भांगरभूंय | प्रतिनिधी
अल्लू अर्जून ताच्या ‘पुष्पा – 2’ ह्या चित्रपटाक लागून चर्चेंत आसा. ह्या अभिनेत्यान हालींच चित्रपट निर्माते- दिग्दर्शक संजय लीला भन्साळी हाची भेट घेतली. दोगांचेय भेटी उपरांत सोशल मिडियाचेर विवीध तरांचे चर्चेक नेट आयला. अल्लू अर्जून हो संजय लीला भन्सालीच्या ‘लव्ह अॅड वॉर’ ह्या चित्रपटांत दिसतलो, असो अदमास सोशल मिडीयाचेर काडपाक लागल्यात.
अल्लू अर्जून संजय लीला भन्साळी हाका ताच्या मुंबयच्या जुहू कार्यालयांत मेळपाक आयिल्लो. तांचे भेटीचो व्हिडीयो सोशल मिडियाचेर व्हड प्रमाणार व्हायरल जाता. व्हिडियो पळयले उपरांत अल्लूचे चाहत्यांक दिसता अल्लू अर्जून हो संजय लीला भन्साळीच्या येवपा आशिल्ल्या ‘लव्ह अॅड वॉर’ ह्या चित्रपटा वरवीं बॉलिवुडांत पावल दवरतलो. तेचवरीं कांय सोशल मिडिया युजर्स अशेंय म्हणटात, ‘लव्ह अॅड वॉर’ चित्रपटांत अल्लू अर्जून कॅमियो करतलो.
‘लव्ह अॅड वॉर’ हो चित्रपट 2026 त प्रदर्शीत जातलो. ह्या चित्रपटांत आलिया भट्ट, रणबीर कपूर आनी विकी कौशल मुख्य भुमिकांनी दिसतले. आतां ह्या चित्रपटांत अल्लू कॅमियो करतलो काय मुख्य भुमिकेंत दिसतलो, हें कांय दिसांनी स्पश्ट जातलें.
अल्लू अर्जून आनी रश्मिका मंदान्ना हांचो ‘पुष्पा – 2’ चित्रपट सध्या थेएटरांनी नेटान चल्ला. हो चित्रपट 5 डिसेंबर 2024 ह्या दिसा प्रदर्शीत जाल्लो. चित्रपटाचें दिग्दर्शन सुकुमार हांणी केलां. ‘पुष्पा – 2’ चित्रपट बॉक्स ऑफिसाचेर आकांताची कमाय करता. अल्लूचो हो भारतांतलो सगळ्यांत चड कमाय करपी चित्रपट थारला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
