अस्तुरीचो करुया सन्मान

भांगरभूंय | प्रतिनिधी

भारताचे प्रगतींत बायलांचें अमुल्य योगदान आसा. सावित्रीबाई फुले (शिक्षण), सरोजिनी नायडू (स्वातंत्र्य संघर्श), किरण मझुमदार-शॉ (बायोटेक), सुधा मूर्ती (कॉर्पोरेट/ सोशल), टेसी थॉमस (संरक्षण) ह्या सारक्या बायलांनी शिक्षण, समाजीक सुदारणा, राजकारण, विज्ञान, उद्देगधंद्यांत नवे योगदान दिलां. इंदिरा गांधी, सुमित्रा महाजन, प्रतिभा पाटील, सुषमा स्वराज, सुप्रिया सुळे, जयललिता, ममता बॅनर्जी अश्या जायत्या फुडाऱ्यांनी आपूण करता, त्या वावराचेर आपली छाप सोडल्या.
भारतीय बायलां खेळगड्यांनी खेळां मळार अपवादात्मक कामगिरी करून संवसारीक पांवड्यार देशाक अभिमान बाळगला. मॅरी कोम (बॉक्सिंग), पी. व्ही. सिंधू (बॅडमिंटन), सायना नेहवाल (बॅडमिंटन), मिताली राज (क्रिकेट) अश्या बायलांनी खूब नामना जोडल्या. तशेंच भारतांत विज्ञानाच्या मळार बायलांचें म्हत्वाचें योगदान आसा. आनंदीबाई जोशी (पयली बायल दोतोर), असीमा चॅटर्जी (रसायनशास्त्र), कल्पना चावला (अंतरिक्षयात्री) ह्या सारक्या जायत्या बायलांन एसटीईएम (विज्ञान, तंत्रज्ञान, अभियांत्रिकी, गणित) मळार म्हत्वाचें योगदान दिलां. ह्या बायलांनी पिळग्यांक प्रेरणा दिल्या आनी भारताची घडणावळ करपाक म्हत्वाची भुमिका साकारल्या, हें आमी विसरुंक जायना.
आयज आमकां स्वातंत्र्य मेळून 78 वर्सां पुराय जातात. आमी स्वतंत्र देशांत रावतात हाचो आमकां दर एकल्याक व्हड अभिमान आसा. दर वर्सा आमी स्वातंत्र्याचो दीस व्हड उमेदीन मनयतात. आनी हाच्या फुडेंय मनयत रावतलीं हातूंत दुबाव ना. पूण दुर्दैवान म्हणचें पडटा की स्वातंत्र्या उपरांत लेगीत आमी मुक्त आसून लेंगीत दर दिसा जेन्ना केन्ना आमी दिसाळें उगडटात, टीव्ही पळयतात वा सोशल मिडीया वयल्यान बायलां कडेन संबंदीत घडणुको पळयतात तेन्ना आमकां दर दिसा कितें ना कितें वायट घडिल्लें दिसता. हें सगलें पळोवन खूब दुख्ख जाता. आमचीं बायलां, आमचीं आवय, आमच्यो भयणी जो मेरेन कसलोच भंय नासतना खंय वता थंय वा रस्त्यार मुक्तपणान चलूंक शकनात, भोवपाक शकनात तो मेरेन आमी मुक्त आसात अशें कशें म्हणूं येता?. घडये बायलांक अत्त्याचार जावंक ना असो एकूय दीस आसचो ना. ती कोणाची भयण, कोणाची धूव, कोणाची आवय, कोणाची बायल, कोणाची इश्टीण आसूं येता अशें हे गुन्यांव करपी लोक कित्याक माननात?
आवय बापायची ती धूव, कोणा भावाची ती भयण, कोणा मोग्याची ती मोगिका, कोणा तरी भुरग्यांची ती आवय, कोणा तरी घरकाराची ती घरकान्न आसता. चलयेच्या रूपान आवय- बापायचो आदार ती आसता. भंयणीच्या रुपांत भावाची सावळी ती. प्रेयसीच्या रूपांत प्रियकराचो सांगात ती. घरकान्नीच्या रूपान संवसाराचो गाडो चलोवपी. तीचे बगर संवसार पुराय जावंकच शकना. दुख्खांत पालव दिवपी भुखेल्यांक घांस दिवपी चुकता तांकां समजावन घेवपी वाट दाखोदपी, दुखयताल्याक माफ करपी, दुख्खाक पोटांत लिपोवपी, दुख्खान लेगीत सुख दाखवपी, आपुलकीचो सांबाळ करपी केन्नाच हार ना मानमी अशा अनेक गुणान भरिल्ली ती. ती…. एक अस्तुरी. पूण दिसान दीस जे कितें घडटा तें पळोवन काळीज खंयतरी रडटा.
अस्तुरी बगर घराक घरपण आसना. तिचे बगर जिणेक अर्थ ना. ती शुन्य समान. सगल्यांचे जिवीत खुशालकायेन फुलोवपी ती. जिणेंत उजवाड फाकोवपी ती. आयज म्हणटात आमी ना कसलो चली-चलो हांच्या मदीं भेदभाव. पूण अजूनय वता थंय जाता तिचो अपमान , मेळना तिका जाय तसो मान. अशें कित्याक घडटा?? ती एक अस्तुरी हेंच काय ताचे कारण? ती एक अस्तुरी तांतून तिचो कितें गुन्याव? होच एक प्रश्न उप्रासता.
तशें पळोवपाक गेले जाल्यार आतां गेले ते दीस चूल आनी मुल म्हणपाचे. उरलें ना ते दीस आतां पयली सारके कारण सगळीं कामांत आसतात. अस्तुरेचो वांटो, वता थंय ती मुखार तरिकूय समाजांत मेळना तिका जाय तसो सन्मान ती एक अस्तुरी तातूंत तिचो कितें गुन्यांव?
जशी आपणाली भयण आसता तशी तीय कोणाचीय भयण, जशी आपणाली आवय, तशीच तिवूय कोणाचीय आवय आसता अशें जे वायट कृत्य करता ते कित्याक माननात? हे नदरेन ते कित्याक पळयनात? असो विचार वायट कृत्या करपी मनश्याच्या तकलेन कित्याक येनात? सगळ्यांनी असो विचार केलो जाल्यार घडये हीं चुकीचीं कामां घडचीं नात. आनी दिसान दीस ज्यो वायट घडणुको घडटात त्यो घडच्यो नात. अश्यो घृणास्पद कृती जो कोण करता ताका कडक ख्यास्त दिवपाक जाय. ताचे खातीर बरे कायदे येवपाक जाय जाका लागून कोणाकूय परतून अशें घृणास्पद कृती करचे पयलीं शंबर फावटीं विचार करचो पडटलो.
संवसारभरांतल्या बायलांन वेगवेगळ्या मळार नामना जोडल्यात. कश्ट करून आनी कुटुंबीक जापसालदारक्यो पुराय करून बायलांक जायत्या मळार येसस्वीपणाच्या शिखराचेर पावल्यात. संवसारभरांतले लोक 8 मार्च हो आंतरराष्ट्रीय बायलांचो दीस म्हूण व्हडा उमेदीन मनयतात. बायलां मदीं जागृताय निर्माण करपाच्या हेतान वेगवेगळे कार्यावळी घडोवन हाडटात. राजकारण ते विज्ञान, कला, संस्कृताय आनी हेर मळार योगदान दिल्ल्या बायलांक भोवमान करतात.
जरी ८ मार्च हो दीस बायलां दीस म्हूण आसलो तरी जसो आमी बायला दिसा ताकां मान सन्मान दिता मोग दिता तोच मान सम्मान आमी दर दिसा तांकां जागृताय निर्माण दिवया.
शेवटाक एकूच सांगन दिसता “ती एक अस्तुरी , दिवया तिका मान …करुया तिचो सन्मान. करूया तिची राखण.. सगळ्यां आवय- भयणांक ह्या संवसारांतल्या सगळ्या बायलांक आंतरराष्ट्रीय बायलां दिसाची खूब परबीं.

सत्यवान जांगळी