भांगरभूंय | प्रतिनिधी
कुडचडें: असोळणें ग्रामपंचायतीन आपयिल्ले विशेश ग्रामसभेंत कोळसो येरादारी करपाच्या हेतान असोळण्यां उबारपाचे प्रस्तावीत जेटीक ग्रामस्थांनी खर विरोध केलो. ग्रामसभेन २०११ वर्सा दिनार तारकार प्रा. लि. कंपनी शेळवणाच्यान लोखणाची येरादारीक करपाक जेटी वापरतात. हाचे भायर कोस्टल रेग्युलेशन झोन वाठारांत खंयचेच जेटी खातीर ना हरकत दाखलो जारी करूंक ना आनी राष्ट्रीय हरीत न्यायाधिकरण आनी हेर न्यायालयाचे आदेश खर पाळपाचें सुनिश्चीत करपाचे थाराव मांडले.
जेटी प्रकल्पा खातीर ८० मिटर रुंद रस्तो बांदपाक गरजेचो आशिल्लो व्हडा प्रमाणांत दोंगर कापपा आडूय ग्रामस्थांनी तिडक उक्तायली. तांणी पर्यावरणाचो इबाड आनी भौशीक भलायकेच्या धोक्यांचेर उजेड घालो. जातूंत अश्या घडामोडींचो आसपाव आसा. हे बसकेक शेकड्यांनी गांवकार हजर आशिल्ले. तांतले जायते जाण तिडकल्ले.
आदित्य देसाय हांणी गांवच्या लोकांच्या हुस्क्याचेर भर दिलो. असोळेच्या लोकांनी एकवटान जेटी आनी ताचे कडेन संबंदीत रस्तो रुंदीकरण प्रकल्पाक विरोध केलो. कोळशाची येरादारी करपा खातीर हे नियोजीत जेटीक लागून समाजाचे भलायकी धोक्यांत येतली आनी वार्याचेंय प्रदुशण जातलें. भोपाळाक जाल्ले गॅस घडणूक आमी असोळण्या जावपाक दिवचे ना. कोळसो येरादारी आमच्या पर्यावरणा खातीर आनी फुडले पिळगे खातीर धोक्याची थारली. ग्रामसभेचे निर्णय अशा व्हड उद्देगीक प्रकल्पांचे पर्यावरण आनी भलायकेचेर जावपी परिणामां विशीं वाडपी हुस्को उक्तायतात. वेवसायीक हित संबंधां परस भोंवतणचो वाठार सुदारपाचेर प्राधान्य दिवपा विशीं अधिकार्यांक संदेश दिवन ग्रामस्थांनी तांचे आड ठाम रावपाचो निर्णय घेतलो. सरपंच कुस्तोदियो फर्नांडीस, असोल्डा ग्रामपंचायतींतल्या सातूय वांगड्यांचो ह्या प्रकल्पाक विरोध आसा आनी आमदार निलेश काब्राल हांणी सांगलें, आमी जनते वांगडा आसा. आमी ह्या प्रकल्पा खातीर दोन तीन सुवातांची पळोवणी केली. आदले सरपंच मनोज नायक हांणी सांगलें, आयज ह्या प्रकल्पाक थळाव्यांनी पुरायेन विरोध केला. आमचो प्रकल्पाला विरोध ना आनी सरकाराच्या आड आमी वचनात. लोकांक त्रास जावचे ना अशे सुवातेर हो प्रकल्प घालचो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
