भांगरभूंय | प्रतिनिधी
हाॅस्पिटलांनी कांय गरजेचीं वखदां, दोतोर, यंत्रां आसपाकूच जाय. देखीक एक्सरे, सोनोग्राफी, इसीजी.
काणकोणच्या नंदा सतरकार हांकां सोरोप चाबून मरण येवपाची घडणूक घडली. ते विशीं तांचे सुनेन सोशल मिडियाचेर उक्तायिल्ली प्रतिक्रिया राज्याच्या भलायकी मळा वयल्या कर्मचाऱ्यांचे कामाचे पद्दतीचेर उजवाड घालता. धडाधड उपचार केल्ले जाल्यार दुयेंतीचो जीव वांचपाचो. हाॅस्पिटलांतल्या कर्मचाऱ्यां खातीर ही सदचीच गजाल आसली, तरी निश्काळजीपणाक लागून जेन्ना कोणाक जीव वगडावचो पडटा, तेन्ना ताच्या घरच्यांक कितें भोगता, तें तांचे तांकांच खबर. काळ मुखार वता, तश्यो आमच्यो संवेदना मरत चल्ल्यात. आपूण काम करता ताचो आपल्याक पगार मेळटा, तें प्रामाणीकपणान करप हें आपलें कर्तव्य हेंच आमी विसरून गेल्यात. कांय सरकारी कचेरींनी गेल्यार हें स्पश्टपणान जाणवले बगर रावना. नंदा सतरकार हांचे बाबतीत घडलो तो प्रकार सोशल मिडियाचेर आयलो, म्हूण लोकांक कळ्ळो. असल्यो कितल्योश्योच घडणुको राज्य आनी देशभरांतल्या हाॅस्पिटलांनी घडटात. त्यो सगल्योच उजवाडाक येनात म्हूण आमकां कळनात. भलायकी मळाचेर काम करप्यांनी आपूण जनतेचो सेवक, दुयेंती हो आपलो धनी हें भावनेन वागपाक जाय. पूण, कांय कर्मचारी भाटकार जाल्ले भशेन वागतात आनी ताचो फटको दुयेंतीक बसता.
आमच्या देशांत चार विखारी सोरोप मेळटात. नाग, काणेर, फुरशें आनी घोणस. हातूंत काणेर चड भिरांकूळ. कारण तो चाबलो म्हूण कळटाच अशें ना. ताचीं लक्षणांय उसरां दिसतात. नाग चाबता थंय दोन बुराक दिसतात. पांयांक संवेदना नासत जाल्यार कोण चाबला तेंय कळना. हालींच बंगळुरूंत अभियंत्याक सोरोप चाबलो तो निमणे मेरेन कळूंकच ना. सोशल मिडीया पोस्टांत म्हणलां ते प्रमाण, नंदा सतरकार हांकां कितें चाबलां तें कळना म्हूण अॅण्टी वेनम इंजेक्शन दिवंक मेळना, अशें काणकोण भलायकी केंद्राच्या कर्मचाऱ्यांनी सांगलें खंय. तांणी दुयेंतीची इबाडिल्ली भलायकी पळोवंक जाय आशिल्ली. वीख चडलां तें दिसतालें, जाल्यार तें देंवोवपाक उपाय करपा जाय आशिल्ले. परिस्थिती हाता भायर वता तें पळोवन दुयेंतीक मडगांवां आनी उपरांत जीएमसींत धाडले. भलायकी कर्मचाऱ्यांच्या निश्काळजीपणाक लागून तांकां मरण आयलें, असो तांच्या घरच्यांनी आरोप केला. हाचेर भलायकी अधिकाऱ्यांनी स्पश्टीकरण दिवंक जाय. वीख चडून 18 वरां जालीं तरी दुयेंतीचेर कसलेच उपचार जावंक नात खंय. हो तिडक येवपा सारको प्रकार. अॅण्टी व्हेनम इंजेसांव दिले, तेन्ना 38 वरां जावन गेल्लीं. उपरांत दोन दिसांनी दुयेंतीक मरण आयलें.
बऱ्याच भलायकी केंद्रांनी फक्त मलम पट्टी करून दुयेंतीक फुडल्या हाॅस्पिटलांत धाडटात. थंयच्यान मागीर जिल्हो हाॅस्पिटलांत, निमणे जीएमसींत. हो खो- खो चो खेळ केन्ना बंद जातलो? हाॅस्पिटलांनी कांय गरजेचीं वखदां, दोतोर, यंत्रां आसपाकूच जाय. देखीक एक्सरे, सोनोग्राफी, इसीजी. यंत्रां, उपकरणां आसून उपकारना, तीं चलोवपाक तंत्रज्ञ जाय. गोंयांतल्या कितल्या हाॅस्पिटलांनी अॅण्टी व्हेनम, सुणो चाबल्यार दिवपाचें रॅबीस विरोधी इंजेक्शन आसा? सोनोग्राफी, एक्सरे यंत्र आसा? आसा जाल्यार लोक उठसूठ खाजगी दोतोरां कडेन कित्याक धांवतात? आतां भोवतेक हाॅस्पिटलां 108 सेवेंचेर अवलंबून आसात. तांच्यो अॅम्ब्युलन्सी खंय गेल्यो? त्यो चलोवपाक ड्रायव्हर नात? मायेस्त, दयेस्त, भांगरा काळजाचो दादलो वा बायलेक हाॅस्पिटलांत वा हेर कडेन सरकारी नोकरी मेळ्ळी काय तिच्या सभावांत रोखडोच बदल जावंक जायना. मरण आयिल्ल्या मनशाची कूड घरा पावोवपाक पंचायत, पालिकेक पांयां पडचें पडटा. हाॅस्पिटलांक ती सुविधा दिवपाक मेळना? निदान वयर धांपपाचें कफन तरी!! गंभीर दुयेंती हाॅस्पिटलांत भितर सरलो काय ताचेर पयलीं उपचार जावंक जाय, हें सगल्यांनीच मतींत घेवंक जाय.
जीएमसींत जाता तसले उपचार तालुको पांवड्या वयल्या हाॅस्पिटलांनी जावप गरजेचें. विचार करचो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
