असोय एक खेळां प्रशिक्षक….

भांगरभूंय | प्रतिनिधी

वाॅशिंग्टन, खबरां संस्था ः ही काणी एका वैजकी खेळां प्रशिक्षकाची. 1996 वर्सा लॅरी नासर नांवाचो तरणाटो अमेरिकन जिम्नॅस्टिक्स राश्ट्रीय पंगडाच्या वैजकी कर्मचाऱ्यां मदीं ऍथलेटिक्स प्रशिक्षक म्हणून कामाक लागलो. जिम्नॅस्टिक्सा वेळार चलयेक दुखापत जाली वा सराव करतना दुयेंत पडली जाल्यार लॅरी तिचेर उपचार करतालो. ल्हवू ल्हवू लॅरीन उपचाराचे नाटक करून चलयां कडेन इश्टागत करपाक सुरवात केली.
19 वर्सां उपरांत ताणें आपल्या पदाचो राजिनामो दिलो तेन्ना एका फाटल्यान एक चलयेन लॅरीचेर लैंगीक अत्याचाराचे आरोप केले. लैंगीक हिंसाचारा बरोबरच लॅरीन तांचेर अत्याचार केलो आनी अश्लील फोटो काडले अशें पिडित चलयांनी सांगलें. तेच बरोबर लॅरीचेर व्हिडियो तयार केल्ल्याचोय आरोप केलो. सुनावणी वेळार एके पिडित चलयेन सांगलें, लॅरी चलयांच्या आवय- बापाय मुखार चलयांचे शोशण करतालो. आनी ह्या सगळ्या कृतींक तो सामान्य गजाल अशें म्हणटालो. ताका लागून लॅरीन केल्लें चुकीचें आसा हें पालक आनी चलयांक समजूंक शकलें ना.
ल्हवू ल्हवू जिम्नॅस्टांचो संयम सुटपाक लागलो. लॅरी पयलेच खेपे 2016 वर्सा उजवाडांत आयलो, तेन्ना एका दिसाळ्यान ताचे आड अहवाल उजवाडायलो. लॅरीचेर दोन जिम्नॅस्टानी लैंगीक अत्याचार केल्ल्याचो आरोप केल्लो. तातूंतल्या रॅचेल डेनहोलँडर नांवाच्या चलयेन सांगलें की लॅरीन तिचेर 15 वर्सां पिरायेचे आसताना लैंगीक अत्याचार केल्लो. 2017 वर्सा लॅरीच्या वायट कृत्यां विशीं उक्तेपणान उलोवपी ते पयले चली. ताचे उपरांत ऑलिंपिक भांगरा पदक जैतिवंत अॅली रायसमॅनान नोव्हेंबर 2017 वर्सा 60 मिनटांची मुलाखत दिली. मजगतीं तिणें म्हणलें- लॅरीन तिचेर लैंगीक अत्याचार केलो. त्या वेळार तिची पिराय फकत 15 वर्सां आशिल्ली.
रेचेल डेन्होलँडरनान म्हणले वर्स 2000 आशिल्ले हांव 15 पिरायेचे आशिल्ले. लॅरी म्हजे कडेन बरो उलयलो. आमी इश्टागत जाली. हांव ताचेर विस्वास दवरूंक लागले. ताणें जेन्ना चेकअप करपाक आपयलें तेन्ना हांव गेलें. थोड्या वेळा उपरांत तो फिजिकल थेरपी दिवपा विशीं उलोवंक लागलो. आनी मागीर तो म्हजे कडेन गैरवागणूक करपाक लागलो, थेरपीच्या नांवान स्पर्श करपाक लागलो. म्हाका तें आवडूंक ना. हांवें तशें करपाक न्हयकार दिलो. हाचेर ताणें सांगलें की ही वेदना उणी करपाची थेरपी. अशें करप ही एक सामान्य गजाल.

लॅरीक 2016 वर्सा अटक केल्ली

पुलिसांनी 2016 वर्सा लॅरीक अटक केल्ली. ताचेर चाइल्ड पोर्नोग्राफीचो आरोप करून ताका लैंगीक गुन्यांवकार जाहीर केलो. 150 परस चड चलयांनी गवाय दिल्ल्यान 2017 वर्सा लॅरीक दोशी थारायलो. 7 डिसेंबराक जाल्ले निमाणे सुनावणेत एका न्यायाधीशान लॅरीक सांगलें, तुका बंदखणींतच मरण येतलें.

175 वर्सां मेरेन ख्यास्त

अमेरिकेच्या वेगवेगळ्या शारांनी लॅरीचेर खटले दाखल जाले. अमेरिकेंतल्या जायत्या न्यायालयांनी ताच्या खटल्यांची सुनावणी जाली. सुनावणी उपरांत वेगवेगळ्या न्यायालयांनी ताका दोशी थारावन ख्यास्त फर्मायली. कांय न्यायालयांनी ताका 60 वर्सां, जाल्यार कांय न्यायालयांनी 40 ते 175 वर्सांची ख्यास्त फर्मायली.
9 जुलय 2023 दिसा बंदखणींत लॅरीचेर हल्लो जालो. ताचेर 10 फावटीं वार केलो. विंबल्डन चॅम्पियनशीप पळयतना ताणें कांय असभ्य टिप्पणी केल्यो आनी उपरांत बंदखणींतल्या कैद्यांनी ताचेर हल्लो केलो. लॅरीच्या मानेर दोन फावटी, फाटींत दोन फावटी आनी हड्ड्यार स खेपे वार केले.