भांगरभूंय | प्रतिनिधी
अशोक खराताची फास्ट ट्रॅक कोर्टाच्या माध्यमांतल्यान चवकशी करून ताचे कारनामे उक्तडार हाडचे, आनी जाता तितले बेगीन ताका खर ख्यास्त जावची.
भोंदूबाबा अशोक खरात हाणें विकृतीची शीम हुपून भिरांकूळ कृत्यां केल्यांत. जाची कल्पना करप कठीण आसा. ताका लागून ताची खोलायेन चवकशी फास्ट ट्रॅक कोर्टाच्या माध्यमांतल्यान जावंक जाय. अशें दिसता की भोंदूबाबा अशोक खरात हाका मजत करपी राजकी फुडाऱ्यांनी आतां मेरेन दोळ्यार पट्टी कित्याक बांदिल्ली? खाराता बराबर दीर्घ काळ चर्चा करपी राजकी फुडाऱ्यांक ताच्या कुकृत्याची खबर कशी लागली ना? ताचे कडेन आनी ताच्या वांगड्यां कडेन कोट्यांनी रुपयांची संपत्ती आयली खंयच्यान? खराताक सारें उदक कोण घालताले? अशे खूबशे प्रस्न आयज सामान्य मनशांच्या मनाक भेडसायतात. आयज आमी मिडियाच्या माध्यमांतल्यान पळयतात की कथीत भोंदूबाबा अशोक खरात हाचे बराबर खूबश्या व्हड फुडाऱ्यांचे फोटे आसात. हाचोच अर्थ असो की ह्या राजकी फुडाऱ्यांचो अशोक खराता बराबर कसलो तरी संबंद आसूंक जाय.
रुपाली चाकणकर ह्यो महिला आयोगाच्यो जापसालदार अध्यक्षा आशिल्ल्यो. महिला आयोगाचें पद बायलांच्या सुरक्षेचे नदरेंतल्यान आनी अत्याचाराचे नदरेंतल्यान निराकरण करपा खातीर निर्णय दिवपी उच्च पद आसा. जेणे करून पिडीत बायलांक योग्य न्याय मेळचो आनी समाजांत सगले सुरळीत उरचें. पूण रुपाली चाकणकर हांणी बायलांक न्याय दिवपाचें सोडून अशोक खराता सारक्या भोंदूबाबाच्या नादाक लागून आनी तांचे पांय धुवून खूबशा बायलांचे वाटोळें केलें. चाकणकारांचें काम जालें की, लोकांक सांगप ब्रह्मज्ञान आनी स्वता मात पाशाण. आमी पळयतात की मिडियाच्या माध्यमांतल्यान अशोक खरात हाचे 100 परस चड अश्लील व्हिडियो मुखार आयल्यात. हाचे वेल्यान आमी समजूंक शकतात की खरात हाची विकृती कितली तेंगशेर पाविल्ली आनी सकयल्या पांवड्यार येवन पाविल्ली. अशा मनशाचे पांय सुशिक्षीत आदल्यो महिला आयोगाच्यो अध्यक्षा रुपाली चाकणकर धुतात आनी राजकी फुडारी ताका पांय पडटात कितली लजेची गजाल आसा. हांव तरी अशें म्हणण की ज्या राजकी फुडाऱ्यांचे लागींचे संबंद आशिल्ले ह्या सगल्यांक सरकारान सह आरोपी करूंक जाय. कारण खरातान आनी ताच्या वांगड्यांनी पुराय महाराष्ट्राक कलंकीत केलां. तेच प्रमाण अशोक खराता बराबर ज्या व्हड फुडाऱ्यांचे फोटे वा बसका जाल्यात तांचीय चवकशी जावप गरजेची आसा. कारण अशोक खरात हो विकृत आशिल्लोच पूण सॅक्स रॅकेट बी चलयतालो? हाचीय चवकशी जावप गरजेची आसा.
जे प्रमाण एखाद्या गुन्यांवकारा बराबर सर्वसामान्य मनशाचो फोटू आसता अशे परिस्थितीत पुलीस विभाग सर्वसामान्य मनशाची खोलायेन चवकशी करतात. वेळ पडत जाल्यार बंदखणीत लेगीत उडयतात. अशेच तरेन अशोक खराता बराबर संबंद आशिल्ले आनी ताचे बराबर फोट्यांत आशिल्ल्या सगल्यांचीच खोलायेन चवकशी जावप सामकी गरजेची आसा. कारण विकृतीची शीम हुपपी खरात हाचे कडेन कोट्यांनी रुपयांची संपत्ती आयली खंयच्यान हाची चवकशी करपा खातीर ताचे कडेन संबंद दवरपी सगल्याच राजकी फुडाऱ्यांची चवकशी जावप गरजेची आसा. खरात हो महाराष्ट्रा सयत देशाचो एक मोटो गुन्यांवकार आसा. बायलांचो गुन्यांवकार आसा. पिडितांचो गुन्यांवकार आसा. सर्वसामान्यांचो गुन्यांवकार आसा आनी खूबशा जाणांची संपत्ती हडप करपाचें काम खरात हाणें केलां. ताका लागून ताचे कडेन संबंद दवरपी सगल्या राजकी फुडाऱ्यांची चवकशी जावप गरजेची आसा तेन्ना सत्य मुखार येतलें.
कारण खराताच्या ह्या प्रकरणा वेल्यान अशें दिसून येता की हातूंत व्हड व्हड नुस्तें आडकूंक शकतात हेंवूय न्हयकारूंक येना. आमी जेन्ना समान कायदो वा समान अधिकार म्हणटात तेन्ना खराताचे केशींत सगल्यांनीच सुरक्षा विभाग, पुलीस विभाग हांकां सगले तरेचें सहकार्य करप गरजेचें आसा. तेच प्रमाण ज्या ज्या बायलांचेर अत्याचार जाल्यात वा खरातान ब्लॅकमेल करपाचो यत्न केला अश्या सगल्यांनी पुलिसांक मजत करून हें पुराय रॅकेट उक्तडार हाडूंक जाय. जेणे करून अशे घृणास्पद कृत्य फुडारांत कोणूच करूंक शकचो ना. भोंदू खरातान नरबळी आनी पशुबळी दिल्ल्याचेंय सांगतात. ताका लागून खरात विकृत आसाच. तेचबराबर सर्वसामान्यांचो मोटो हत्यारो लेगीत आसा. ताका लागून ताचे बराबर आशिल्ल्यांचो वा फोट्यांत आशिल्ल्यांची खोलायेन चवकशी जावंकूच जाय. तेन्नाच ‘दूद का दूद पानी का पानी’ जातलें.
राजकी फुडारी जेन्ना पयले फावटी खराताक मेळ्ळे तेन्ना तो एक बरो बाबा आशिल्लो आनी आतां भोंदूबाबा म्हणटात हाची लज खराताक मेळपी राजकी फुडारी आनी सेलिब्रिटीक दिसूंक जाय. हाचे वेल्यान स्पश्ट जाता की राजकी फुडारी स्वताच्या सुवार्था खातीर आनी अस्तित्वा खातीर भोंदूबाबांक लेगीत लागीं करतात. खरातान शेतकारांची जमीन लुबाडली. धरणाचें उदक आपल्या शेतांत वळयलें तेन्ना राजकी फुडारी खराताच्या पांया कडेन लोटांगण घालताले, आनी आतां भोंदूबाबा अशें म्हणून पळ काडपाचो यत्न करतात. ही गजाल सामान्य मनीस आनी कायदो केन्नाच सोंसून घेवचो ना. जो मेरेन भोंदूबाबा प्रकरणांत राजकी फुडाऱ्यांचेर खर कारवाय वा चवकशी जायना तो मेरेन समाजाक आनी सर्वसामान्यांक योग्य न्याय मेळचो ना. खराताचे जितले व्हिडियो व्हायरल जाल्यात ते फक्त 50 टक्के आसुये. हाचे मुखार आनीक व्हड उलगडो जावंक शकता. कारण खरात राजकी फुडाऱ्यांचे मजतीन सेक्स कॅण्डल सयत खूबशे कारनामे करतालो आसुये असोय दुबाव निर्माण जाता. हाचोय खुलासो जावंक जाय.
राज्याची सुरक्षा यंत्रणा, पुलीस यंत्रणा आनी एसआयटी सयत थळावी पुलीस यंत्रणा बरे काम करतात आनी तांचे कार्य तोखणायेचें आसा. अशे परिस्थितींत सरकारान, लोकप्रतिनिधिंनी, राजकी फुडाऱ्यांनी सुरक्षा यंत्रणेक सगले तरेची मजत करूंक जाय. ज्या राजकी फुडाऱ्यांचे खराता बराबर चर्चा करतनाचे फोटे आसात तांकां लेगीत सह आरोपी करून कारवाय करूंक जाय. खराताक सारें उदक घालपाचें काम राजकी फुडाऱ्यांनीच केलां. ताका लागून खरातान आपल्या घृणास्पद कृत्याचेर आपली पकड घटमूट केल्ली, आनी आयज ती उक्तडार आयली तेन्ना सगलेच राजकी फुडारी खराताच्या केशी पसून भोंदूबाबा म्हणून हात फाफुडपाचें काम करीत आसा हें महाराष्ट्राचें दुर्भाग्यूच म्हणचें पडटलें.
हांव सरकाराक विनंती करता की महाराष्ट्राक खराताच्या कलंका पसून वाटावपा खातीर अशोक खराताची फास्ट ट्रॅक कोर्टाच्या माध्यमांतल्यान चवकशी करून ताचे कारनामे उक्तडार हाडचे, आनी जाता तितले बेगीन ताका खर ख्यास्त जावची. जय हिंद.
रमेश कृष्णराव लांजेवार
9921690779
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
