भांगरभूंय | प्रतिनिधी
विश्व हिंदू परिशदे कडल्यान दक्षीण गोंय जिल्होधिकाऱ्यांक निवेदन
मडगांवः अस्तंत बंगालांतल्या वक्फ कायद्याचो निशेध करतना हिंदू लोकांचेर अत्याचार करतात. हाचेर नियंत्रण दवरपाक सरकाराक अपेस आयिल्ल्यान राष्ट्रपती राजवट लागू करची. केंद्रीय सुरक्षा दळाची नेमणूक करून एनआयएन हिंसाचाराची चवकशी करची. बांगलादेशाचे शिमेचेर तारेंचें कुंपण घालचे अश्यो मागण्यो विश्व हिंदू संघटना करता.
दक्षीण गोंयांतल्या विश्व हिंदू संघटना आनी हेर हिंदू संघटनांच्या शिश्टमंडळान दक्षीण गोंय जिल्होधिकारी एग्ना क्लिटस हांची भेट घेतली. ह्या वेळार श्याम नायक, आनंद आंगडी, राजेंद्र मळकर्णेकार, दिक्षत नायक, ठाकुर नायक आदी हाजीर आशिल्ले. शिश्टमंडळान निवेदन सादर करुन अस्तंत बंगालांत हिंदूंचेर जावपी अत्याचार थांबवपा खातीर राष्ट्रपती राजवटीची मागणी केली. निवेदन सादर केले उपरांत विश्व हिंदू संघटनेचे गोंय विभाग मंत्री मोहन आमशेकार हांणी सांगलें, ही संस्था देशभरांतल्या जिल्लोधिकाऱ्यांक मेळून निवेदन सादर करता. अस्तंत बंगालांतल्या हिंदू अल्पसंख्यांक वाठारांनी हिंदू लोकांचेर अन्वयित अत्याचार सुरू आसात.
सरकाराचो दबाव आशिल्ल्यान पुलीस कारवाय करीनात. देखून सरकार सोडून राष्ट्रपती राजवट हाडून हिंदूंचेर जावपी अत्याचार थांबवपाची गरज आसा. हाचे भायर केंद्रीय सुरक्षा दळ थंय तैनात करून हिंसाचार आडावचो आनी गुन्यांवकारांचेर कारवाय करची. तशेंच एनआयएन ह्या हिंसाचाराची पुराय चवकशी करपाचीय गरज आसा. हाचे भायर बांगलादेशांतल्यान घुसखोरी करपी लोक आसात आनी तांकां अस्तंत बंगालांतल्यान परतून धाडपाक जाय. तारेचे कुंपण उबारून शिमो बंद करपाक जाय. हिंदूंचेर जावपी अत्याचार थांबून अस्तंत बंगालांत लोकशाय सरकार घडोवचें अशी मागणी तांणी केली. जिल्लोधिकाऱ्यांनय सकारात्मक प्रतिसाद दिला आनी उल्लेख केल्लें निवेदन राष्ट्रपती मेरेन पावोवपाचें आश्वासन दिलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
