अवयव दानांक लागून तिगांक जिवदान

भांगरभूंय | प्रतिनिधी

पणजीः मणिपाल हॉस्पिटलांत ब्रेन डेड आशिल्ल्या दुयेंतीचे घरकान्नीन दुयेंतीचे अवयव दान करपाचो निर्णय घेतिल्ल्यान तीग जाणांक जिवदान मेळ्ळें. ते प्रमाण राज्य अवयव आनी पेसी प्रत्यारोपण संस्थेन (सोटो) गोंय वैजकी म्हाविद्यालय (गोमॅकॉ), हेल्थवेच्या गरजेवंत दुयेंतीक दरेकी एक किडणी, तशेंच इंदोरांतल्या हॉस्पिटलांत भरती आशिल्ल्या दुयेतीक फिग्द दान करपाची परवानगी दिली. अवयव दान प्रक्रिया जलद गतीन करचे खातीर गोंय पुलिसांनी तीन ग्रीन कॉरिडॉर तयार केल्ले.

मेळिल्ले म्हायती प्रमाण मणिपाल हॉस्पिटलांत कर्मचारी आशिल्ल्या 48 वर्सां पिरायेचे व्यक्तीक ब्रेन हॅम्रेज जाल्ल्यान तांकां हॉस्पिटलांत भरती केल्ली. उपरांत तांकां थंयच्या दोतोरांनी ब्रेन डेड घोशीत केलें. दुयेतीचे घरकान्नीन आपल्या घरकाराचे उगडास जिवे दवरपाचो निर्णय घेतलो. ते खातीर तिणें घरकाराचे अवयव दान करपाक परवानगी दिली. ते उपरांत सोटो संस्थेन मणिपाल, गोमॅकॉ, हेल्थवे आनी ज्युपिटर (इंदोर) ह्या हॉस्पिटलां कडेन समन्वय सादून अवयव दानाची प्रक्रिया सुरू केली.

सोटो संस्थेन हेल्थवे हॉस्पिटलांतल्या 34 वर्सांच्या दादल्याक जाल्या गोंय वैजकी म्हाविद्यालयांतले 42 वर्सां पिरायेचे बायल दुयेंतीक दरेकी एक किडणी दिवपाची परवानगी दिली. नोदणीकृत किडणी प्रत्यारोपण हॉस्पिटल आशिल्ल्या मणिपाल हॉस्पिटलाचे प्रतिक्षा वळेरेंत कोणूच योग्य प्राप्तकर्तो नाशिल्लो. जाल्यार पश्चीम विभाग अवयव आनी पेशी प्रत्यारोपण संस्थेन (सोटो) इंदोरच्या विशेश ज्युपिटर हॉस्पिटलांतले 67 वर्सां पिरायेच्या प्राप्तकर्त्याक फिग्द दान करपाचो निर्णय घेतलो. हे आदीं 2018 मणिपाल हॉस्पिटलांतल्या बी सदासीव राव हांच्या घरच्यांनी अवयव दान करपाचो निर्णय घेतिल्लो. सोटो गोवा, मणिपाल हॉस्पिटल, गोंय पुलीस, 108 अ‍ॅम्ब्युलन्स सेवा, दाबोळी आनी मोपा विमानतळा वयले विमानतळ अधिकारी हांच्या आदारान हें अवयव दान शक्य जालें, अशें सोटो संस्थेन म्हणलां. हे आदीं 29 जानेवारीक गोमॅकाँत भरती आशिल्ले दुयेंतीन अवयव दान केल्ल्यान पांच व्यक्तींचो जीव वाटावपाक येस आयिल्लें.