भांगरभूंय | प्रतिनिधी
मुख्यमंत्री : गोंय हें समान नागरी पाळपी राज्य
भांगरभूंय । प्रतिनिधी
पणजी : वंदना फ्रान्सीस आनी प्रिती मेरी ह्या सिस्टरींक फटीची अटक करपाचो विशय सभाघरांत मांडून गोंयांतूय असो अन्याय अल्पसंख्याकांचेर जावपाक शकता, असो भंय युरी आलेमांव हांणी उक्तायलो. गोंया युनिफोर्म सिव्हील कोड आसा आनी अल्पसंख्यांक भियेवपाची गरज ना, अशें आस्वासन मुख्यमंत्री डॉ. प्रमोद सावंत हांणी दिलें.
अधिवेशनाचे सुरवेकूच विरोधी पक्ष फुडारी युरी आलेमांव हांणी विशय सभघरांत मांडलो. जबरदस्तीन धर्मांतरण आनी मनीस तस्करीचो तांचेर आरोप करून पुलिसांनी सिस्टर वंदना फ्रान्सीस आनी प्रिती मेरी हांकां छत्तीसगडांत अटक केली. हे घडणुकेक लागून पुराय छत्तीसगड तशेंच गोंय धरून पुराय देशांत एक भंयाचें वातावरण तयार जालां, अशें तांणी सांगलें.
केरळ भाजपचो अध्यक्ष जो आदलो आयटी मंत्री आसलो चंद्रशेखर राजीव हांणी कांय गैरसमज जाल्ल्याचें विधान केलें. तशेंच हे अटके फाटल्यान न्यायालयान लेगीत खर दुबाव उक्तायला. सरकार आसतना अल्पसंख्याकांक न्याय मेळोवपा खातीर न्यायालयांत कित्याक वच्चें पडटा? छत्तीसगडांत जालां तें गोंया जावचें न्हय हे खातीर सरकार कितें करतलो, हाची जाप मुख्यमंत्र्यान अल्पसंख्याकांक दिवची, अशी मागणी आलेमांव हांणी केली.
खंयच्याय राज्यांत ज्यो घडणुको जाल्यात ताचो भंय गोंय राज्यांत पातळावपाचो यत्न करचो न्हय, अशें मुख्यमंत्र्यान सांगलें. गोंय हें समान नागरी कायदो पाळपी राज्य आसा. अशे पद्दतीन केन्नाच अल्पसंख्याकांचेर अन्याय जावंक ना आनी हे फुडेंय जावचो ना. बेश्टेच भियेवन वचपाची गरज ना, असो उलो मुख्यमंत्र्यान मारलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
