अवगुणांनी फजेतूच जाता

भांगरभूंय | प्रतिनिधी

चिंतन- 7

संत तुकाराम महाराजाचें सामकें सादें, पूण खूब खोल वचन पळयात-

अवगुणांचे हाती l

आहे अवघी फजिती ll

ल्हान- ल्हान वचनांतल्यान तुकाबो कितलो तरी व्हडलो विवेक सांगतात. आमकां शाणपणाचो मार्ग दाखयतात. जागे करतात. वायट संवयी, वायट सभाव, वायट संगत हांचो आदार घेतकच मनशाचे जिणेंत फजेत जाले बगर रावना.

हाचें एक जगप्रसिद्ध उदाहरण म्हणल्यार एन्राॅन कंपनीचो सिईओ जेफ्री स्किलिंग. एका काळार संवसारभरांतल्या वेवसायीक जगांत ताका आयडाॅल मानताले. ताणें अमेरिकेंतली एन्राॅन नांवाची ऊर्जा कंपनी पयल्या क्रमांकाचेर व्हेली. पूण ताका हाव, अहंकार आनी फटींगपणा हाचो नाद लागलो. फट आंकडे दाखोवन फायदो वाडिल्ल्याचें भासयत, शॅर बाजाराक फटयलो. कांय दीस ताका येश मेळिल्ले सारकें दिसलें, पूण सत लिपयतना तो सांपडलो. एन्राॅन कोसळ्ळी, हजारांनी कर्मचारी बेकार जाले, गुंतवणुकदार बरबाद जाले आनी निमणो तो बंदखणींत गेलो. इतली बुद्दी, इतलो दर्जो आसूनय अवगुणांनी ताका मातयें भरवण केलो.

अमेरिकेची जगप्रसिद्ध गायिका व्हिटनी ह्युस्टन तुमकां खबर आसा? तिचो आवाज सर्गा सारको आशिल्लो. संवसारांतली एक नंबराची पाॅपस्टार. पूण ड्रग्स आनी मद्यपानाच्या वेसनान तिचें आयुष्य उद्ध्वस्त जालें. गोड आवाज नश्ट जालो, नाते संबंद तुटले आनी अखेरेक पिरायेच्या 48 व्या वर्सा तिने ह्या संवसाराचो निरोप घेतला. हें सगलें कितें सांगता?

आमी जें पेरतात, तेंच किल्लता. बरेंपण, प्रामाणीकपण, कश्ट पेरलें जाल्यार आनंदाचें पीक येता. पूण राग, हाव, फटवणूक, वायट संवयी पेरल्यो काय फजेतेक कोणूच थांबोव शकना. थोडो खोलांत विचार केलो तर लक्षांत येतां – वायट संवयी मनशाक रोखड्योच फटयनात. त्यो ल्हवू- ल्हवू मनशांत मुरत वतात. सुरवेक ‘ल्हानशें इतलेंच आसा’ अशें दिसतां. पूण ल्हान- ल्हान करीत तेंच जिणेंक नागमोडी मोडण दितां.

आमचे सदच्या जिणेंत आमी थोडें- थोडें बदलूं शकतात. तिडक उफाळ्ळी तरी थोडें रावचें. फट उलोवपाचो मोह जालो तरी ओग्गी रावचें. ल्हान- ल्हान बरें निर्णय घेतले तरुच व्हडलें आनंदाचें आयुश्य मेळपाक शकता. 

म्हणून विचार करात- खंयच्यो वायट संवयी आयजूच झटकून उडोवपाच्यो? सद्दां स्वताक विचारीत रावात आनी बरेंपणाचे वाटेर चलात. कारण निमणें बरे गुणूच आमकां मनीस म्हूण उंच व्हरतात.

– हभप देवदत्त दि. परुळेकर