भांगरभूंय | प्रतिनिधी
घरां लागींच एक दोंगुल्ली आसा. ती दोंगुल्ली बेणून (निवळ करून) थंय आमी माडाचे कावथे, काजूची कलमां, भिण्णाची रोंपा घाल्यांत. झाडां, झोंपां, वेली निवळ करतनाच रोयणीय निवळ करच्यो पडटात. अळम्याचे दीस आशिल्ल्यान, खंयच्या फोगाक खंयच्या अळम्याक अळमीं येत हाचो नेम नासता. ह्या दोंगुल्लेचेर 7 ते 8 बारीक व्हड रोयणीं आसात. तिन्हीसांजचे वेळार बॅटरी घेवन, जाणां जाल्ले रातभर अळम्या खातीर भोंवत आसतात. तांकां खंयच्या अळम्याक केन्ना अळमीं येतात ते तोंडपाठ आसता. कुत्रे रातचे भोकूंक लागले की तेन्नाच आमकां कळटा की रोयणींक अळमी आयल्यांत म्हूण. केन्नाय चुकून उरलीं जाल्यार तीं आमकां मेळपाचीं.
चडशे फावटी अळमी खायन दिसलीं जाल्यार फोंडेंच्या बाजरांतल्यान 1000 ते 15000 रु. पुडी ह्या दरेन हाडचीं पडटात.
‘बाऽये…. सायला पोनच्या रोयणींक अळमीं उप्पाट आयल्यांत. कुरपणो ना जाल्यार धाकटो खोटलो दी बेगीन. वाड्या वेलो कोण पावत जाल्यार रोखडीच काब्बार करून उडयतलो.’ आमगेली कामेरी खरशेत खरशेत हुमऱ्यार रावन बोवाळ घालपाक लागिल्ली. हांवें ताजें चड मनार घेवंक ना. कारण दोंगर पोखरून हुंदीर भायर काडपाची ताका संवय आशिल्ली. अळमी आयल्यांत हें ताका कळत जाल्यार आपणांक जायतीं बुड्डून काडटलें आनी लिपोवन दवरतलें. आनी मनाक मारीत जाल्यार चार अळमी आमकां दितलें.
‘आऽगो, मात्शे रोयणी भोंवून यो मगो’ अशे सांगत जाल्यार, ‘म्हाका भंय दिसता. काल हांये रोयणीचेर सोरोप भोंवतना पळयिल्लो’ अशें तें म्हाका सांगतालें…. मुकाट्यान ताका एक मध्यम आकाराचो खोटलो दिलो. सुरबूस अळम्याचें धबधबीत, फ्रायड अळमी, मशरूम चिली, अळमी शॅकशॅक ह्या रेसिपींची रंगयाळी सपनां पळयत, हांव कळशी घेवन बांयचेर न्हावपाक गेलों.
सात-आठ दीस पडिल्ल्या उटंगाराच्या पावसाक लागून बांय उप्पाट भरिल्ली. ताका लागून हातानच उदक काडपाक मेळटालें. एक-एकदां उदकांत आशिल्ल्यो बेबक्यो उदका वांगडा आपुणूय टुण्ण करून उडकी मारून कळसुलेंत घुसतात आनी चणे कशे त्या बेबकांक कळशेंतल्यान भायर काडून परतून बांयंत शेंवटुचें पडटा. पावसाची रीप रीप आनी त्या वेळार बांयचें थंड उदक कळसुलेन काडून उकत्या आंगार घेवप, हाचे सारको भांगराळो खीण म्हजे नदरेन तरी दुसरो खंयचोच ना. बांयचें उदक आंगार घेवचे पयलीं आंगार शिरशिरी कशी येता. पूण एकदां उदक आंगार पडटकूच सर्ग दोन बोटांचेर आयिल्ले भशेन दिसता.
आधाशा सारको बांयचें उदक न्हा न्हा न्हालो आनी आयज किदें तरी बरें काम केलां हें घरकान्नीक दाखोवपा खातीर उप्पाट कळशी भरून अनवाणें उदक घेवन घरा आयलों आनी इतल्यांत…
‘खंय आशिल्लो तूं येदो वेळ…. कुळागरांत वचून सुपारेच्या माडयांक पळयत बसता, काय मानायां सारक्यो खोंपींत विडयो फुकीत बसता काय किदें ?…..आबोल्यान खोटलोभर अळमी हाडल्यांत. रातींच्यान म्हजी कमर धरल्या आनी हात फ्राकेंत येवन थरथरतात….. हात पांय धूं आनी ती निवळ करपाक बस. तांकां लागिल्ली माती सारकी धुंवून काड. ना जाल्यार जेवणाक तुका माती खावची पडटली…. आनी एक काम कर. व्हडलीं व्हडलीं 200 अळमी कडेक काडून दवर. सांजेचें हांव मम्मीगेर वतलें… मम्मी केन्नाच्यान अळमी अळमी करता आनी तुका तर तुजे आवय बगर कोणूच दिसना… व्हडल्या घराचे वाशे पोकोळ आसतात म्हणून आयकल्लें. पूण तुजे कडेन लग्न करून अणभव आयलो….’ आमगेलेन फारार फार म्हजेर सोडिल्ले आनी रक्तबंबाळ जावन हांव मनांतल्या मनांत हुयेली आनी किचांट मारतालों.
चवकेर वचून पळयत जाल्यार, खोटलोभर अळमीं म्हजीच वाट पळयतालीं. ल्हान भुरगें मातयेंत खेळटकूच जशें मातयाळें जाता, आनी आपणाक न्हावपाक घाल म्हणत रडत बसता. तशीच अावतिकाय त्या अळम्यांची जाल्ली आनी काकळुटेन तीं म्हजे कडे पळयत बशिल्लीं…. आमगेले कामेरें बारा वरांचेर कामा वेल्यान सुटलें आनी अळम्याचो आपलो हक्काचो वांटो घेवन फुज्ज्याे जालें, आनी वतना म्हजी बारा वाजोवन गेलें. तुवालो सोडलो आनी कलसांव चडयलें. एका-एका अळम्याक सामके उजरावन काडले. म्हाका कळटालें की म्हाका खरपतालें एकी कडेन आनी हांव खरजितालों एकी कडेन… आनी दुसरे वटेन म्हजी घरकान्न सांजवेळा मम्मीगेर वचपाक जाय म्हणून कपड्यांक फेर्र मारपाच्या कामांत गुथिल्ली.
एकनाथ सामंत
9226219723
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
