भांगरभूंय | प्रतिनिधी
आमदार व्हिएगस : पुराय प्रकरणाची चवकशी करपाची मागणी
पणजीः अर्थीक सर्वेक्षण अहवाल विधानसभेंत सादर जाले उपरांत वीज आनी शार नियोजन खात्याच्या येणावळीच्या आंकड्यांनी बदल केला. हो अहवाल सभाघरांत सादर जाले उपरांत येणावळीच्या आंकड्यांनी जाल्ले बदल हो गंभीर प्रकार. आपाचे आमदार वेंझी व्हिएगस हांणी हाचे चवकशीची मागणी केल्या. विधानसभा सचीवाक तांणी तशें पत्र बरयलां. हो प्रस्न केंद्रीय पांवड्यार व्हरतलो अशेंय तांणी पत्रकार परिशदेंत स्पश्ट केलें.
आमदार वेंझी व्हिएगस हांणी पणजेंत पत्रकार परिशद घेतली. अर्थसंकल्प सादर केल्ल्याच दिसा 26 मार्चाक राज्याचो अर्थीक सर्वेक्षण 2024-25 वर्साचो अहवाल सभाघरांत सादर केलो. ह्या अहवालाच्या पान 28 त शार नियोजन, वीज, येरादारी आनी हेर खात्यां खातीर फाटल्या पांच वर्सांचे येणावळीचो आंकडो दिलां. सभाघरांत अहवाल सादर करतना 2024-25 वर्साची (डिसेंबर मेरेन) शार नियोजन खात्याची येणावळ 11092.39 कोटी रुपया दाखयली. तशेंच 2024-25 वर्सा (डिसेंबर मेरेन) वीज खात्याची येणावळ 600.04 कोटी रुपया दाखयल्या. हाचे उपरांत वेबसायटीचेर अर्थीक सर्वेक्षण अहवालांत 2024-25 वर्सा शार नियोजन खात्याची येणावळ 110.92 कोटी रुपया आसा. वीज खात्याची 2024-25 वर्साची येणावळ 2474.58 कोटी रुपया इतली आसा.
अहवालांतले योग्य आंकडे खंयचे? आंकडेवारी कोणें बदलली आनी कित्याक? चुकीची दुरुस्ती केल्या काय? अशे जायते प्रस्न उप्रासतात. आंकडेवारी बदलपाक वा चुको दुरुस्त करपाक योग्य पद्दत पाळची पडटा. पूण तशें जावंक ना. ह्या प्रकाराची चवकशी करपाची मागणी आमदार म्हूण हांवें विधानसभा सचीवाक पत्र बरोवन केल्या. तशेंच हाची कल्पना हांव सभापतींक दितलों. अर्थीक सर्वेक्षण अहवालांतल्या आंकड्यांनी जाल्ले बदल गंभीर प्रकार आसा आनी आम आदमी पक्ष संसदेंत हो प्रस्न मांडटलो अशें आमदार वेंजी व्हिएगस हांणी पत्रकार परिशदेंत सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
