भांगरभूंय | प्रतिनिधी
महेश कोनाडकारा आड 7 आड 4 अविस्वास थाराव मंजूर
भांगरभूंय । प्रतिनिधी
पेडणें: सरपंचपदाचेर निवड जाले उपरांत मांद्रेंचे सरपंच महेश कोनाडकार हांकां 24 वरां भितर अविस्वास थारावाक फुडो करचो पडिल्लो. ताका लागून मांद्रें पंचायतींत सरपंच निवडी वयल्यान दोन गट पडिल्ल्याचें स्पश्ट जाल्ल्यान दयानंद सोपटे समर्थक कोनाडकार हांच्या विरोधांत जीत आरोलकार हांच्या गटान अविस्वास प्रस्ताव हाडिल्लो. हाचो आतां निर्णय जाला. जातूंत कोनाडकार हांकां सरपंचपद सोडचें पडलां.
मेळिल्ले म्हायती प्रमाण 29 ऑगस्टाक सरपंच कोनाडकार हांचेर मांद्रें पंचायतींत विरोधी पॅनलांत 7 आड 4 असो अविस्वास थाराव मंजूर जालो. ताका लागून सरपंच कोनाडकार हारले.
कितें जाल्लें प्रकरण?
आदले आमदार दयानंद सोपटे हांच्या गटाचे सरपंच महेश कोनाडकार हांचे आड 24 वरां भितर अविस्वास थाराव दाखल केल्ल्यान हो विशय गोंयभर चर्चेक आयिल्लो. 23 ऑगस्टाक कांय पंचायतींच्या पंचांनी सोपूत घेवन सरपंचांची निवड केल्ली. त्या वेळार मांद्रें पंचायतीचे सरपंच म्हूण कोनाडकार हांणीय सोपूत घेतिल्लो, पूण एका दिसा भितर तांचे आड अविस्वास प्रस्ताव मांडिल्लो. प्रशांत नायक, तारा हडफडकार, शेरॉन अमरोष फर्नांडीस, रॉबर्ट फर्नांडीस, किरण सावंत, मिंगेल फर्नांडीस आनी अमीत सावंत ह्या पंचांनी सरपंच कोनाडकार हांचे आड मतदान करून तांकां पदा वयल्यान खाला देंवयलो. जाल्यार उपसरपंच चेतना पेडणेंकार, संपदा आजगांवकार, राजेश मांद्रेंकार आनी महेश कोनाडकार ह्या चवगांचो दुसरो गट जालो.
तीन म्हयने तरी अविस्वास हाडचो न्हयः कोनाडकार
उण्यांत उणे तीन म्हयने खंयच्याच सरपंच, उपसरपंचांचेर अविस्वास हाडचो न्हय, असो सरकारान कायदो हाडचो. आपूण अणभवी आशिल्ल्यान आपणे हो अविस्वास थाराव मान्य केलो. एकागो नवो सरपंच वा उपसरपंच हे पयलेच खेपे वेंचून आयले आनी तांचे आड अविस्वास प्रस्ताव हाडलो जाल्यार तांकां तो पचोवपाक जावचो ना. तांच्या गटांत एकसुरी अणभवी पंच म्हूण तारा हडफडकार आसा, हेर सगळे नवे. तांचे उदरगती खातीर आपलो सदांच तांकां तेंको आसतलो. नव्या सरपंचाक आपूण परबीं दिता, अशी प्रतिक्रिया अविस्वास थाराव मंजूर जाले उपरांत महेश कोनाडकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
