भांगरभूंय | प्रतिनिधी
पालिका वर्साक एक – दोन फावटींच अतिक्रमण हटाव मोहीम चालीक लायता.
म्हापशें बाजारांतले वेपारी आनी नगरपालिका हांचे मदीं वाद चलता. बाजारपेठेंतल्या चलोवपाक दिल्ल्या दुकानांच्या कबलातीचें नुतनीकरण, दुकानांचें हस्तांतरण, कर वसुली अश्याे साबार मागण्यो वेपाऱ्यांनी केल्यात. पालिका ताचे कडेन लक्ष दिना, असो तांचो आरोप. ते खातीर तांणी गोंय मुक्ती दिसाचे कार्यावळींत काळे बावटे दाखोवपाचो निर्णय घेतला. अर्थांत तो रद्द जावं येता. पालिका सध्या बाजारांतलीं अतिक्रमणां कुशीक काडटा. मात नगरसेवकांक ते विशीं खबर ना खंय. म्हणल्यार मुख्याधिकाऱ्यान तांकां कळयनासतना ही कारवाय हातांत घेतल्या, अशें तांचें मत. काळे बावटे दाखोवपाचो निर्णय 5 डिसेंबराक वेपाऱ्यांचे बसकेंत जाल्लो. मात पालिकेन ताचे कडेन लक्ष दिवंक ना. दोन दिसां पयलीं थळाव्या आमदारान बसका घेवन वेपाऱ्यांचें म्हणणें आयकलें. तांचें प्रस्न सोडोवपाचें आस्वासनूय तांणी दिलां.
मुख्याधिकाऱ्यान वेपाऱ्यांचे संघटणेक 8 डिसेंबराक नोटीस धाडिल्ली. जांणी दुकानां विकल्यांत वा भाड्याक दिल्यांत, तांचीं नांवां कळोवपाक सांगिल्लें. अशीच नोटीस सप्टेंबरांतूय धाडिल्ली. ते वटेन, आमचे प्रस्न सुटावे जावचे म्हूण पालिका, आमदाराक, सरकाराक साबार निवेदनां दिलीं, मात कोणूच लक्ष दिना, असो वेपाऱ्यांचो दावो. आतां पालिके आड कोण उलयतात आनी संघटणेचे जाळवणदार आसात, तांचेच आड अतिक्रमण हटाव मोहीम सुरू केल्या, अशेंय वेपारी म्हणटात. बाजारांत वाट आडावन बसपी विक्रेत्यांचेर पालिका कारवाय करिना, मात फुटपाथाचेर सामान दवरिल्ल्या वेपाऱ्यांचेर करतात, असो वेपारी संघटणेचो आरोप. मुख्याधिकारी म्हणटा, बाजारांतलें अतिक्रमण काडल्यार गिरायकांक भोंवपाक बरें पडटलें. ह्या वादाचेर बेगीन तोडगो काडप गरजेचें.
म्हापशें बाजारांत खास करून शुक्रारा बरेच विक्रेते वाटो आडावन बसतात. चलपाक पसून मेळना. दुर्घटणा जाल्यार भितर गाडी व्हरपाक मेळटली काय ना, हो दुबाव. हालींच एम्बुलन्स बस स्टॅण्डार दवरची पडिल्ली. फक्त म्हापश्यांच न्हय, तर ‘घराघरांत मातयेच्योच चुली.’ सगल्याच बाजारांत कांयशी अशीच स्थिती. गिरायकांक सामाना पोंदच्यान तकली बागोवन वाट काडीत भोंवचें पडटा. पालिका वर्साक एक – दोन फावटीच अतिक्रमण हटाव मोहीम चालीक लायता. बाजारांनी शौचालयां आसात. तांचो वापर सारको जायना. भाजी, नुस्तेकारां खातीर इमारती बांदल्यात, पूण त्यो पडून आसात. ते खातीर विक्रेत्यांक फोर्सार करचें पडटा. कांय कडेन तर इमारती धुल्ल खायत पडल्यात. थोड्या मार्केटांनी अर्दीं दुकानां चालू आसात, अर्दीं वर्साचीं वर्सां बंद. नुस्त्या बाजारांत हळशीक. म्हापश्यां मार्केटांतले रस्ते भिरांकूळ जाल्यात. बस स्टॅण्डार आसात तशे! राज्यांत सगल्या पालिका, पंचायतीचे बाजार, इमारती, थंयच्या समस्यांचो सरकारान वेळांत वेळ काडून नियाळ घेवपाक जाय. ताचेर उपाय सोदपाक जाय. कारण ह्यो चिरंतन समस्या. फाटल्या चाळीस वर्सां पसून (ताचेय पयलीं) त्यो आसात. त्यो सुटाव्यो कित्याक जायनात, हाचोय विचार जावप गरजेचें.
बाजारांतलीं बरींच दुकानां विकत घेतल्यांत एकल्यान आनी भाड्याक दिल्यांत दुसऱ्यान. ती तिसऱ्याकूच विकपीय आसतले. खरें म्हणल्यार हो नेम रद्द करपाक जाय. जमीन, भांगरांनी जशी गुंतवणूक करतात, तशी दुकानांनीय पयसो घालपी जायते जाण आसात. 2- 3 शारांनी दुकानां घेवन दवरिल्लेय वेपारी आसात. दुकानांचें मूळ धनी कोण हें सोदल्यार चित्र स्पश्ट जातलें. विवीध कर, लायटीचीं बिलां, सोपो हांची नेमान वसुली जावंक जाय. दोन वर्सांनी एकदां न्हय. कांय पालिकांक खंय वेपाऱ्यां कडल्यान कोट्यांनी रुपयांची थकबाकी येवपाची आसा. दुसरी गजाल बाजारांत जागे आंखून दिल्ले आसतना विक्रेते मेळत थंय बसतात. थळाव्यां कडेन दादागिरी करतात. दिवचले बाजाराच्या दिसा मारामारी पसून जाल्या. कोणाचेंच हाचेर नियंत्रण ना.
हे अस्ताव्यस्त बाजार म्हणल्यार गोंयच्या वेपार मळाक लागिल्लें खत. तें जाता तितलें बेगीन पुसप गरजेचें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
