भांगरभूंय | प्रतिनिधी
तिडकल्ल्या लोकांनी पुलीस स्टेशनाक घालो उजो
परगणा, खबरां संस्था: अस्तंत बंगालांतल्या दक्षीण २४ परगणा जिल्ह्यांतल्या एका गांवांत णव वर्सां पिरायेचे चलयेचेर बलात्कार आनी खून करपाचें धक्को दिवपी प्रकरण उजवाडाक आयलां. शेनवारा सकाळीं तिडकल्ल्या गांवकारांनी पुलिसांचेर निश्काळजीपणाचो आरोप करून पुलीस चौकेक उजो लायलो. ह्या प्रकरणांत एकल्याक अटक केल्या आनी पुलिसांनी तांचेर केल्ले आरोप न्हयकारल्यात.
कोचिंग क्लासीक गेली आनी घरा परतूंकच ना
चलयेचें कुटूंब आनी शेजार्यांच्या म्हणण्या प्रमाण शुक्रारा दनपरां ती कोचिंग सेंटरांत गेल्ली. ती घरा परतूंक ना तेन्ना कुटुंबान तिचो सोद घेवपाक सुरवात केली. उपरांत तांणी तिची बेपत्ता जाल्ल्याची म्हायती पुलिसांक दिली. थळाव्या पुलिसांनी मात तांकां दुसर्या पुलीस स्टेशनाचेर कागाळ करपाचे निर्देश दिले.
शुक्रारा रातीं लागसारच्या तळ्यांत एके चलयेची कूड मेळ्ळी आनी ताका लागून वाठारांत तणाव निर्माण जालो. शेनवारा सकाळीं थळाव्यांनी पुलीस स्टेशनां भोंवतणी सारण, दांडे, बांबू घेवन गर्दी केली.
उपविभागीय पुलीस अधिकारी आतिश बिस्वास हांकां घेरो घालो. गांवच्या लोकांनी पुलीस स्टेशनावेलें सगळें मोडून घालून उजो लायलो. ताका लागून म्हत्वाचीं कागदपत्रां नश्ट जालीं. निमाणें पुलिसांनी गर्देक धांवडावपाक लाठीचार्जचो आदार घेतलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
