भांगरभूंय | प्रतिनिधी
नवी दिल्ली, खबरां संस्था ः अवयव दान करपा खातीर सरकारी कर्मचाऱ्यांक 42 दिसांची खाशेली कॅज्युअल सुटी दिवपाची तरतूद केंद्र सरकारान केल्या. केंद्रीय मंत्री जितेंद्र सिंह हांणी लोकसभेंत हे संबंदी म्हायती दिली.
ही सुटी शस्त्रक्रिया प्रकाराचेर आदारून आसची ना आनी सरकारी दोतोरान सांगिल्ले प्रमाण चडांत चड 42 दीस मेळूं येता. हॉस्पिटलांत दाखल जाल्ल्या दिसा सुटी सुरू जातली. पूण गरज पडल्यार शस्त्रक्रिया करचे पयलीं सप्तका आदींय सुटी घेवंक मेळटा. ही तरतूद 2023 वर्सा कार्मिक मंत्रालयाच्या आदेशा प्रमाण चालीक लायली, जाका लागून अवयवदान करपाक प्रोत्साहन मेळटलें अशी अपेक्षा आसा.
सरकारी कर्मचाऱ्यांक मेळपी मुखेल सुविधा
भलायकी सुविधा: सीजीएचएस (केंद्रीय सरकारी भलायकी येवजण) खाला सरकारी कर्मचाऱ्यांक आनी तांच्या कुटुंबांक सवाय दरान उपचार, वखदां आनी हॉस्पिटलांत दाखल करपाची सुविधा मेळटा. निवृत्ती उपरांत लेगीत सीजीएचएस सुविधा घेवंक मेळटा.
वैजकी सुटी आनी प्रसूती फायदेः बायलांक 6 म्हयने प्रसूती सुटी आनी दादल्यांक 15 दीस पितृत्व सुटी दितात. गंभीर दुयेंस वा अपघात जाल्यार दीर्घ वैजकी सुटयेची सुविधा आसा.
पेन्शन आनी ग्रेच्युटी: सरकारी कर्मचाऱ्यांक निवृत्ती उपरांत पेन्शन, ग्रेच्युटी आनी पीएफ (प्रोव्हिडेंट फंड) सुविधा मेळटा. नव्या पेन्शन येवजणे खाला दर म्हयन्याक पगारांतल्यान थोडे पयशे काडून घेतात, जे निवृत्ती उपरांत पेन्शनाच्या रुपांत दितात.
घरां आनी प्रवास फायदे: सरकारी कर्मचाऱ्यांक सुटी प्रवास सवलत (एलटीसी) खाला दर 4 वर्सांनी एक फावट हवाई/रेल्वे प्रवासाचेर सवलत मेळटा. सरकारी रावपाची सुविधा वा घर भाडें भत्तो (एचआरए) दितात.
शिक्षण आनी भुरग्यां खातीर शिश्यवृत्ती: कर्मचाऱ्यांच्या भुरग्यांक तांच्या अभ्यासा खातीर शिश्यवृत्ती आनी शिक्षण भत्तो दितात. केंद्रीय विद्यालयांत प्रवेश घेतना सरकारी कर्मचाऱ्यांच्या भुरग्यांक प्राधान्य मेळटा.
विशेश सुटी आनी उत्सव: सरकारी कर्मचाऱ्यांक राष्ट्रीय आनी राजपत्रीत सुटये भायर जायत्यो खाशेल्यो सुटयो मेळटात. सणांच्या वेळार व्याजमुक्त आगाऊ रीण घेवपाची सुविधा आसा.
कर्मचाऱ्यांक एनपीएस वा यूपीएसांतल्यान येवजण निवडूंक मेळटा
आतां सरकारी कर्मचाऱ्यांक राष्ट्रीय पेन्शन येवजण (एनपीएस) आनी नवी युनिफाइड पेन्शन येवजण (यूपीएस) हांचे मदीं निवड करपाचोय पर्याय मेळटलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
