अशे खेळपट्टीचेर एकेक धांवडी म्हत्वाचीः रोहीत शर्मा

भांगरभूंय | प्रतिनिधी

आमी बरी बॅटींग केली ना. एका वेळार आमी बरे परिस्थितींत आशिल्ले. पूण, आमी फावोश्यो भागिराऱ्यो करूंक ना आनी आमची बॅटींग लेगीत बाबत जाली. अशे तरेचे खेळपट्टीचेर एकेक धांवडी म्हत्वाची आसता अशें भारताचो मुखेली रोहीत शर्मान मॅच सोंपल्या उपरांत पत्रकारां कडेन उलयतना म्हणलें.

संवसारीक टी-20 क्रिकेट सर्तींतले 19वे मॅचींत भारतान पाकिस्तानाक 6 धांवड्यांनी हारयलो. पयलीं बॅटींग करतना भारतान 19 ओव्हरींनी सगल्यो विकेटी व्हगडावन फकत 119 धांवड्यो केल्यो. पूण, ही धांवसंख्या लेगीत पाकिस्तानाक चड थारली. ताका निर्धारीत 20 ओव्हरींनी 7 विकेटी व्हगडावन 113 धांवड्यो करप शक्य जाल्यो.

खेळपट्टींत खूब कितें आशिल्लें. प्रामाणीकपणान सांगचें जाल्यार फाटले मॅची परस हे मॅचींतली खेळपट्टी बरी आशिल्ली. अशे तरेचे लायनअप वांगडा काम करपाक आत्मविस्वास येता अशें रोहीतान मुखार सांगलें.

मजगतीं, भारताच्या जैतांत जसप्रीत बुमरा, हार्दीक पांड्या आनी अर्शदीप सिंग हांणी म्हत्वाची भुमिका वठयली. बुमरान 4 ओव्हरींनी फकत 19 धांवड्यो दिवन 3 म्हत्वाच्यो विकेटी घेतल्यो. दुसरे वटेन हे हारी उपरांत पाकिस्तानाचो सुपर आठांत पावपाचो मार्ग कठीण जाला.

भारताच्या बॉलरां खेतीर विकेटकीपर बॅट्समन ऋषभ पंतान म्हत्वाचें योगदान दिलें. ताणें 42 धांवड्यो केल्यो. तशेंच ताणें तीन उत्कृश्ट कॅची धरल्यो.

भारताचो डाव 80च्या स्कोराच्या लागसार गडगडलो. एका वेळार भारतान 89 धांवड्यांचेर फकत 3 विकेटी व्हगडायिल्ल्यो. पूण, उपरांत ताचो डाव 119चेर सोंपलो. पाकिस्तानाचे बाबतींत लेगीत अशेंच घडलें. मोहम्मद रिजवान एक बाजू सांबाळून खेळटालो. तो आपल्या पंगडाक सहज जिखून दितलो अशें दिशिल्लें. 15वे ओव्हरींत पाकिस्तानान 80 धांवड्यांचेर फकत 3 विकेटी व्हगडायिल्ल्यो. त्या वेळार बुमरान रिजवानाक बोल्ड केलो आनी ते उपरांत 119 धांवड्यो लेगीत चड थारल्यो. 11 ते 15वे ओव्हरी मदीं पाकिस्तानान फकत 17 धांवड्यो केल्ल्यो. ताकाच लागून पाकिस्ताना वयलें चेपण वाडलें. हें चेपण उणें करपाक रिजवानान रिस्क घेतली. तीच रिस्क पाकिस्तानाक अखेरेक म्हारग पडली.

संवसारीक टी-20 सर्त सुरू जाल्ली त्या वेळार अशें दिशिल्लें की भारत आनी पाकिस्तान एक सोंप्या गटांत आसा म्हणून. दोनूय पंगड सहज सुपर आठांत पावतले अशें दिशिल्लें. पूण, अमेरिकेन पाकिस्तानाक हारयलो आनी सगलेंच समीकरण बदल्लें. सध्या अ गटांत भारत आनी अमेरिका हांचे दरेकी चार गूण आसात. पाकिस्तानाच्यो फकत दोन मॅची बाकी आसात. जर अमेरिका एक लेगीत मॅच जिखपाक येसस्वी थारता तर पाकिस्तानाचें आव्हान सोंपतलें. अमेरिकेच्यो फुडल्यो मॅची आयर्लेण्ड आनी भारता आड आसात. दुसरे वटेन पाकिस्तानाक आपलें आव्हान कायम राखपाक फुडल्यो दोनूय मॅची व्हडा फरकान जिखच्यो पडटल्यो. तेन्नाच ताचो सुपर आठांतलो मार्ग उक्तो जातलो.

डॉ बॉल म्हारग पडलेः बाबर आजम

आमी बरी बॉलींग घाली. पूण, बॅटिंगेंत सेगीत दोन विकेटी व्हगडायल्यो तशेंच आमी खूब डॉट बॉल खेळ्ळे. सहज रितीन खेळपाची रणनिती आपणायिल्ली जाल्यार आमी जिखपाचे. फकत स्ट्रायक रोटेट करपाक जाय आशिल्ली आनी अदींमदीं एक-दोन चवके मारपाक जाय आशिल्ले अशें पाकिस्तानाचो मुखेली बाबर आजमान म्हणलें.

सकयले सुवातेर बॅटींग करपी बॅट्समनां कडल्यान चड आस्त दवरप चुकीचें थारतलें. सुपर आठांत सुवात मेळोवपाक आमकां उरिल्ल्यो दोनूय मॅची जिखच्यो पडटल्यो. आमी चुकींचेर विचार करतले अशें ताणें मुखार म्हणलें.