भांगरभूंय | प्रतिनिधी
दात्यां मदीं बायलां 70 टक्के जाल्यार दादले 30 टक्के
भांगरभूंय । पिनाक कल्लोळी
पणजी : अवयव दान हें श्रेश्ठ दान म्हणटात. अवयव दान करून दुसरे व्यक्तीचो जीव वाटावपाक गोंयांतलीं बायलां दादल्यां परस मुखार आसात. गोंयांत अवयव दानाची प्रक्रिया, नियमन हें राज्य अवयव आनी पेशी प्रत्यारोपण संस्थे वतीन (सोटो) करतात.
सोटोन दिल्ले म्हायती प्रमाण गोंयांत आतां मेरेन जाल्ल्या जितेपणी किडणी दानांत महिला दात्यांची संख्या दादल्यांचे तुळेंत दुपेटी परस अदीक आसा. मेळिल्ले म्हायती प्रमाण, कांय कारणांक लागून किडणी निकामी जाली जाल्यार ते व्यक्तीच्या लागींच्या नात्यांतल्या कुटुंबांतली व्यक्ती किडणी दिवपाक मुखार येता. तातूंत महिला दाते अदीक आसात. आतां मेरेन गोंयांत 49 जाणांनी जितेपणी किडणी दान केल्या. तातूंतल्यो 70 टक्के म्हणल्यार 34 दाते बायलां आशिल्लीं. जाल्यार 15 दाते (30 टक्के) दादले आशिल्ले. गोंयांतल्या किडणी दानां मदले 35 किडणीचे दादले दुयेंती जाल्यार 14 किडणी बायलां दुयेंतींत प्रत्यारोपण केलें.
एकादी व्यक्ती ब्रेन डेड जाले उपरांत तिच्या कुटुंबीयांचे इत्सेन ब्रेन डेड व्यक्तीचें अवयव दान करतात. आतां मेरेन अश्या 8 ब्रेन डेड व्यक्तींचें अवयव गरजेवंत दुयेंतींक दिल्यात. तातूंत दात्यां मदीं 7 दादले जाल्यार एके बायलेचो आस्पाव आशिल्लो. तांणी 16 किडणी, 7 फिग्दां, 4 काळजां आनी 2 फुफ्फुसांचें दान केलें. दान केल्ल्या 16 किडणी मदल्यो 11 दादल्यांक जाल्यार 5 बायल गरजेवंतांक दिल्यो. तशेंच आतां मेरेन गोंयांत कॉर्मियल प्रत्यारोपण जाल्या, अशी म्हायती सोटो कडल्यान मेळ्ळ्या.
गोंयांत गोमॅकॉ सयत हेर कांय खाजगी हॉस्पिटलांत किडणी प्रत्यारोपणाची शस्त्रक्रिया जाता. अवयव दान करचे खातीर राज्य सरकार तशेंच सोटो कडल्यान जागृताय करतात. आतां मेरेन गोंयांत 1300 लोकांनी अवयव दानाचो सोपूत घेतला. सोटो अवयव दान, अवयव गरजेवंतांक दिवप, गरजेवंतांची प्रतिक्षा वळेरी अद्ययावत दवरप, अवयव दाना विशीं प्रशिक्षण दिवप, राष्ट्रीय अवयव आनी पेशी प्रत्यारोपण संस्थे वांगडा सनन्वय दवरून तांच्यो विवीध येवजण्यो गोंयांत चालीक लावप हीं कामां करता.
प्रतिक्षा वळेरेंत 68 जाण
गोंयांत किडणी प्रत्यारोपणा खातीरचे प्रतिक्षा वळेरेंत वट्ट 68 जाणांचो आस्पाव आसा. तातूंतलीं 52 प्रकरणां सक्रीय आसा जाल्यार 16 निश्क्रीय आसात. ह्या सगळ्यांक किडणी दान करपी दात्यांची गरज आसा, अशी म्हायती मेळ्ळ्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
