसगांवकार हिचें अस्तुरी दिसा निमतान जाल्लें उलोवप आयकलें. तिचे भशेन जायत्यो धडाडीच्यो अस्तुऱ्यो आसात, पूण त्यो उलोवंक सोदिनात. बरें जाता थंय सगळीं आसतात, पूण वांकडें घडटा थंय जो आवाज काडटा ताका वालोर आसता, हें काम मनिशान केलां. सरकारा विरुद्ध उलोवप म्हणल्यार व्हडलें काम न्हय तर अत्याचारा आड उलोवप हें खूब म्हत्वाचें काम आसता. कितल्या अस्तुऱ्यांचे गोंयांत खून जाल्यात, कितल्या जाणांनी आत्महत्या केल्या, कितलीं जाणां मनोरुग्णालयांत आसात, हो एक प्रकारचो छळूच न्हय? हाका तोंड दिवंक अस्तुऱ्यांनी फुडाकार घेतलो जाल्यार वास्तवांत अस्तुरी सशक्त जावंक शकता.

एक देख

हालींच आखाती देशांतल्या झुजांत इराणाचो फुडारी खामेनेई हाका मारलो तेन्ना इराणांत कांय अस्तुऱ्यांनी शोक पाळ्ळो जाल्यार कांय अस्तुऱ्यांनी खुशालकाय मनयली. आमच्या भारतांतूय हें पळोवंक मेळ्ळें.  हाचें कारण तो अस्तुऱ्यांचो राखणदार आशिल्लो. अस्तुऱ्यांनी कपड्यां वरवीं लेगीत आपली पवित्रताय सांबाळची अशी ताची भुमिका आशिल्ली. तो सत्तेर आयलो तेन्ना ताणें ‘मोरालिटी पुलीस’ म्हणल्यार नैतिकता तपासपी पुलीस फोर्स निर्माण केलो आनी ज्यो अस्तुऱ्यो हिजाब घालिनात तांचेर कारवाय करपाचो तांकां अधिकार दिलो. हे खातीर कांय अस्तुऱ्यांक ताणें आपलें स्वातंत्र्य काडून घेतलें अशें दिसलें. अस्तंती तरेन न्हेसप ना, पांयांक ‘हिल्स’ आशिल्ले मोचे घालप नात, आंग नीट धांपिल्लें आसूंक जाय अशे जायते निर्बंध घाल्ल्यान आपणाक धर्माच्या नांवान बंदिस्त केल्यांत असो आरोप आशिल्लो म्हणून ह्या विचारांच्या अस्तुऱ्यांनी इराण देसान चाळीस दिसांचो शोक जाहीर केल्लो आसतनाय खुशालकाय मनयली. ज्या अस्तुऱ्यांनी खामेनेईच्या मरणाचेर खुशालकाय व्यक्त केली हीं पिशेपणां काय? 

अस्तुरी खंय आसा?

आमच्या गोंयांत पयलेच पावट गुलाबी रंगाची रिक्षा पळेली. ते आदीं गुलाबी रंगाच्यो जायत्यो पुलीस गाडयो पळेल्ल्यो तेन्ना ह्यो अस्तुरी पुलिस खात्याच्यो गाडयो म्हूण कळिल्लें, म्हणून ती रिक्षा अस्तुरेचो म्हूण समजलें. रिक्षा चलोवप हें दादल्यांचें पारंपरीक काम, पूण तें अस्तुरेच्या हातांत आयलें, हाचो अर्थ बेकारी. अस्तुरेक फावो तशी नोकरी ना. कांय जण बसीचेर तिकेट कातरपाचें काम करतात. ऑफिसांनी वावुरतालीं इतलें पासून बरें आशिल्लें, पूण अस्तुऱ्यांनी असलें अवघड काम करूंक फुडें सरप म्हणल्यार तांकां शाबासकी दिवप काय समाजाची विकृताय मानप? आयज गोंयांत जायत्यो बिगरगोंयकार अस्तुऱ्यो वावर करतात.  तीं पोटा खातीर हांगा आयल्यांत, पूण तांच्या भुरग्यांचें कितें? तरनाट्यो अस्तुऱ्यो आपल्या भुरग्यांक फाटीर मारून वावुरतात, तांकां पळोवन दोळ्यांत दुकां भरतात. वेळ उदेवंचे आदीं सारण घेवन रस्तो नितळ करतात तेन्ना तांचीं भुरगीं घरांत कितें करतात आसतलीं? आदीं गोंयच्यो अस्तुऱ्यो ह्या कामांत आशिल्ल्यो, कितें परिस्थिती ही अस्तुऱ्यांची? वाडिल्लीं चेडवां रस्त्या नाक्यांचेर हातांत येता तें विकूंक लोका मुखार हात फुडें करतात, हें कशें सोंसपाचें? कितलीं चेडवां ‘सेल्स गर्ल्स’ म्हण पांच- स हजारांची लेगीत नोकरी करतात, त्या थोड्यांचो पगार येवपा- वचपाकूच काबार जाता, तांचें कितें? म्हणून अस्तुऱ्यां खातीर आशिल्ल्यो सरकाराच्यो कांय येवजणो असल्या गरजेवंतांक पावूंक जाय.

वेवसायीक पदवेदार अस्तुऱ्यो

गोंयचीच गजाल घेतल्यार, जायत्यो अस्तुऱ्यो वेवसायांत आसात.  तांच्या हातांत भरपूर पयसो घोळटा. राजकारणांतूय जायत्यो अस्तुऱ्यो कार्यरत आसात, तांचे कडेन सत्ता आसा. जायत्यो अधिकाराचेर आसात, तांचे कडेन पदवी आसा.  न्यायपालिकेंत जायत्यो अस्तुऱ्यो आसात, वकील आसात, तांकां जायतें गिन्यान आसा. आयज जायत्यो अस्तुऱ्यो समाज- फुडारी म्हूण कार्यरत आसात.  ह्या सगळ्यांनी मेळून अस्तुऱ्यांचें चित्र बदलूंक जाता. आमी दादलो प्रधान समाजांत जगतात, तरी वयर उल्लेख केला त्या अस्तुऱ्यांनी मागाशिल्ल्या, गरीब, अशिक्षीत, गरजेवंत अस्तुऱ्यां खातीर जायतें कितें करूंक जाता. कांय वेळार अस्तुरीच अस्तुरेचेर सोशण करता, अत्याचार करता असो आरोप जाता, हें बंद करुंकूय वयर उल्लेखिल्ल्या अस्तुऱ्यानींच फोलेर जावंयेता.

सोंपयतना…

क्रिस्ती पवित्र पुस्तकांत वायट रस्त्यांचेर चलिल्ल्या कांय अस्तुऱ्यांच्यो देखी मेळटात. कांय जण देवाची शिकवण मेळटकच सुदारल्यात तेंय दाखयलां. आमच्या समाजांतूय वांकड्या रस्त्यार आशिल्ल्या अस्तुऱ्यांनी नैतीक शिकवणे वरवीं आपलो मार्ग बदलूंक जाय. एके अस्तुरेक लागून सगळ्या अस्तुऱ्यांचें नांव घाण जाता अशें कर्म करतल्यांनीय हें लक्षांत दवरूंक जाय. असल्या शिक्षणा खातीर अस्तुरी दीस मनोवप सामकें गरजेचें आनी हो दीस जाता जाल्यार ह्या ना त्या निमतान परत परत घडून आयल्यार कांय चुकी, गैरसमज, चुगल्यो करप, आदी गजाली पयस दवरूंक खूब फायद्याचें जातलें. अस्तुऱ्यांक आमचो सलाम!

—- 

– विन्सी क्वाद्रूस, राय, साश्ट, 

मो. – 9822587498