अर्थीक संदीचें बळगें मेळून कोंकणीचोय विस्तार जातलो : अवधुत तिंबलो
भांगरभूंय | प्रतिनिधी
कोंकणी लेखक संघाच्या वर्धापनदिसा साहित्यीकांचो भोवमान
पणजी : अर्थीक बळगे आनी समर्थ राजकी नेतृत्वाक लागून इंग्लीश भाशेचो सगळ्या संवसारात विस्तार जाला. कोंकणीकूय अर्थीक बळगे मेळून तिचो विस्तार जातलो. कोंकणीचा फुडार पर्जळीत आसा, असो विस्वास उद्देगपी अवधुत तिंबलो हांणी उक्तायलो. कोकणी लेखक संघाच्या वर्धापनदिसाच्या कार्यावळीक मुखेल सोयरे ह्या नात्यान ते उलयताले.
सरस्वती मंदिराच्या फोमेंतो सभाघरात जाल्ले वर्धापन दिसाचे कार्यावळींत साहित्यीकांचो भोवमान जालो. ज्येश्ठ साहित्यीक उदय भेंब्रे हे कार्यावळीचे अध्यक्ष आशिल्ले. दत्ता दामोदर नायक, दिलीप बोरकार, सुशिला हळर्णकार आनी शैला प्रभुदेसाय हांचो श्री. तिंबलो हांचे हस्तुकी भोवमान जालो.
इंग्लीश ही आमची कोणाचीच भास नी. तरी लेगीत भारतांत ती सगळ्या राज्यांनी दुसऱ्या नंबराचेर आसा. सगळ्या संवसारात लोक इंग्लीश भास उलयतात. हाका लागून ती ज्ञानभास वा अर्थीक उदरगतीची भास जाल्या. इंग्लडान भारता सयत सगळ्या संवसाराचेर राज्य केलें. पोट भरपा खातीर गोंयकारां सयत सगळ्याक इंग्लीश भाशे बगर पर्याय ना. बदलत्या अर्थवेवस्थेक लागून फुडाराक कोंकणीतूय अर्थीक संदी निर्माण जातल्यो. फुडले पिळगेक कोंकणी खातीर चड वेळ दिवप शक्य जातले आनी तिचो फुडार पर्जळटलो, असो विस्वास श्री. तिंबलो हांणी उक्तायलो.
गोंयकारांनी केन्नाच खंयचेच भाशेचो दुस्वास केलो ना. हाका लागून गोंयकार भोवभाशीक जाले. कोंकणी सयत मराठी, हिंदी, पुर्तुगेज, फ्रेंच, कन्नड ह्या सगळ्या भाशांनी गोंयकारांचें योगदान आसा, अशें उदय भेंब्रे हांणी सांगलें.
भोवमान जाल्ल्या दत्ता नायक, दिलीप बोरकार, सुशिला हळर्णकार आनी शैला प्रभुदेसाय हांणी मनोगत उक्तायलें. कोकणी लेखक संघाचे अध्यक्ष गौरीश वेर्णेकार, मिलिंद भरणे आनी हेर मानेस्त कार्यावळीक हाजीर आशिल्ले.
कोंकणी लेखक संघाचे अध्यक्ष गौरीश वेर्णेकार हांणी येवकाराचें उलोवप केलें. उर्जिता भोबे हांणी सुत्रनिवेदन केलें, जाल्यार मिलिंद भरणे हांणी उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
