अस्तंत बंगालांत ईडीच्या पंगडाचेर हल्लो
भांगरभूंय | प्रतिनिधी
कोलकत्ता, खबरां संस्था ः अस्तंत बंगालांतल्या उत्तर 24 परगना हांगाच्या संदेशखळी गांवांत शुक्रारा 5 जानेवारीक सकाळीं ईडीच्या पंगडाचेर हल्लो जालो. हल्लेखोरांनी पंगडाच्या गाडयांची तोडफोड केली. तशेंच सीआरपीए जवानांचोय फाटलाव केलो. रेशन घोटाळ्या संबंदी टीएमसी फुडारी शेख शाहजहान आनी बानगांव नगरपालिकेचे आदले अध्यक्ष शंकर आध्या हांच्या बोनगांव निवासस्थानाचेर धाड घालपाक पंगड आयिल्लो तेन्ना हो हल्लो जालो.
ईडीच्या अधिकाऱ्याच्या म्हणण्या प्रमाण, अचकीत 200 जाणांच्या पंगडान घेराव घालो आनी हल्लो केलो. आमच्या वाहनांचीय मोडतोड केली. धाड घालपाक आयिल्ल्या पंगडांत ईडीचे सहाय्यक संचालक आसले. ताचीय गाडी फोडली. टीएमसीचो फुडारी एसके शाहजहानाक अटक केल्या.
रेशन घोटाळ्या प्रकरणी 26 ऑक्टोबर 2023 दिसा ईडीन ममता सरकाराच्या रानां मंत्री ज्योतिप्रिय मलिक हांच्या घरांत धाड घाल्ली. 27 ऑक्टोबराक तांका अटक केल्ली. रानां मंत्री जावचे पयलीं ज्योतिप्रिय मलिक अन्न मंत्रीपदाची जापसालदारकी सांबाळटाले. ज्योतिप्रियाक अटक करचे पयलीं ईडीन ह्याच प्रकरणांत राइस मिल धनी बकीबुर रहमान हाका अटक केल्ली. 2004 वर्सा राइस मिल धनी म्हणून आपली कारकीर्द सुरू केल्ल्या रहमानान फुडल्या दोन वर्सांत आनीक तीन कंपनीं स्थापन केल्यो. ईडी अधिकाऱ्यांच्या म्हणण्या प्रमाण रहमानान जायत्यो शेल कंपनी तयार केल्यो आनी हिसपा भायर पयशे खर्च केले.
शिक्षक भरती घोटाळ्यांत टीएमसी फुडाऱ्याक अटक
23 जुलय 2022 दिसा शिक्षक भरती घोटाळ्यांत पयशे लुटपाच्या आरोपांत ईडीन पार्थाक कोलकाताच्या सरकारी निवासस्थाना वयल्यान अटक केली. पार्थाचेर मंत्री आसतना नोकरी दिवपाच्या बदलाक चुकीच्या पध्दतीन पयशे घेतिल्ल्याचो आरोप आसा. पार्थाक अटक जाले उपरांत 5 दिसांनी ममता बॅनर्जी हांणी ताका मंत्रीमंडळांतल्यान काडून उडयलो.
ईडीन 23 आनी 28 जुलयाक पार्थाची इश्टीण अर्पिता हांच्या दोन फ्लॅटांचेर धाड घाली. हे कारवायेंत तांच्या फ्लॅटांतल्यान 49 कोटी रुपयांची रक्कम जप्त केल्ली. सध्या दोगांय बंदखणींत आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
