भांगरभूंय | प्रतिनिधी
नवी दिल्ली, खबरां संस्था ः फाटल्या 2024-25 अर्थीक वर्सा देशभरांत 2.6 कोटी वाहनां विकली. हातूंत वर्सुकी आदाराचेर 6.46% वाड जाल्या. फकत दुचाकी विभागांत 1.88 कोटी गाडयो विकल्यो. फाटल्या वर्साच्या ह्याच काळा परस हें प्रमाण 7.71 टक्क्यांनी चड आशिल्लें.
त्याच वेळार नव्या अर्थीक वर्सा 2025-26 च्या पयल्या तिमाहींत वाहनांची विक्री 22 लाखां वयर जाली. फाटल्या वर्सा एप्रीलाच्या तुळेंत 2.95 टक्क्यांनी वाड जाल्या. ह्या काळांत दोन चाकी विभागांत 1.6 लाखां वयर गाडयो विकल्यो, हे एप्रिल 2024 परस 2.25% चड आसा. फेडरेशन ऑफ ऑटोमोबायल असोसिएशन्स (FADA) हांणी 2024 आनी एप्रिल 2025 ह्या अर्थीक वर्सांत विकिल्ल्या वाहनांचो विक्री अहवाल जाहीर केला.
एप्रीलांत हीरो कंपनीन सगळ्यांत चड 5.11 लाख दुचाकी गाडयो विकल्यो. ह्या विभागांतली सगळ्यांत चड वाहनां विकून कंपनीन पयल्या क्रमांकाचेर पावल दवरलें आनी ताचो वांटो 30% आसा. त्याच वेळार प्रवासी वाहन विभागांत मारुती सुझुकीन 1,38,021 गाडयो विकून पयल्या क्रमांकाचेर पावल दवरले आनी ताचो वांटो 39.44% आसा.
वेवसायिक वाहनांची विक्री 0.17 टक्क्यांनी उणी
अर्थीक वर्स 2024-25त वेवसायीक वाहनांची विक्री 0.17 टक्क्यांनी उणी जाल्या. ह्या काळांत देशभरांत 10,08,623 वेवसायिक गाडयो विकल्यात, जाल्यार फाटल्या वर्सा 10,10,324 गाडयो विकिल्यो.
2025-26 वर्सा दुचाकींच्या किरकोळ विक्रींत 7.71 वाड जावपाची अपेक्षा आसा. ह्या काळांत देशभरांत 1.88 कोटी दुचाकी गाडयो विकल्यो, जाल्यार फाटल्या वर्सा 1.76 कोटी दुचाकी गाडयो विकिल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
