अर्थीक साक्षरते खातीर शिक्षण दिवपाची गरज

भांगरभूंय | प्रतिनिधी

शैलेश झिंगडेः नव्या शिक्षण धोरणा प्रमाणूच हे मुखार काम करचें पडटलें

भांगरभूंय । प्रतिनिधी

पेडणें: नव्या शिक्षणीक धोरणा प्रमाणूच विद्यालयाचे वेवस्थापन समितीक हे मुखार काम करचें पडटलें. तांणी हे नदरेन आपल्या विद्यालयांचो आनी संस्थांचो आराखडो तयार करपाची गरज आसा. फुडारांत नव्या शिक्षणीक धोरणाच्या दुसऱ्या पांवड्यार यत्ता 9 वी ते 12 वी मेरेनचें शिक्षण एकठांय जातलें. ते खातीर उच्च माध्यमीक पांवड्या वयल्या शिक्षकांक हायस्कुलांत विद्यार्थ्यांक शिकोवपाक वच्चें पडटलें. तेचवरी एकाद्या विद्यालयांतल्या विद्यार्थ्यांक दुसऱ्या विद्यालयांत धाडचें पडटलें. त्या दिश्टीकोनांतल्यान आयज नव्या शिक्षणीक धोरणाचो अभ्यास सगळ्यांनीच करप गरजेचें आसा. हें करतना अर्थीक साक्षरता जावचे नदरेन आयज शिक्षण दिवपाची गरज आसा, अशें शिक्षण संचालक शैलेश झिंगडे हांणी सांगलें.

भेंडाळे वजरीच्या शारदा उच्च माध्यमीक विद्यालयाच्या कला, वाणिज्य आनी कृशी विद्यालयाच्या भुमिपुजन कार्यावळी वेळार झिंगडे निमंत्रीत सोयरे म्हूण उलयताले.

ह्या वेळार तांचे वांगडा विशेश सोयरे म्हूण आमदार प्रवीण आर्लेकार, उद्देजक आदले जिल्हो पंचायत वांगडी प्रताप भेंडाळकार, विशेश सोयरे म्हूण उद्देजक किरण शिरोडकार, मोपा विमानतळ कंपनी जी. एम. आरचे संपर्क अधिकारी मिलिंद पैदरकार, अनघा आर्लेकार, वेवस्थापक श्रीधर देसाय, प्राचार्य गजानन मराठे, पालक शिक्षक संघाचे अध्यक्ष प्रकाश कुबल हाजीर आशिल्ले.

प्रताप भेंडाळकार हाचे हस्तुकीं धर्मीक विधी करून भुमीपुजन केलें.

नव्या शिक्षणीक धोरणा प्रमाण आयज विवीध आव्हानां आसात. ते नदरेन विद्यालयाचे वेवस्थापन समितीन इमारत बांदतना लक्ष दिवपाची गरज आसा. ह्या विद्यालयांत कृशी विशय आसा. आयज अश्या विशयांची गरज आसा. दरेकल्यान दोतोर, अभियंतो, शिक्षक जायनातना विवीध मळांचेर विवीध विशयांत पारंगत जावपाची गरज आसा. गोंयांत सध्या 80 समुपदेशक आसात, मात 550 विद्यालयांक ते उणे पडटात. ते खातीर आतां हे मुखार शिक्षकांनीच समुपदेशाचो वावर करून आपल्या विद्यार्थ्यांक बरे तरेन समजावन सांगचें, अशें झिंगडे हांणी सांगलें.

किरण शिरोडकार हांणी सांगलें, शारदा उच्च माध्यमीक शिक्षण मळार बरें काम करता. आतां मेरेन ह्या विद्यालयांतल्यान 600 ते 700 विद्यार्थी पास जावन गेले, ही खोशयेची गजाल. कृशी विशयाचो अभ्यासक्रम सुरू केल्ले खातीर आपल्याक खोस भोगता. कृशी मळार शिक्षण घेवन विद्यार्थी बरो वावर करतले आनी ह्या विशयाक म्हत्व मेळोवन दितले, अशी आस्त तांणी उक्तायली.

प्रताप भेंडाळकार हांणी सांगलें, आपणाक लेगीत शिक्षण घेतना खूब संघर्श करचो पडला, हे खातीर शिक्षणाचें म्हत्व आपल्याक कळ्ळां. शिक्षण मळा वयल्या पवित्र वावराक हातभार लागचो अशें खूब खेपे आपल्याक दिसतालें. आयज ह्या विद्यालयाक आपल्याक चानयेचो वांटो दिवपाक मेळ्ळो हे खातीर खोस भोगता, अशें तांणी सांगलें.

मिलिंद पैंदरकार हांणी सांगलें, ह्या विद्यालयांत विद्यार्थ्यांक हेर विशयां वांगडाच कृशी विशयाचें शिक्षम मेळटलें. नवी कुशळटाय, नवें शिक्षण ह्यो गजाली ह्या विद्यालयांतल्यान मुखार येवच्यो. ताचो पेडणें आनी सरभोंवतणच्या वाठारांतल्या विद्यार्थ्यांक फायदो जावचो, अशी इत्सा तांणी उक्तायली.

प्राचार्य गजानन मराठे हांणी विद्यालयाच्या वावराचो नियाळ घेतलो. आयचे कार्यावळीक संस्थेचे संस्थापक राज्यपाल राजेंद्र आर्लेकार कांय कारणांक लागून येवपाक शकले नात, मात तांचे मार्गदर्शन वेळावेळार मेळत रावतलें. तांच्या मार्गदर्शना प्रमाणूच हें विद्यालय फुडारांत वाटचाल करतलें, अशें तांणी सांगलें.

अनघा आर्लेकार हांणी सांगलें, भेंडाळे वाठारांत शारदा उच्च माध्यमीक विद्यालय जावचें हो विचार मुखार आयले उपरांत ह्या वाठारांतले प्रतिश्ठीत नागरीक भाटकार प्रताप भेंडाळकार हांणी हे खातीर फुडाकार घेतलो. हेच खातीर हें विद्यालय हांगा जालें. नवे वास्तू खातीर लेगीत तांची आमकां मजत मेळटा. विद्यालया सारक्या पवित्र वावराक जमीन वा हेर दान करतात तो वावर खूब म्हत्वाचो आसता. श्रृती नायक आरोंदेकार हांणी सुत्रसंचालन केलें, मंजिता मुळगांवकार हांणी उपकार मानले.