भांगरभूंय | प्रतिनिधी
नवी दिल्ली, खबरां संस्था ः संवसारीक भलायकी संघटनेच्या (WHO) म्हणण्या प्रमाण अशक्तपणा ही संवसारभरांत भलायकेची गंभीर समस्या आसा. 6 म्हयने ते 5 वर्सां पिरायेच्या सुमार 40% भुरग्यांक, 37% गुरवार बायलांक आनी 15 ते 49 वर्सां पिरायेच्या 30% बायलांक अशक्तपणाची समस्या आसा.
इन्स्टिट्यूट फॉर हेल्थ मेट्रिक्स अँड इव्हॅल्युएशन प्रमाण, संवसारभरांत सुमार 2 अब्ज लोकांक अशक्तपणाची समस्या आसा. हाचो अर्थ संवसारांतली सुमार चतुर्थांश लोकसंख्या अशक्तपणाची समस्या आसा. गोडेंमूत दुयेंतीं परस हें प्रमाण खूब चड आसा.
अशक्तपणाक लागून कुडींतल्या रगतांत ऑक्सिजनाचो उणाव आसूं येता. जाका लागून कुडीक फावो ती उर्जा मेळना. हाका लागून कुडीची वाड आनी उदरगत थांबूं येता. गुरवारपणांत चड केंस गळपाक शकता. तशेंच ताचो आवय आनी भुरग्याचे भलायकेचेर वायट परिणाम जावं येता. अशक्तपणा चड गंभीर जाल्यार कुडींतले अवयव अपयशी जावंक शकतात.
अशक्तपणा म्हणल्यार कितें?
कुडींत तांबड्या रगतपेशींची वा हिमोग्लोबीनाची उणीव आसप म्हळ्यार अशक्तपणा. रगतांत हिमोग्लोबीन नांवाचें एक खाशेलें प्रथिन आसता आनी तें रगतांतल्यान ऑक्सिजन पुराय कुडींत व्हरता.
लक्षणां
० सेगीत थकवो जाणवप
० कात धवी पडप
० धाप लागप वा घुंवळ येवप
० चड प्रमाणांत केस गळप
० हात-पांय थंड पडप
अशक्तपणा कित्याक येता?
अशक्तपणाचें सगळ्यांत व्हडलें कारण म्हळ्यार कुडींत ऑक्सिजन व्हरपाचें काम करपी हिमोग्लोबीनाचो उणाव आसप. ताचीं कारणां म्हळ्यार –
० लोखणाची उणीव – हिमोग्लोबीन लोखणापसून तयार जाता. आहारांत लोखणाचो खर उणाव आसल्यार अशक्तपणा जावं येता.
० रगत उणें – खंयच्याय दुयेंसाक लागून वा जखमेक लागून कुडींतल्यान चड रगत वचत जाल्यार अशक्तपणा जाणवता.
० जीवनसत्व बी 12 आनी फॉलीक अॅसिडाची उणीव – हे पोशक तत्व तांबड्या रगतपेशींच्या उत्पादनाक मजत करतात. तांच्या उणावाक लागून हिमोग्लोबीनाची उणीव जावंक शकता.
० खंयचोय दुयेंस वा संसर्ग – कांय दुयेंसांक लागून कुडींत रगत तयार जावप उणें जाता. हाका लागून हिमोग्लोबीन उणें जावंक शकता.
अशक्तपणा टाळपाचें उपाय…
अशक्तपणा टाळपाक समतोल आहार घेवप सगळ्यांत म्हत्वाचें. तातूंत लोखण आनी जीवनसत्वां भरपूर आशिल्लीं खाणा आस्पावची. शक्य जाल्यार नेमान सीबीसी रगत तपासणी करची. ताच्या मजतीन हिमोग्लोबीनाचें प्रमाण कळटा. हाचे भायर निरोगी जिणे पद्दतय खूब म्हत्वाची. तशेंच स्वास घेवपाक त्रास जाता वा अशक्तपणाची हेर लक्षणां दिसल्यार दोतोराचो सल्लो घेवचो. ते भायर –
० लोखण आशिल्लें पदार्थ खावप देखींक, पालक, मेथी, ब्रोकोली, बीट, डाळिंब, आपोल आनी ड्रायफ्रुट्स.
० जीवनसत्व बी 12 आनी फॉलीक अॅसिड भरपूर आशिल्लें आहार: दूद, तांतयां, नुस्तें, दाळ, भाजीपालो, केळीं आनी अंकुरीत कड्डणां खावची.
० तशेंच जीवनसत्व सी आशिल्ले संत्रां, लिंबू, पेरां, टमाट, आनी आवळो हांचो आस्पाव आहारात करप.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
