भांगरभूंय | प्रतिनिधी
खबरां संस्था
अरबः शेनवारा रातीं किंग फहद स्टेडियमाचेर जाल्ले अरब क्लब चॅम्पयन्स कपाचे फायनलींत ख्रिस्तियानो रोनाल्डोच्या अल- नासरान क्लब चॅम्पियन्स करंडाचेर आपलें नांव कोरातींत केलें. फायनलींत अल- नासरान रोनाल्डो सयत 9 खेळगड्यांनी खेळून अतिरिक्त वेळांत अल- हिलाल आड 2-1 अश्या गोलांनी जैत मेळयलें. पोर्तुगीज फुटबॉल खेळगडो ख्रिस्तियानो रोनाल्डान अल- नासराच्या जैतांत म्हत्वाचें योगदान दिलें. अल-नासराचे दोयूनय गोल रोनाल्डोन केले.
रोनाल्डो सावदी प्रो लिगांत पोरूंच्या सिझनात कंरड जिखपाक अपेशी थारल्लो. ताचो पंगड उपजैतिवंत थारल्लो. अदूं मात 38 वर्सां पिरायेच्या रोनाल्डोन सर्तींत 6 गोल केले. ताणे व्हो सिझन सगल्यांत चड गोल करपी खेळगडो म्हणून पुराय केलो. ताका लागून तो गोल्डन बूटाचो मानकरी थारलो. अरब क्लब चॅम्पियन करंड ही सर्त अरब प्रदेशांतल्या मुखेल पंगडां मदीं खेळयतात. तातूंत सावदी अरेबिया, कतार, संयुक्त अरब अमिराती, इराक, मोरोक्को, ट्युनिशिया आनी अल्जेरिया ह्या पंगडांचो आसपाव आसा.
फायनल मॅचीच्या पयल्या सत्रांत अल-नासर ह्या स्टार खेळगड्यांचो आसपाव आशिल्ल्या पंगडाक गोल करपाच्यो जायत्यो संद मेळ्ळ्यो. मात अल- हिलालाचो गोलकी मोहम्मद अलोव्हायान सॅडिओ माने, सेकोउ फोफाना आनी मार्सेलो ब्रोझोविकाचे यत्न फळादीक जावपाक दिले नात. अॅडिओ माने, सकोउ फोफाना आनी मार्सेलो ब्रोझविक हेअल-नासराचे नवे खेळगडे आसात. दुसऱ्या सत्रांत 6व्या मिनटाक अल-हिलालच्या माल्कमनान ब्राझिलाच्या मायकेला कडेन बॉल पास केलो. ताणे फ्री हेडरान बॉल गोल रिंगणात घातलो. अल- हिलालाक अशे तरेन 1-0 अशी आघाडी मेळ्ळी.
हे मॅचींत रोनाल्ड मात्सो उसरां फॉर्मांत आयलो. ताणे 74व्या मिनटाक गोल करून अल-नासराक गोल बोरोबोरी करून दिली. ताणे रायट बँक सुलतान अल-घनमच्या लो क्रॉसाचेर सेगीत पांचवे मॅचींत व्हो गोल केलो. दुसऱ्या सत्रांत 7 मिनटां मजगतीं अल-नासराच्या दोन खेळगड्यांक रफ खेळा खातीर मैदाना भायर काडले. मात मॅच अतिरिक्त वेळांत व्हरपाक ते येसस्वी थारले.
पुराय 90 मिनटांत 1-1 गोल बोरोबोरी जाल्ल्यान अतिरिक्त वेळांत रोनाल्डोन गोल करून पंगडाक 2-1 अशी आघाडी मेळोवन दिली. 115व्या मिनटाक ताका दुखापत जाल्ल्यान फुडें खेळपाक जमलें ना. मात अल-नासराच्या आठ खेळगड्यांनी अल-हिलालाच्या खेळगड्यांक गोल करपाक दिलो ना आनी पयले खेप अरब क्लब चॅम्पियन्स करंडाचेर आपलें नांव कोरातींत केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
