भांगरभूंय | प्रतिनिधी
वाणिज्य फाट्यांक भरपूर वेळ मेळटा, ताचो लाव घेवपाकच जाय. कांय वेळार कॉलेजींतल्यान शिकपाची सुविधा दितात. जशी की दिवचलच्या झांट्ये कॉलेजीन सीए तशेंच सीएमए शिकतल्या विद्यार्थ्यांची तजवीज केल्या. गेलीं 20 वर्सा हो उपक्रम ते चालीक लायतात आनी ताका बरो प्रतिसादूय मेळटा.
हें काॅलेज वाणिज्य फांट्याचें आशिल्ल्यान ह्या सीए कोर्साक चड म्हत्व दिता. हाची परिक्षा कठीण आशिल्ल्यान मार्गदर्शन मेळप चड गरजेचें. आॅनलायन जरी असले वर्ग आसले तरी आॅफलायन अभ्यासा भितर तुमकां तुमच्यो अडचणी, त्याच वेळार विचारपाक मेळटा. सीएक करियर म्हूण खूब वाव आसा. भरपूर पयसोय मेळटा. एक म्हणल्यार ह्या अभ्यासक्रमाचे वाटेक कोण वचनात. दुसरी गजाल कोर्साक मागणी खूब आसा. सीए करपाक सहसा विद्यार्थी तयार जायनात. हाचें एक कारण म्हणल्यार एखाद्या सीए कडल्यान मार्गदर्शन जाय. ताच्या कार्यालयांत काम करपाची संद मेळूंक जाय, तशेंच ह्या कोर्सा भितर त्रास काडपाची तुमची तयारी जाय.
आमचे लागीं जे विद्यार्थी आसात, ते फांट्याचो अभ्यास करीनासतना प्रवेश घेतात, म्हूण झांट्ये काॅलेजीच्या काय शिक्षकांनी लागींचे हायरसेकंडरींनी वचून वाणिज्य फांट्यांत तुमी फुडें कितें करूं शकतात, तो म्हत्वाचो कित्याक, हाची म्हायती दिवपाचो निर्णय घेतलो. 2004 त तांणी सीए तशेंच सीएमए वास्कोच्या पालवान ह्या कोर्साक जाय पडटा ती मुळावे परिक्षेची तयारी करपाचे वर्ग सुरू केले. ते लेगीत सांजवेळार. हाचो शिक्षकाक त्रास जावचो नासलो आनी विद्यार्थीय जेवन बी पावपाक शकताले. हो कोर्स गोंय विद्यापीठाकूय संलग्न आसा. म्हणल्यार कायदेशीर आसा. ह्या वर्गाचो लाव फक्त काॅलेजींतलेच विद्यार्थी न्हय, तर भायले विद्यार्थी लेगीत घेतात. तुमकां सीए जावपाक मजत करपी हो वर्ग हे परिक्षेक लागपी सगले तरेचें मार्गदर्शन करीत आयला. हातूंत फाटले पेपर, यशस्वी विद्यार्थ्यांचें मनोगत, फाटल्या वीस वर्सांनी परिक्षेंत जाल्ले बदल हे नदरेन विद्यार्थ्यांक सगलें शिकयतात.
वाणिज्य फाट्यांत बऱ्योच संदी आसात, पूण तांतूतले तातूंत सीएक चड म्हत्व आसा. एक वेवसायीक फांटो म्हूण ताका पळयतात. सगल्यांत खर परिक्षा म्हूण ताचे कडेन पळयतात. देखून मार्गदर्शन जायच. सीए जातलो तर कितें करपाचें? सुरवातीक तुमकां फावंडेशन कोर्स करचो पडटा. हातूंत तुमकां पेपर दिवचे पडटा. हाची म्हायती शिक्षक दितात. खेरीच हें मागीर त्या विद्यार्थ्यांक आपशीच कळटा. पूण सुरवातीचें मार्गदर्शन म्हत्वाचें, जें झांट्ये काॅलेजीचे शिक्षक दित आयल्यात. तेंय वीस वर्सां पयलीं सावन. हे फावंडेशन कोर्स बारावी पास जाल्ल्यांक उपलब्ध आसात. 2004 सालांत जेन्ना हो अभ्यासक्रम सुरू केल्लो तेन्ना 21 विद्यार्थ्यांनी नांवां दिल्लीं. खरें तर असले कोर्स हेर काॅलेजींनी लेगीत सुरू करप शक्य आसा, जाचो लाव विद्यार्थ्यांक जातलो.
प्रत्येक विद्यार्थ्याक मुलाखत ही दिवचीच पडटा. ती कशी दिवप, तुमच्या फुडाराच्या करियराक कितें गरजेचें, भाशा सुदारपाक कितें करूं येता, एखाद्या नामनेच्या साहित्याकारा लागीं भासाभास… हाचें गिन्यान कोर्सा वरवीं शिक्षक दिवं शकता. वावर खूब आसा हें खरें. पूण आपल्या विद्यार्थ्यांचे नदरेन पळयलें जाल्यार कांयच कठीण नासता. झांट्ये काॅलेजीन बरी देख घाल्या. हेर काॅलेजांनीय मुखार सरचें. हाचो लाव निमणो विद्यार्थ्यांक जाता, हें आमी विसरचें न्हय. झांट्ये काॅलेजीचो शिक्षक वर्ग, तांकां उमेद दिवपी प्राचार्य राजेंद्र कुंभारजुवेंकार ह्या सगल्यांची तुस्त करतना विद्यार्थ्यांनी तांणी केल्लो वावर विसरूंक जायना. फुडल्या विद्यार्थ्यां खातीर तुमी जायतें करूंक शकतात. शिक्षकांक विचारून तुमी ही गजाल पुराय करूं शकतात. आतां तर दरेका कडेन फोन आसा. ताचेर तुमी संपर्क करूं शकतात. (फोन- सौ. कृपा मयेंकार 76200 59873, प्रा. नयना सैल- 96377 22236) यशस्वी जाल्ल्या विद्यार्थ्यां कडेन तुमी चवकशी करूं शकतात. सगुण चंद्रकांत मयेंकार, हर्षद कैलाश पुरोहीत सारके विद्यार्थी नोकरेक आसात. तांणी ह्या कोर्साचो लाव घेतला. सीएची आवड आशिल्ल्यांनी हो अभ्यासक्रम जरुर शिकचो.
प्रा रामदास केळकार
9822583275
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
