भांगरभूंय | प्रतिनिधी
एका काळार वेस्ट इंडिज पंगड फास्ट बाॅलिंगे खातीर गाजतालो. मायकल होल्डींग, अॅण्डी राॅबर्टस, काॅलीन क्राॅफ्ट, कर्टली एम्ब्रोज, जाॅएल गार्नर, माल्कम मार्शल, काॅर्टनी वाॅल्श, वेस्ली हाॅल……..!! बऱ्याच बॅट्समनांक तांचे मुखार केन्ना एकदां आवट जाता अशें दिसतालें खंय. 1983 त भारत तांचे आड वर्ल्ड कप जिखलो आनी वेस्ट इंडिज बाॅलरांचो करिश्मा उणो जायत गेलो. अशीच कामगिरी भारतानूय केल्या. स्पीन बाॅलिंगेत. बिशनसिंग बेदी, इरापल्ली प्रसन्ना, वेंकट राघवन, भागवत चंद्रशेखर हांणी एक काळ गाजयलो. मागीर हरभजन सिंग, दिलीप दोशी, मनिंदर, अनील कुंबळे…. आमच्या स्पिनरां मुखार बरेच खेपे विदेशी पंगड शरण आयल्यात. कालूच आंतरराष्ट्रीय क्रिकेटींतल्यान निवृत्त जाल्लो रवीचंद्रन अश्विन हो तातूंतलोच एक गुणी स्पीनर. पयलीं टेस्ट मॅची चड खेळटाले. मागीर वनडे. आयज वनडेय फाटीं पडून 20- 20 चो अक्षरशा पावस पडपाक लागला. तातूंत आनीक आयपीएल, रणजी…. आसता. मॅचींचो आंकडो वाडिल्ल्यान वैयक्तीक आंकडेवारीय आकर्शक जावपाक लागल्या. भारतीय स्पिनरां मदीं पयल्या क्रमांकाचेर आसा, अनील कुंबळे (कर्नाटक). ताणें आंतरराष्ट्रीय क्रिकेटींत 956 विकेटी घेतल्यात. तर दुसरो सगल्यांत चड विकेटी घेवपी थारला, रविचंद्रन अश्वीन (तामिळनाडू). ताणें 765 विकेटी घेतल्यात.
भारतीय क्रिकेट पंगड सध्या परिवर्तनाचे वाटेर चलता. खांपे खेळगडे एका फाटल्यान एक निवृत्त जायत आसात. अर्थांत आंतरराष्ट्रीय क्रिकेटींतल्यान न्हय, तर तिनां मदल्या एका प्रकारांतल्यान. विराट कोहली, रोहीत शर्मा, राजेंद्र जडेजा आनी हेर कांय जाण 20- 20 तल्यान निवृत्त जाले. काल अश्विन. अर्थांत भारतीय पंगडांत खेळपाक सध्या रांको लावन उणेच शंबर तरी दर्जेदार खेळगडे आसतले. पयलीं ते मुंबय, बंगळुरू, चेन्नय अशा शारांतले वा थंय स्थायीक जाल्ले आसताले, मात आतां गांवांतले पसून खेळगडे येतात. मध्यमवर्गीय घरांतलेय जायते जाण आसात. अश्विनाचो जागो कोण घेवंक शकना. ते खातीर नव्या बाॅलरांक आनीक कांय पावसाळे पळोवचे पडटले. पूण कुलदीप यादव, वाॅशिंग्टन सुंदर, साई किशोर, अक्षर पटेल, रवी बिश्नोय हांकां तो जागो घेवपाची संद आसा. आयपीएलाक लागून एखादो नवो स्पिनरूय मेळपाक शकता. कारण आमच्या देशांत आदल्या सारके वर्साचीं वर्सां खेळगड्यांक खेळयत बसयनात. फाॅर्म गेलो काय रोखडोच भायर बसयतात.
अश्विन हो प्रयोग करपी खेळगडो. घालपाक जाय म्हूण कशीय बाॅलिंग घालपी तो न्हय. ताच्या ह्या प्रयोगशील स्वभावाक आनी कृतीक लागूनच तो इतल्यो विकेटी घेवपाक पावलो. 13 वर्सांचे ताचे आंतरराष्ट्रीय कारकिर्दींत ताणें 106 टेस्ट मॅचींनी 537 विकेटी घेतल्यात. 37 फावटी 5 विकेटी तर 8 फावटी मॅचींत 10. आठ वर्सां पयलीं न्युझिलॅण्डा आड ताणें इंदूर टेस्टींत 13 विकेटी घेतिल्ल्यो. माळेंत 27. एका दिसाचे मॅचींनी ताणें 156 तर टी- 20 त 72 विकेटी घेतल्यात. बॅटिंगेक फाटल्यान आयलो तरी तो एक बरो बॅट्समन. ताणें टेस्ट मॅचींनी 3503 धांवड्यो केल्यात. तातूंत स शेंकडे आसात. पयल्या श्रेणीच्या मॅचींनी ताणें वट्ट आठ शेंकडे मारल्यात. 37 फावटी 5 विकेटी घेवपी तो पयलो भारतीय. नंबर वन कुंबळे पसून फाटीं आसा. ताणें 35 फावटी हो पराक्रम केला. अश्विन आनी शेन वाॅर्न दुसर्या क्रमांकाचेर आसात. तर पयलो आसा श्रीलंकेचो मुथय्या मुरलीधरन. ताणें 67 फावटी डावांत पांच विकेटी घेतल्यात. अश्विनान सगल्यांत चड देडशें विकेटी घेतल्यात, त्यो इंग्लंडा आड, मागीर 146 विकेटी आॅस्ट्रेलिये आड. हाचे वयल्यान ताच्या दर्जाची कल्पना येतली.
टेस्ट मॅचींत सगल्यांत चड मॅन आॅफ द सिरीज जावपाचो विक्रम अश्विनान आपल्या बोल्सांत उडयला. टेस्टींनी सगल्यांत चड विकेटी घेवपी तो संवसारांतलो सातवो बाॅलर. आनीक एक विक्रम ताच्या नांवाचेर आसा, तो म्हणल्या तंदुरुस्ती. सगल्याच खेळगड्यांक भलायकी सांबाळपाचें एक व्हडलें आव्हान आसता. हाताक, पांयांक, फाटीक दुखापत जावपाच्यो घडणुको मैदानाचेर आनी भायरूय घडटात. खेळना तेन्नाय खेळगडो जखमी जाता. 1983 चो वर्ल्ड कप जिखून दिवपी कॅप्टन कपील देव निखंज हो एकसुरो खेळगडो, जो करियर सोंपमेरेन केन्ना दुयेंत पडलो ना वा ताका दुखापत जाली ना. अश्विन दुसरो कपील देव थारलो. तोय देशांत जावं विदेशांत केन्ना दुयेंत पडलों ना. फाटल्या कांय वर्सांनी क्रिकेटीचो अतिरेक जाला, तें पळयल्यार अश्विनाची चड तुस्त करची पडटली. तो कायम तंदुरुस्त उरलो. निवृत्त जाय मेरेन. आयच्या खेळगड्यांनी अश्विनाचे हे गजाली पसून आदर्श घेवंक जाय…. अश्विनाक जिवितांतले दुसरे इनिगें
खातीर परबीं.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
