भांगरभूंय | प्रतिनिधी
मनपा मुखार वेपाऱ्यांचो गोंदळ; अर्ज वांटपांत भानगड जाल्ल्याचो आरोप
भांगरभूंय I प्रतिनिधी
पणजी : राजधानी पणजे बिरेस्ताराच्यान अश्टमीची फेरी सुरू जातली. हे फेरींत दुकान लावपाक परवानगीचे अर्ज पणजी म्हानगरपालिका (मनपा) कार्यालयांतल्यान घेवपाक सांगिल्लें. ते खातीर मंगळारा सकाळच्यान अर्जा खातीर रांकेंत उबे रावनूय अर्ज मेळूंक नाशिल्ल्यान वेपारी आक्रमक जावन तांणी मनपा मुखार गोंदळ घालपाक सुरवात केली.
दरवर्सा प्रमाण 18 ऑगस्ट ते 1 सप्टेंबर ह्या काळांत चवथीचे पयलींची अश्टमीची फेरी भरता. मांडवी न्हंयेच्या देगेर भरपी हे फेरयेंत दुकान घालपाक म्हापालिकेंतल्यान अर्ज घेवपाच्यो सुचोवण्यो वेपाऱ्यांक केल्ल्यो. ते खातीर मंगळारा सकाळच्यान वेपाऱ्यांनी म्हापालिके मुखार रांको लायिल्ल्यो. पूण सांजे 4 वरांचेर अर्ज सोंपिल्ल्याचे जाहीर केले उपरांत वेपाऱ्यांनी गोंदळ घालपाक सुरवात केली.
मंगळारा सकाळच्यान फक्त 30 ते 50 जाणांक अर्ज दिले. जाल्यार उरिल्ले अर्ज खंय गेले, अशी जाप वेपाऱ्यांनी अधिकाऱ्यांक विचारली. अर्ज वांटपांत भानगड जाल्ल्याचो आरोपूय वेपाऱ्यांनी केलोे.
वेपारी आक्रमक जाले उपरांत पुलिसांक आपोवचे पडले.
पुलिसांनी थंयचे परिस्थितीचेर नियंत्रण मेळयलें, तशेंच कांय जाणांक ताब्यांत घेतले.
म्हापलिका अधिकाऱ्यांनी आपल्या मर्जींतल्या लोकांक अर्ज दिल्ल्याचो आरोप वेपाऱ्यांनी केलो. तशेंच हे विशीं निशेध उक्तायलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
