भांगरभूंय | प्रतिनिधी
नवी दिल्ली, खबरां संस्था ः आयज लेगीत भारतांत अवयवदाना विशीं लोकांक चुकीचे समज आसात. देखून अवयवदान करप्यांचो आंकडोय उणो आसा. दर वर्सा हजारांनी लोक प्रत्यारोपणाची वाट पळयतात, पूण दात्याच्या उणावाक लागून प्रत्यारोपण शक्य जायना. अवयव दान करपी कांय लोकांमदीं बायलांचो आस्पाव जाता. 1995 ते 2021 मेरेन देशांत 36,640 प्रत्यारोपण जाले. तातूंतले 29 हजार अवयव मेळोवपी दादले आसले, जाल्यार फकत 6,945 बायलांनी अवयव प्रत्यारोपण केलें. दर पांच अवयवदान करप्यां मदीं चार बायलो आसात. जाल्यार दर पांच अवयव मेळोवपी लोकां मदीं चार दादले आसात. अवयवदानाचे बाबतींत बायलां दादल्यां परस खूब फुडें आसात अशें ह्या आंकडेवारींतल्यान दिसून येता.
जिव्या अवयवदानांतय बायलां मुखार आसात. प्रायोगिक अँड क्लिनिकल ह्या नेमाळ्यांत उजवाडाक आयिल्ल्या संशोधनांतल्यान प्रमाण 2019 वर्सा केल्ल्या अवयव प्रत्यारोपणांतल्या जिवें दातां मदीं 80 टक्के बायलां आशिल्लीं. जाल्यार ताचे कडल्यान अवयव मेळिल्ले 80 टक्के दादले आशिल्ले. हाचो अर्थ अवयवदानाचे बाबतींत दादले बायलांच्या लागीं लेगीत नात. बायलोय यकृत दाता आसात. म्हणल्यार जिवें आसतना अवयव दान करपाक ते दादल्यां परस खूब फुडें आसात. जिवो दातो आपली मूत्रपिंड आनी यकृत दान करूंक शकता. चडशे फावट दादल्यांक मूत्रपिंड दान करपी बायलोच आसतात.
बायलां फकत घोवाचेच न्हय, तर भुरग्यांचे आनी भावंडाचेय अवयव दान करतात अशें तज्ञ सांगतात. बायलां अवयव दान करपा फाटलें कारण म्हळ्यार अर्थीक लुकसाण जावचें न्हय. दादल्यांनी आपले अवयव दान केल्यार तांका घरांत बसचे पडटले अशें बायलांक दिसता. अशे परिस्थितींत अर्थीक लुकसाण जावपाचो धोको आसता. देखून बायलां अवयव दान करतात. कुटुंबांतल्या एका भुरग्याक अवयव दान करपाचे आसल्यार बायलांच मुखार येतात.
पुण्यांतल्या डी वाय मेडिकल कॉलेजींतली एक प्रत्यारोपण समन्वयक सांगता, फाटलीं 15 वर्सां आपूण ह्या मळार काम करता, पूण आयज मेरेन अशें फकत एकच प्रकरण पळयलां जंय एका दादल्यान बायलेक अवयव दान केला. हेर सगळ्या प्रकरणांत फकत बायलांच अवयव दान करतात. घरगुती जापसालदारक्यो आनी अर्थीक लुकसाणा पसून कुटुंबाची राखण करपा खातीर बायलां अशें करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
