अश्टताशी अभिनेत्री ः रंजना

भांगरभूंय | प्रतिनिधी

अभिनयाक आपलो देव मानपी रंजनान 1993 वर्सा व्हील चॅराचेर बसून ‘फक्त एकदाच ’ ह्या नाटकांत परत एक फावट आपल्या अभिनयाची झलक प्रेक्षकांक दाखयली. ह्या नाटकाचे वट्ट 38 प्रयोग जाल्ले.

गोरो रंग, तीक्ष्ण नाक, सशक्त बांदावळ, पोल्याचेर तीळ आनी नदरेंतली वेधकता आशिल्लीं अभिनेत्री म्हणल्.यार रंजना देशमुख. तिचो जल्म मुंबयंत अभिनयाचे दायज आशिल्या कुटुंबांत 23 जुलय 1955 दिसा जालो. रंजनालो बापूय गोवर्धन हांकां गुजराती माचये वयले ‘बाल गंधर्व’ म्हणून वळखताले. आवय वत्सला देशमुखान घोवा कडसून  घटस्फोट घेतले उपरांत चली रंजना आनी चल्या सयत आपली आत्या संध्या कडेन रावपाक आयली. संध्या ही अभिनेत्री. व्ही. शांताराम हांची घरकान्न.

रंजनान शाळेचें मुळावें शिक्षण परेल इंग्लीश शाळेंत पुराय केलें. पूण फुडें आवय वत्सला देशमुखान रंजनाक अभिनयाच्या मळार करिअर करपाक विरोध केल्ल्यान रंजनान दावर इन्स्टिट्यूटांतल्यान सेक्रेटरियल प्रॅक्टीस, ब्युटी पार्लर, बेकिंग, कॅटरिंग अभ्यासक्रम पुराय केले. त्याच वेळार रुइया कॉलेजींतल्यान तत्वगिन्यान आनी साहित्यांतय पदवी मेळयली.

खरें म्हणल्यार रंजनाची अभिनय कारकीर्द ल्हान पिरायेचेर सुरू जाल्ली, पिरायेच्या पांचव्या वर्सा तिणें ‘हरिश्चंद्र तारामती’ ह्या सिनेमांत काम केलें. उपरांत  हिंदी आनी मराठींतल्या लडकी सह्याद्री की ह्या चित्रपटांतूय अभिनय केल्लो. आवय आनी आत्या वांगडा रावपी रंजनाक फिल्म उद्देगाचो लागींचो अणभव आसलो. पूण तिणें केन्ना भिनेत्री जावपाची अपेक्षा धरुंक नाशिल्ली. चंदनाची चोळी अंग अंग जाळी  (1975) या सिनेमांत काम करपाची निर्मातो दिग्दर्शक व्ही. शांताराम हाणीं रंजनाक ऑफर दिली तेन्ना सावन तिगेली फिल्म इंडस्ट्रींतली कारकीर्द सुरू जाली.  मुखार किरण शांतारामान तिका ‘झुंज’ ​​(1977) ह्या सिनेमांत नायिका म्हणून काम दिलें. हातूंत तिणें गांवगिऱ्या शाळेंतल्या शिक्षकेची भुमिका कुशळटायेन केल्ली. हे भुमिकेचेर रंजनाक फुडें जायते सिनेमा मेळ्ळे. उपरांत रंजना ‘असला नवरा नको गं  बाई’ (1977)  सिनेमांत शेतकार आशिल्ल्या राजा गोसावी वांगडा उच्च शिक्षण घेतिल्ले तरणाटेचे भुमिकेंत ती दिसली. 

चानी’ सिनेमान तिगेल्या सिने कारकिर्दीक वेगळेपण दिलें. चि. त्र्यं.. खानोलकाराल्या ‘चानी’ कादंबरीचेर आदारिल्ल्या ह्या सिनेमांत  रंजनान चानीचें पात्र परिपूर्णतायेन साकार केलां. मराठी बायल आनी इंग्लीश अधिकारी हांच्या संबंदांतल्यान जल्मल्ली आनी ताका लागून समाजान बहिश्कृत केल्ले बायलेचें पात्र रंजनान सशक्तपणान साकारलें. मानसीक संघर्शा विरुद्ध समाजीक संघर्श आशिल्ली तिगेली भुमिका आशय आनी विशय हांचे नदरेन सामकी वेगळी थारली.

सुशिला (1978) ह्या चित्रपटांतली तिची भुमिकाय म्हत्वाची आशिल्ली, तातूंत शिकिल्ले, संवेदनशील शाळेंतली शिक्षीका सुशिला ह्या पात्रान सज्जनते थावन दुर्जनते मेरेनच्या  केल्ल्या प्रवासाक लागून ते भुमिकेचेर प्रेक्षक मंत्रमुग्ध जाल्ले. अरे संसार संसार’ (1980) ह्या चित्रपटांतल्या भुमिके खातीर रंजनान अभिनयात सुदारणा केली.

ह्या सिनेमांत तिगेलो नायक कुलदीप पवार  आशिल्लो. नवी व्हंकल जावन घरांत आयिल्ली, शेतकार घोवा वांगडा सुख दुख्खा वांगडा जिवीत जगपी घरकान्न, घोवाच्या मरणा उपरांत लेगीत आपल्या भुरग्यां खातीर धिरान उबी रावपी आवय आनी जाण्टेपणांत घराचो एकचार तिगोवन दवरपाक वावुरपी मांय. पिराये प्रमाण बदलपी बायलेचो प्रवास एकाच सिनेमांत उक्तो करपी अभिनेत्री रंजनाक भोव मुखी भुमिके खातीर महाराष्ट्र सरकाराचो उत्कृश्ट ‘अभिनेत्री’ चो पुरस्कार मेळ्ळो. 

तिची खासा विनोदी भुमिका ‘मुंबईचा फौजदार’ सिनेमांतली. तातूंत शिकिल्ल्या घोवाची अशिक्षीत बायल, गांवांत रावपी एक सादी चली लग्न जाले उपरांत शारांत येता आनी घोवा सावन शेजाऱ्या मेरेन सगळ्यांच्या विनोदांचो विशय थारता. पूण घोवाक वांगडा सोबून दिसना, शारांतल्यो चाली रिती समजना, ताचे मनाक लावन न घेतां  घोवा वांगडा सुखान जिवीत जगपाचें सपन पळयता. पूण घोवाक तिच्या भितर रूची ना हें कळटकच ती घरांतल्यान भायर सरता. घोवाक सोडून दिनासतना लेगीत ती शारांतली चाल शिकता आनी परतून घोवाक वांगोड दिता आनी ताचें काळीज जिखता.

रंजनान आपले कारकिर्दींत ते तेंपा वयले फामाद कलाकार कुलदीप पवार, यशवंत दत्त, राजा गोसावी, निळु फुले, दिलीप प्रभावळकर ह्या प्रस्थापीत कलाकारां वांगडाच न्हय, तर हेर नवोदित नायकां वांगडा काम केलां… तरी रंजना आनी अशोक सराफाली जोडी चड गाजली.

सुशीला, पाटलीण, तमासगीर, भुजंग, दैवत, नागिन, हे दान कुंकवाचे, अरे संसार संसार, गुपचुप गुपचुप, गोंधळात गोंधळ, आली लहर केला कहार, मुंबईचा फौजदार, मर्दानी, जखमी वाघिण, कुलस्वामिनी अंबाबाई, सगेसोयरे, सारक्या सिनेमांत भुमिका करुन रसिकांच्या मनांत रंजना कायमस्वरूपी सुवात तयार केली. सुरवेक रंजनाची रविंद्र महाजनी वांगडा जोडी लोकप्रीय जाल्ली. तांगेली रोमान्टिक गितां आयज लेगीत लोकप्रीय आसात. ही जोडी पडद्याचेर आसतना अशोक सराफ, जो एक सहाय्यक अभिनेतो आशिल्लो, उपरांत रंजनाचो नायक म्हणून पडद्याचेर आयलो आनी तेन्ना सावन ताचो करिअर ग्राफ चडत रावलो…. दोगांय पयलेच खेपे बाईल वेडा  सिनेमांतली नायक, नायिका म्हणून पड्ड्यार दिसलीं.

सुशीला’ (1978), ‘गोंधळात गोंधळ’ (1981), ‘गुपचूप गुपचूप’ (1983), ‘बहुरूपी’ (1984), ‘बिनकामाचा नवरा’ (1984), ‘खिचडी’ (1985) ह्या सिनेमांत रंजनान अशोक सराफा वांगडा अभिनय केला. हे जोडयेचे सिनेमा खूब गाजले. खरें म्हणल्यार फिल्म उद्देगाक अशोक- रंजना नांवाची नवी कलाकार जोडी मेळ्ळी. पूण हे जोडयेचे आनीक सिनेमा पळोवपाचें भाग्य रसीकांक मेळूंक ना.

मराठी, गुजराती आनी हिंदी सयत 60 परस चड चित्रपट, ‘झपाटलेली’, ‘अपराध मीच केला’ आनी निमाणें ‘फक्त एकदाच ’, आनी दूरदर्शन सह्याद्रीचें ‘मृत्युपत्र’ नाटक ही रंजनाची कारकिर्द. 

व्ही. शांतारामाच्या ‘जंजर’ ह्या सिनेमाच्या शुटींग खातीर बेंगळुरूक वतना 22 नोव्हेंबर 1984 दिसा रंजनाले गाडयेक अपघात जालो  आनी ह्या अपघातांत रंजनाक दिव्यांग जाल्ल्यान निवृत्त जावचें पडलें.

अभिनयाक आपलो देव मानपी रंजनान 1993 वर्सा व्हील चॅराचेर बसून ‘फक्त एकदाच ’ ह्या नाटकांत परत एक फावट आपल्या अभिनयाची झलक प्रेक्षकांक दाखयली. ह्या नाटकाचे वट्ट 38 प्रयोग जाल्ले. तातूंत तिगेल्या धैर्य, धाडसा कदर करपाक जाय. उपरांत तिका कसलीच खाशेली भुमिका मेळ्ळी ना. 3 मार्च 2000 दिसा मुंबयंत तिका मरण आयलें.

गांवगिऱ्या, शिकिल्ले, बंडखोर बायलेचें चित्रण करतना रंजना जितली रागीट तितलीच निश्पाप भावना उक्तायतना   शांत दिसताली,  माचयेर नाचतना ती तितलीच गुल्ल जाताली. तिगेल्या भोवमुखी अभिनयाचेर प्रेक्षकांनी उपाट मोग केलो. देखून मराठी फिल्मांच्या नायिकांचें नांव घेतात, तातूंत रंजनाचे नांव पयल्या क्रमांकाचेर आसता.

सुदिन वि. कुर्डीकार