भांगरभूंय | प्रतिनिधी
नवी दिल्ली, खबरां संस्था ः अष्टविनायक गणपती मदीं मोरगांवचो मोरेश्वर, थेऊरचो चिंतामणी, सिध्दटेकचो सिद्धिविनायक, चिंचवडचो मोरया गोसावी संजीवन देवूळ आनी खार नारंगी देवळांत दर्शना खातीर वतना घालपाच्या ड्रेस कोडाची घोशणा केल्या. हीं पांच देवळां ज्या ट्रस्टाच्या खाला आसात तांणी हो ड्रेस कोड चालीक लायलां. पूण चिंचवड (पुणे) देवस्थान ट्रस्टानय सांगलां की ही सक्ती न्हय, तर देवळाची पवित्रताय तिगोवन दवरपा खातीर हो ड्रेस कोड घालून दर्शनाक येवचें. देखून पुणे जिल्ह्यांतल्या पांचूय अष्टविनायक गणपती देवळांनी भक्तांक लागू केल्लो ड्रेस कोड घालून दर्शना खातीर येवचें पडटलें.
चिंचवड देवस्थान ट्रस्ट सगल्या भक्तांक विनंती करता की महासाधु श्री मोरया गोसावी महाराज हांच्या संजीवन समाधी देवळाक आनी श्री मंगलमूर्ती वाडाक पुराय श्रद्धा आनी भक्तीन भेट दिवची. मोरया गोसावी महाराज आनी श्री मंगलमूर्ति वाडा हांचे संजीवन समाधी देवूळ फकत इमारती न्हय, ते अध्यात्म, संस्कृताय आनी भक्तीचें केंद्र आसात. हांगा येवपी दरेका भक्तान देवळाचे पवित्रतेचो आदर करचो आनी भक्तीचें वातावरण तिगोवन दवरपाक सहकार्य करचे. देवळाचे शुद्धताये प्रमाण आमची वागणूक आसची हे खातीर आमी सगळ्यांनी एकवटीत यत्न करपाची गरज आसा. देवस्थानाक भेट दिवपी सगल्या भक्तांनी ड्रेस कोड घालचो.
ड्रेस कोड असो –
० दादल्यांनी पारंपरीक आनी देवळाच्या पवित्रतेक फावो अशें कपडे घालचे. शर्ट, टीशर्ट, आनी फुल पँट वा धोती, कुर्ता, पायजामा असो पोशाख घालचो.
० बायलांनी साडी, सलवार कमीज, पंजाबी ड्रेस वा हेर पारंपरीक कपडे घालचे.
० देवळाच्या आवारांत कोणेंच अतिआधुनीक, अपारंपरिक, पारदर्शक, स्लीव्हलेस, पिंजलेलें कपडें घालचे न्हय.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
